اسلام آباد(بيورو رپورٽ) سوئي گئس ڪمپنين ايندڙ مالي سال کان گئس جون قيمتون وڌائڻ جي درخواست ڪئي آهي.سوئي ناردرن گئس جي قيمتن ۾ سراسري طور تي 735.59 رپيا في ايم ايم بي ٽي يو واڌ جو مطالبو ڪيو آهي، جڏهن ته سوئي سدرن گئس جي قيمتن ۾ 2,443 رپيا في ايم ايم بي ٽي يو واڌ جو مطالبو ڪيو آهي، جنهن ۾ پوئين شارٽ فال به شامل آهي. ان کان علاوه، گئس ڪمپنين مالي سال 2025-26 لاءِ مالي گهرجن لاءِ درخواستون پڻ جمع ڪرايون آهن.سوئي ناردرن 700 ارب 97 ڪروڙ رپين جي مالي ضرورتن کي پورو ڪرڻ ۽ 207 ارب 435 ڪروڙ رپين جي گهٽتائي جي وصولي جي درخواست ڪئي.ان سان گڏ، سوئي ناردرن پڻ گئس جي سراسري قيمت 100 رپيا 2485.72 في ايم ايم بي ٽي يو مقرر ڪرڻ جي درخواست ڪئي آهي. سوئي سدرن 883 ارب 544 ملين رپين جي مالي ضرورتن جي وصولي ۽ 44 ارب 332 ملين رپين جي گهٽتائي جي درخواست ڪئي آهي، جڏهن ته سوئي سدرن گئس جي سراسري قيمت 4137.49 رپيا في ايم ايم بي ٽي يو مقرر ڪرڻ جي به درخواست ڪئي آهي.اختيارين موجب، سوئي ناردرن جي درخواست تي ٻڌڻيون 18 ۽ 28 اپريل تي لاهور ۽ پشاور ۾ ٿينديون، جڏهن ته سوئي سدرن جي درخواست تي ٻڌڻيون 21 ۽ 23 اپريل تي ڪراچي ۽ ڪوئيٽا ۾ ٿينديون.
