يروشلم (ويب ڊيسڪ)اسرائيلي بچاءَ واري وزير غزه ۾ جاري جنگ کي وڌيڪ علائقن تائين ڦهلائڻ جي ڌمڪي ڏني.اسرائيلي بچاءَ واري وزير يوف گلانٽ چيو آهي ته اسرائيلي فوج حزب الله خلاف پنهنجي مهم کي وڌيڪ وسيع ڪندي، جنهن ۾ جتي به حزب الله ڪارروائي ڪندي اتي حملو ڪنداسين.اسرائيلي بچاءَ واري وزير چيو ته اسرائيلي فوج بيروت ۽ دمشق سميت ٻين ڏورانهن علائقن ۾ به آپريشن ڪندي.ٻئي طرف خليجي ميڊيا ٻڌايو آهي ته غزه ۾ اسرائيلي فوج جا وحشيانه حملا جاري آهن، جنهن ۾ اسرائيلي فوج هڪ اسپورٽس سينٽر تي حملو ڪيو، جتي بي گهر ماڻهن پناهه ورتي هئي، اسرائيلي فوج جي حملي ۾ 15 فلسطيني شهيد ٿي ويا.رپورٽن مطابق اسرائيلي فوج جمعي ۽ ڇنڇر جي وچ واري رات وچ ۾ غزه ۾ حملا ڪيا، جنهن ۾ ڪيترائي بي گهر فلسطيني شهيد ٿي ويا.اسرائيلي فوج مرڪزي غزا ۾ نصيرات ۽ مغازي ڪيمپن ۾ رهائشي عمارتن کي نشانو بڻايو، جڏهن ته ديرالبله واري علائقي ۾ به اسرائيلي فوج حملا ڪيا، جنهن کي محفوظ علائقو قرار ڏنو ويو. ميڊيا رپورٽن موجب گذريل رات اسرائيلي فوج اتر غزا جي علائقن ۾ وڏي تعداد ۾ هوائي حملا ڪيا. ميڊيا رپورٽن ۾ ٻڌايو ويو آهي ته سول ڊفينس ۽ طبي عملو طبي سامان جي کوٽ باوجود زخمين جي جلد صحتيابي لاءِ ڪوششون ڪري رهيا آهن.ٻئي طرف اسرائيلي فوج جو چوڻ آهي ته هن الشفا اسپتال ۾ آپريشن جاري رکيو آهي، جنهن ۾ حماس جا ڪيترائي ويڙهاڪ مارجي ويا آهن.
