ڪراچي(اسٽاف رپورٽر)سنڌ جي قائم مقام گورنر اويس قادر شاهه چيو آهي ته محرم دوران امن امان جي حوالي سان اڄ گورنر هائوس ۾ هڪ اهم اجلاس سڏايو ويو هو، جڏهن ته عملي جو چوڻ هو ته ڪامران خزاني آفيسن جون چاٻيون به پاڻ سان گڏ کڻي ويو هو. ان حوالي سان اويس قادر شاهه چيو ته هي هڪ آئيني عهدو آهي، ڪنهن جي ذاتي ملاقات ناهي. هي رويو ڪامران ٽيسوري کي مناسب ناهي. جيڪڏهن اڄ ملاقات نه ٿي ته مان ڪامران ٽيسوري خلاف عدالت ويندس. اويس قادر شاهه چيو ته پوليس آفيسر گورنر هائوس پهچي ويا آهن، ۽ گهرو وزير به اسلام آباد کان هتي اچي رهيو آهي. نجي ٽي وي سان ڳالهائيندي اويس قادر شاهه چيو ته ڪامران ٽيسوري اڳ به ڪيترائي ڀيرا پرڏيهه ۾ آفيس جون چاٻيون پاڻ سان گڏ کڻي ويو آهي.
گورنر هائوس هميشه عوام لاءِ کليل آهي,اويس شاھھ کي غلط فھمي ٿي آھي: ٽيسوري
سنڌ جي گورنر ڪامران ٽيسوري چيو آهي ته گورنر هائوس هميشه عوام لاءِ کليل آهي. اويس قادر شاهه کي اسپيڪر جي حيثيت سان ۽ ذاتي حيثيت ۾ عزت ڏني ويندي آهي. گورنر سنڌ جي ترجمان چيو ته قائم مقام گورنر سنڌ اويس قادر شاهه صورتحال کي غلط سمجهيو. گهرو سيڪريٽري، آءِ جي، ڊي آءِ جي ۽ ٻيا آفيسر اجلاس ۾ شرڪت لاءِ ڪانفرنس روم ۾ موجود هئا. ترجمان موجب، قائم مقام گورنر لاءِ هڪ مخصوص آفيس اڳواٽ تيار ڪئي وئي هئي، جيڪڏهن مرڪزي آفيس استعمال ڪرڻ جو ارادو هو ته جيڪڏهن معلومات وقت تي فراهم ڪئي وڃي ها ته انتظام ڪيا وڃن ها. ترجمان چيو ته سنڌ جي گورنر جي پرنسپل سيڪريٽري کي هدايت ڪئي وئي آهي ته واقعي جي جاچ 24 ڪلاڪن اندر مڪمل ڪئي وڃي.
پرنسپل سيڪريٽري قائم مقام گورنر کي نه روڪي: عدالت جو حڪم
سنڌ هاءِ ڪورٽ قائم مقام گورنر کي گورنر هائوس سنڌ جي مرڪزي آفيس ۾ داخل ٿيڻ جي اجازت ڏئي ڇڏي آهي. سنڌ جي قائم مقام گورنر اويس قادر شاهه ڪامران ٽيسوري خلاف گورنر هائوس جون چاٻيون پاڻ سان گڏ کڻي وڃڻ تي عدالت ۾ درخواست داخل ڪئي هئي، جيڪا فوري ٻڌڻي لاءِ منظور ڪئي وئي. ٻڌڻي دوران سنڌ هاءِ ڪورٽ قائم مقام گورنر کي گورنر هائوس سنڌ جي مرڪزي آفيس ۾ داخل ٿيڻ جي اجازت ڏني ۽ چيو ته پرنسپل سيڪريٽري قائم مقام گورنر جي رسائي کي نه روڪي. ان کان علاوه، عدالت پرنسپل سيڪريٽري کان 23 جون تائين رپورٽ طلب ڪندي هدايت ڪئي ته عدالتي حڪم جي ڪاپي صدر ۽ پرنسپل سيڪريٽري کي موڪلي وڃي.
