ڪراچي(اسٽاف رپورٽر)سنڌ جي سينئر وزير شرجيل انعام ميمڻ چيو آھي تھ سينيٽر عرفان صديقي پيپلز پارٽي جي بغض ۾ جيڪا ڳالھھ ٻولھھ ڪئي آھي اُھا مذمت جوڳي آھي، سينٽر عرفان صديقي لاعلم آھي يا بي علم آھي، کيس آئين پڙھڻ گھرجي، عرفان صديقي جيڪڏھن اوھان آئين نھ پڙھيو آھي تھ پوءِ اوھان کي سينيٽ ۾ ويھڻ جو اختيار ناھي ۽ ماڻھن جي مينڊيٽ جو مذاق نھ بڻايو. ڪراچي ۾ پريس ڪانفرنس کي خطاب ڪندي سنڌ جي سينئر وزير ۽ اطلاعات، ٽرانسپورٽ ۽ ماس ٽرانزٽ واري صوبائي وزير شرجيل انعام ميمڻ چيو تھ عرفان صديقي پنھنجي انٽرويو ۾ چيو تھ پيپلز پارٽي ڪڏھن بھ ڪينالن جي مخالفت ناھي ڪئي ۽ پوءِ ھُن صدر جو حوالو ڏنو. پاڪستان پيپلز پارٽي ٿل ڪينال خلاف قرارداد 2021 ۾ ٺھراءَ منظور ڪيو، 2022 ۾ گريٽر ٿل ڪينال فيز ٽو ۽ جلالپور ڪينال خلاف قرارداد منظور ڪرائي، اُن کانپوءِ سنڌ سرڪار سي سي آءِ ۾ جلالپور ڪينال ۽ 2022 ۾ چولستان ڪينال خلاف آواز اُٿاريو، سنڌ جو وڏو وزير وفاق کي خط لکندو رھيو،. سينيٽر عرفان صديقي کي جيڪڏھن ياد ناھي تھ اسان کيس خط موڪلي سگھون ٿا، اسان سنڌ اسيمبلي ۾ متفقھ طور تي ٺھراءَ منظور ڪرايو، ٺھراءَ کي بھ جيڪڏھن سرڪار سطح تي احتجاج نھ ٿو سمجھي تھ پوءِ عرفان صديقي کي رٽائرمينٽ وٺڻ گھرجي. اوھان مٿئين ايوان ۾ ويٺل آھيون ڇا اوھان کي معلوم ناھي تھ آئين ۾ صدر جو ڪھڙو ڪردار آھي، مسلم ليگ ن جا ڪجھھ ماڻھو آھن جيڪي ھر ھر اھڙيون ڳالھيون ڪندا رھن ٿا، جن کي آئين جو پتو ئي ناھي، پاڪستان پيپلز پارٽي جي چيئرمين بلاول ڀٽو زرداري سڀني کان وڏي فورم تي وزير اعظم کي چيو تھ اسان ڪينال جا مخالف آھيون ۽ اسان ڪينال ٺھڻ نھ ڏينداسين. صدر پارليامينٽ جي گڏيل اجلاس کي خطاب دوران اھو چيو تھ اسان اھڙي قسم جي ڪنھن بھ منصوبي جي حمايت نھ ڪنداسين. پاڪستان پيپلز پارٽي پاڻي جي معاملي تي واضح ۽ چٽو موقف رکيو آھي، ھي ڪا لڪل ڳالھھ ناھي، عرفان صديقي جي بيان جي مذمت ڪندي گذارش ڪريان ٿو تھ ليگ ن جي قيادت پارٽي اڳواڻن کي سمجھائي ۽ ٻڌائي تھ پاڪستان پيپلز پارٽي جو موقف ڪھڙو آھي ۽ اھڙيون ڳالھيون نھ ڪن. هن چيو ته ايپڪس ڪميٽي جي اجلاس ۾ غير قانوني مهاجرن جي سندن ملڪن ڏانهن واپسي جو جائزو ورتو ويو. غير قانوني مهاجرن بابت سڄي دنيا ۾ خاص قانون آهن. توهان ڪٿي به غير قانوني طور تي نٿا رهي سگهو. پهرين اپريل کان وٺي، سنڌ مان 991 مهاجرن کي واپس موڪليو ويو آهي، جن ۾ 476 مرد، 179 عورتون ۽ 336 ٻار شامل آهن. 220 ماڻهو اڃا تائين ڪئمپ ۾ آهن ۽ انهن کي بھ ملڪ بدر ڪيو ويندو. هزارين مهاجر رضاڪاراڻي طور تي پنهنجي وطن واپس آيا آهن ۽ غير قانوني مھاجرن خلاف روزاني جي بنياد تي ڪارروايون جاري رھنديون. سينئر وزير شرجيل انعام ميمڻ چيو ته سنڌ حڪومت گاڏين ۾ بليو پوليس لائيٽس جي استعمال، رنگين شيشن ۽ هٿيارن جي نمائش جو سخت نوٽيس ورتو آهي. پوليس سان گڏ رينجرز کي به ڪارروائي جا اختيار ڏنا ويا آهن. ماڻهن کي پريشاني کان بچڻ لاءِ قانون جي پاسداري ڪرڻ گهرجي. صوبن جي سرحدي علائقن ۾ گڏيل چيڪ پوسٽ سسٽم لاڳو ڪرڻ جو بھ فيصلو ڪيو ويو آهي. سينئر وزير شرجيل انعام ميمڻ چيو ته ايپڪس ڪميٽي جي اجلاس ۾ سوشل ميڊيا بابت تفصيلي بحث ٿيو. سوشل ميڊيا تي بدتميزي ۽ نفرت جوڳو مواد پکيڙڻ خلاف سخت ڪارروائي ڪرڻ جو فيصلو ڪيو ويو آهي. سنڌ سرڪار، گهرو کاتي ۽ گهرو سيڪريٽري جي ذريعي، ايف آءِ اي سائبر ڪرائم ونگ ۽ نيشنل رسپانس سينٽر فار سائبر ڪرائم جي مدد سان، اهڙن سوشل ميڊيا اڪائونٽس خلاف ڪارروائي ڪندي جيڪي سوشل ميڊيا جو غلط استعمال ڪن ٿا ۽ نفرت انگيز مواد پکيڙين ٿا. هن چيو ته ڪراچي ۾ ڪجهه خانگي ريسٽورنٽس کي نقصان پهچايو ويو، هر ڪنهن جا جذبات آهن پر ڪنھن کي بھ اھڙو ڪجهه نه ڪرڻ گهرجي جنهن سان ملڪ کي نقصان پهچي، ڪنهن کي به قانون هٿ ۾ نه کڻڻ گهرجي، وڏا فيصلا ڪرڻ جو اختيار رياست وٽ آهي. سينئر وزير شرجيل انعام ميمڻ چيو ته نومبر 2024 کان وٺي روڊ حادثن ۾ اوچتو اضافو ٿيو آهي، جنهن جي جاچ لاءِ سنڌ جي وڏي وزير پاران هڪ فيڪٽ فائنڊنگ ڪميٽي جوڙي وئي آهي. اڳ ۾ به هيوي ٽريفڪ ۽ موٽرسائيڪلون هلنديون هيون، حادثن کي روڪڻ جي حوالي سان حڪومت قدم کڻي رهي آهي، سنڌ جي وڏي وزير ذاتي طور تي وڏا فيصلا ڪيا، ڪراچي ۾ ٽريفڪ ضابطن جي ڀڃڪڙي ڪندڙن خلاف ڪريڪ ڊائون ڪيو پيو وڃي، گذريل ٽن ڏينهن ۾ 250 هيوي ٽريفڪ گاڏيون ضبط ڪيون ويون آهن، ان ۾ ٽرڪ، ٽرالر، واٽر ٽينڪر شامل آهن، گاڏيون جيڪي ٽريفڪ ضابطن جي ڀڃڪڙي ڪري رهيون هيون يا فزيڪلي ان فٽ هيون انهن کي ضبط ڪيو ويو آهي. هيلمٽ پائڻ جو پهريون چالان 1000 رپيا، ٻيو چالان 1500 رپيا آهي. ماڻهن لاءِ 2,500 رپين جو هيلمٽ پائڻ بهتر آهي. سنڌ حڪومت سڀني ڳرين، هلڪين ۽ عوامي ٽرانسپورٽ وارين گاڏين ۾ ٽريڪر، ڊيش ڪيم ۽ انڊر رن پروٽيڪشن ڊيوائسز لڳائڻ لازمي قرار ڏنو آهي. ڪراچي ۾ ڳري ٽرانسپورٽ لاءِ رفتار جي حد 30 ڪلوميٽر في ڪلاڪ مقرر ڪئي وئي هئي. ڊرائيورن جي اوچتو منشيات جي واھپي جي جانچ کي لازمي قرار ڏنو ويو آهي. ڊرائيورن جي جسماني ۽ ذهني صحت جو پڻ مڪمل جائزو ورتو ويندو. روڊ حادثن ۾ نومبر کان وٺي ھن وقت تائين 603 فوتگيون ٿيون آهن، جن مان 160 فوتگيون ڳري ٽرئفڪ جي ڪري ٿيون آهن. گذريل ٻن ٽن ڏينهن کان، ڪجهه سياسي پارٽين هن مسئلي تي سياست ڪرڻ جي ڪوشش شروع ڪئي آهي. اهي نفرت انگيز بيان ڏئي رهيا آهن ۽ غلط لهجو استعمال ڪري رهيا آهن. اهي ڀاءُ کي ڀاءُ سان ويڙھائڻ چاهين ٿا. سنڌ حڪومت جو واضح پيغام آهي ته جيڪو به فساد برپا ڪرڻ جي ڪوشش ڪندو ان خلاف سخت ڪارروائي ڪئي ويندي. جيڪڏهن ڪو حادثن جي آڙ ۾ فساد ڪرائڻ چاهي ٿو ته ان کي معاف نه ڪيو ويندو. جيڪي مئل سياست کي بحال ڪرڻ جي ڪوشش ڪري رهيا آهن انھن کي ٻڌائڻ چاھيان ٿو ته اهو دور گذري چڪو آهي ھاڻي توهان هن شهر کي يرغمال نٿا بڻائي سگهو، توهان بدمعاشي ذريعي ماڻهن جي ملڪيت کي نقصان نه ٿا پهچائي سگهو. هن چيو ته خيرپور ۾ قتل ٿيل صحافي اي ڊي شر جي قتل جا سبب صحافتي ذميواريون نه پر ذاتي آهن. شروعاتي جاچ ۾، سندس ويجهي دوست صحافي نياز دستي عرف نياز بادامي کي گرفتار ڪيو ويو. سندس ڪپڙن تي رت جا داغ پڻ مليا آهن. مقتول جي موٽرسائيڪل واقعي واري هنڌ کان هڪ ڪلوميٽر پري هٿ ڪئي وئي. سنڌ پوليس قتل ڪيس ۾ ملوث جوابدارن کي ٻن ڏينهن اندر گرفتار ڪري ورتو آهي. قتل ڪيس ۾ پنج مرد ۽ هڪ عورت کي گرفتار ڪيو ويو آهي. مقتول صحافي جي قاتلن کي انصاف جي ڪٽهڙي ۾ آندو ويندو.هڪ سوال جي جواب ۾ هن چيو ته پريس ڪانفرنس ۾ وڳوڙن جي ڌمڪي ڏيندڙ هاڻي ماڻهن کي بچائڻ لاءِ ڇو نه ٿا اڇن؟ اهي ماڻهن کي تشدد لاءِ استعمال ڪن ٿا. هڪ ٻئي سوال جي جواب ۾ سينئر وزير شرجيل انعام ميمڻ چيو ته پاڪستان پيپلز پارٽي قومي اسيمبلي ۾ ڪينالن خلاف قرارداد پيش ڪئي، ان وقت پي ٽي آءِ بائيڪاٽ جو بهانو ڪري اسيمبلي اجلاس مان ھلي وئي. 10 اپريل تي، پي ٽي آءِ هن مسئلي تي هڪ قرارداد پيش ڪئي. ڪينال جي مسئلي تي اسان جو قرارداد اڳ ۾ ئي موجود آهي، پي ٽي آءِ کي ان جي حمايت ڪرڻ گهرجي. هڪ ٻئي سوال جي جواب ۾، هن چيو ته سياسي طور تي هر ڪنهن کي ريليون ڪڍڻ جو حق آهي، پر ڪنهن کي به تشدد جو رستو اختيار ڪرڻ جو حق ناهي. جيڪو به تشدد جو مظاهرو ڪندو ان خلاف قانون حرڪت ۾ ايندو.
