ڪراچي(اسٽاف رپورٽر) سنڌ جي چيف سيڪريٽري ڊاڪٽر محمد سهيل راجپوت چيو ته شاهه عبداللطيف ڀٽائيءَ جي ڪلام کي سموري دنيا ۾ عقيدت سان ٻڌو وڃي ٿو. اهڙن خيالن جواظهار هن سنڌ سيڪريٽريٽ ۾ جشن لطيف جي تقريب کي خطاب ڪندي ڪيو. تقريب جو اهتمام سنڌ سيڪريٽريٽ نان گزيٽيڊ ايمپلائيز ويلفيئر ايسوسيئيشن ( سينوا ) طرفان ڪيو ويو. سينوا پاران هر سال سنڌ سيڪريٽريٽ ۾ جشن لطيف ملهايو ويندو آهي. تقريب ۾ سيڪريٽري جنرل ايڊمنسٽريشن محمد حنيف چنا، صدر سينوا نظر حسين جلالاڻي ۽ ٻين ملازمن وڏي انگ ۾ شرڪت ڪئي. تقريب کي خطاب ڪندي چيف سيڪريٽري سنڌ ڊاڪٽر محمد سهيل راجپوت وڌيڪ چيو ته شاهه عبداللطيف ڀٽائي جي درگاهه تي هر فرقي ۽ هر مذهب جا ماڻهو اچي حاضري ڀري سڪون محسوس ڪندا آهن.
هن وڌيڪ چيو ته قلندر لعل شهباز، سچل سرمست ۽ حضرت شاهه عبداللطيف ڀٽائي جهڙن صوفين جي ڌرتي آهي. هن سمورن ملازمن سان مخاطب ٿيندي چيو ته اسان سڀني کي پنهنجا فرض ايمانداري سان ادا ڪرڻا پوندا ۽ ماڻهن جي مسئلن کي صبر سان ٻڌڻ سان ئي انهن جا ڪيترائي مسئلا حل ٿي سگهن ٿا. تقريب ۾ چيف سيڪريٽري سنڌ پروموشن ڪيل پرائيويٽ سيڪريٽريز کي پروموشن جا آرڊر ڏنا ۽ سنڌ سيڪريٽريٽ مان رٽائر ٿيندڙ ملازمن امتياز علي جانوري، قائم الدين سمون ۽ مستقيم هاشماڻي کي لائيف ٽائيم اچيومينٽ ايوارڊ ڏنا ويا. تقريب ۾ سينوا جي صدر نظر حسين جلالاڻي ملازمن جي پروموشن ۽ الاٽمينٽ سميت ٻين مسئلن کي حل ڪرڻ تي چيف سيڪريٽري سنڌ ڊاڪٽر محمد سهيل راجپوت ۽ سيڪريٽري جنرل ايڊمنسٽريشن محمد حنيف چنا کي ايوارڊ ڏنا. تقريب ۾ مختلف فنڪارن شاهه عبداللطيف ڀٽائي جو ڪلام پيش ڪيو
