ڪراچي (اسٽاف رپورٽر) سنڌ جي مڪاني ادارن واري وزير سعيد غني چيو آهي ته چوماسي جي تازين برساتن جو سلسلو ڊگهو ٿي ويو آهي ۽ جيئن ئي اهو سلسلو ختم ٿيندو ته اسان پهرين مرحلي ۾ اهم شاهراهن ۽ ٻئي مرحلي ۾ روڊن ۽ گهٽين جي پچ ورڪ جو ڪم شروع ڪيو ويندو. ڪلڪ جي تحت ڪي ايم سي 400 روڊن ۽ رستن جي پيچ ورڪ جو ڪم ڪيو هو، جنهن ۾ 14 کان 15 تي تازين برساتن کانپوءِ مسئلن جي جاچ ڪئي پئي وڃي. اهڙن خيالن جو اظهار هن سومر ڏينهن سنڌ اسيمبلي ۾ مخالف ڌر جي ميمبرن پاران ڌيان ڏياريو نوٽس جي جواب ۾ ڪيو. مخالف ڌر جي ميمبر محمد شبير کان سندس حلقي ۾ برساتن کانپوءِ عوام کي درپيش مسئلن بابت سوال ڪيو ويو ته سعيد غني چيو ته جنهن معاملي تي معزز ايم پي اي جو ڌيان ڇڪايو آهي. اها صورتحال رڳو هڪ حلقي يا ڪراچي جي ناهي پر سڄي صوبي ۾ برساتن کانپوءِ اها صورتحال پيدا ٿي آهي. هن چيو ته هن ڀيري چوماسي جي برساتن جو سلسلو ڊگهو ۽ ڪيترن ئي مرحلن ۾ اڃان تائين جاري آهي ۽ ان صورتحال ۾ اسان ڪنهن به قسم جو پيچ ورڪ به نٿا ڪري سگهون. هن چيو ته اسان ڪي ايم سي ۽ ڪراچي جي سمورن شهرين کي هدايتون جاري ڪيون آهن ته هو پنهنجن پنهنجن علائقن ۾ سروي ڪري ڏسن ته ڪٿي ڪٿي روڊن ۽ گهٽين ۾ پيچ ورڪ ڪرڻا آهن ۽ جيئن ئي برسات بند ٿيندي ته فوري طور تي ڪنداسين ڪم شروع ڪندو. سعيد غني چيو ته پهرين مرحلي ۾ اندرين روڊن جو ڪم مڪمل ڪيو ويندو، جڏهن ته ٻئي ۽ ٽئين مرحلي ۾ اندرين روڊن ۽ گهٽين کي مڪمل ڪيو ويندو. مخالف ڌر جي ميمبر محمد عامر صديقي جي ڌيان ڇڪايو نوٽيس جي جواب ۾ هن چيو ته معزز ميمبر پنهنجي ڌيان ڇڪايو نوٽيس ۾ چيو آهي ته رڳو 20 کان 30 ملي ميٽر برسات ٿي آهي، اها حقيقت ناهي. ڪيترن ئي هنڌن تي 200 کان 250 ملي ميٽر برسات ٿي آهي. هن چيو ته گذريل سال وانگر ان کان اڳ به سنڌ صوبي ۽ خاص ڪري ڪراچي ۾ تمام گهڻي برسات پئي، جنهن بعد روڊن کي نقصان پهتو ۽ 400 کان وڌيڪ روڊن جي تعمير يا پيچ ورڪ ڪيو ويو جنهن ۾ ڪي ايم سي کي ڪلڪ تحت ڪافي رقم فراهم ڪئي وئي. انهن مان 14 کان 15 جايون آهن جتي مسئلو تازو برساتن سبب آيو آهي ۽ اسان ان جي جاچ ڪري رهيا آهيون. هن چيو ته جيڪي روڊ ٺهي ويا آهن يا جن جو پيچ ورڪ ڪيو ويو آهي، انهن روڊن کي جيڪڏهن برساتن سبب ڪو به نقصان پهتو ته ذميوارن خلاف ڪارروائي ڪئي ويندي ۽ ان حوالي سان سندن لاڳاپيل صلاحڪارن کان رپورٽ پڻ طلب ڪئي وئي آهي.
