ڪراچي (اسٽاف رپورٽر)ڪراچي ۾ ڳري ٽرئفڪ سبب ٿيندڙ حادثن کي روڪڻ لاءِ ڳري ٽرئفڪ لاءِ رفتار جي حد 30 ڪلوميٽر في ڪلاڪ مقرر ڪئي وئي آهي ۽ ڊرائيورن لاءِ منشيات جا ٽيسٽ لازمي قرار ڏنا ويا آهن.ڪراچي ۾ سنڌ جي وڏي وزير مراد علي شاهه جي صدارت هيٺ ٽريفڪ جي مسئلن تي اجلاس ٿيو، جنهن ۾ صوبائي وزير سعيد غني، مڪيش ڪمار چاولا، ضيا لنجار، ۽ ڪراچي جي ميئر مرتضيٰ وهاب سميت ٻين عملدارن شرڪت ڪئي.اجلاس ۾ بريفنگ ڏيندي آءِ جي سنڌ چيو ته 2024 ۾ ڪراچي ۾ 16 لک کان وڌيڪ چالان جاري ڪيا ويا، 1.33 ارب رپين جو جرمانو وصول ڪيو ويو، 512 هزار کان وڌيڪ گاڏين خلاف ڪارروائي ڪئي وئي ۽ 11 هزار 287 ڊرائيورن کي حراست ۾ ورتو ويو، جڏهن ته ڊرائيورن خلاف 650 ايف آءِ آر داخل ڪيون ويون ۽ 7 هزار 555 فٽنيس سرٽيفڪيٽ رد ڪيا ويا. ان موقعي تي سنڌ جي وڏي وزير چيو ته شهر ۾ وڌندڙ روڊ حادثن تي کيس تمام گهڻو ڏک ٿيو آهي، ۽ ٽريفڪ ۽ ضلعي پوليس کي روڊ حادثن کي روڪڻ لاءِ گڏجي ڪم ڪرڻ گهرجي.انساني جانين جو نقصان ناقابل برداشت آهي، مائرن جون هنجون خالي ٿي رهيون آهن، وڏي وزير اختيارين کي هدايت ڪئي ته سڀني ڳري گاڏين جي آپريٽرن جي ڊرائيونگ لائسنسن جي جانچ ڪئي وڃي ۽ سڀني وڏين گاڏين ۾ ٽريڪر ۽ ڊيش ڪيم لڳائڻ کي لازمي بڻايو وڃي. مراد علي شاهه چيو ته ڪراچي ۾ ڳري ٽرانسپورٽ گاڏين جي رفتار جي حد 30 ڪلوميٽر في ڪلاڪ هوندي، ٽرانسپورٽ ڊپارٽمينٽ، ايڪسائيز، لائسنسنگ اٿارٽي، ٽرئفڪ پوليس ۽ نادرا کي ڳنڍيو ويندو، ۽ ٽرئفڪ قانونن جي اثرائتي ۽ مربوط عملدرآمد کي ممڪن بڻايو وڃي.سنڌ جي وڏي وزير چيو ته ٽريفڪ انجنيئرنگ بيورو کي ٻيهر منظم ڪيو ويندو ۽ ميئر جي ماتحت رکيو ويندو، ڊرائيونگ لائسنس حاصل ڪرڻ کان اڳ ڊرائيورن لاءِ بين الاقوامي معيار جي تربيت لازمي هوندي، جڏهن ته غير قانوني نمبر پليٽن، رنگين درين ۽ غير مجاز سائرن ۽ لائيٽن خلاف ڪريڪ ڊائون ڪيو ويندو.ترجمان موجب، سنڌ جي وڏي وزير انهن موٽرسائيڪل سوارن خلاف ڪارروائي جي هدايت پڻ ڪئي جيڪي هيلمٽ استعمال نه ڪندا آهن ۽ ٽي ڀيرا سواري ڪندا آهن.مراد علي شاهه چيو ته جن گاڏين جا فٽنيس سرٽيفڪيٽ رد ڪيا ويا آهن انهن کي ضبط ڪيو وڃي ۽ انهن گاڏين جي ٻيهر لائسنسنگ ٽرانسپورٽ کاتي جي تابع هوندي.ترجمان موجب، سنڌ جي وڏي وزير ڳري ۽ هلڪي گاڏين جي ڊرائيورن لاءِ منشيات جي جانچ کي لازمي قرار ڏنو آهي.مراد علي شاهه فيصلن تي فوري طور تي عمل درآمد لاءِ هڪ اعليٰ سطحي ڪميٽي قائم ڪئي، جيڪا آءِ جي پوليس جي نگراني ۾ هوندي.
