انقره(ويب ڊيسڪ)ترڪيءَ اسرائيلي وزيراعظم بينجمن نيتن ياهو لاءِ عالمي گرفتاري وارنٽ جي درخواست ڪري ڇڏي آهي، جنهن ۾ مٿس غزه لاءِ امدادي ٻيڙين جي قافلي کي روڪڻ سان لاڳاپيل ”نسل ڪشي“ جو الزام لڳايو ويو آهي، ترڪيءَ جي انصاف واري وزير جمعي ڏينهن ٻڌايو.
ترڪي غزه ۾ اسرائيل جي جنگ جو سخت ترين نقاد بڻجي چڪو آهي. اها جنگ 7 آڪٽوبر 2023ع تي حماس پاران اسرائيل تي ڪيل حملن کانپوءِ شروع ٿي هئي. ترڪيءَ جو صدر رجب طيب اردوان ڪيترائي ڀيرا نيتن ياهو تي ”نسل ڪشي“ جو الزام لڳائي چڪو آهي.
مئي ۾ اسرائيل پاران تقريبن 430 ڪارڪنن کي کڻي ويندڙ 50 امدادي ٻيڙين جي قافلي کي روڪڻ تي عالمي سطح تي سخت ردعمل سامهون آيو هو. اسرائيل انهن کي قيد رکي ناروا سلوڪ ڪيو هو. فرانس، اٽلي ۽ آسٽريليا پڻ ان معاملي تي عدالتي ڪارروائي شروع ڪري چڪا آهن.
ترڪيءَ جي انصاف واري وزير اڪين گرلڪ جمعي ڏينهن ايڪس تي ٻڌايو ته سندس وزارت گهرو وزارت کي درخواست ڪئي آهي ته نيتن ياهو ۽ هڪ ٻئي اسرائيلي شهري، جنهن جو نالو افيڪ موسڪووچ ٻڌايو ويو آهي، خلاف انٽرپول جا ريڊ نوٽس جاري ڪيا وڃن.
وزير چيو، ”بين الاقوامي پاڻيءَ ۾ فلوٽيلا جي ڪارڪنن تي حملي بابت عدالتي ڪارروائي ۽ 14 جولاءِ 2026ع تي بينجمن نيتن ياهو ۽ افيڪ موسڪووچ خلاف ’نسل ڪشي‘ جي الزام تحت جاري ڪيل گرفتاري وارنٽ جي روشنيءَ ۾، انصاف واري وزارت گهرو وزارت کي درخواست ڪئي آهي ته انهن جي عالمي گرفتاري لاءِ ريڊ نوٽس جاري ڪيا وڃن.“
ترڪيءَ جي انصاف واري وزارت موجب نيتن ياهو ۽ موسڪووچ خلاف ”انسانيت خلاف ڏوهن، نسل ڪشي، آزاديءَ کان سنگين محرومي، ’ڄاڻي واڻي حملو ۽ مارڪٽ‘، تشدد، ملڪيتن جي تباهي، سنگين ڦرلٽ ۽ ٽرانسپورٽ جي گاڏين کي اغوا ڪرڻ“ جي الزامن تحت ڪارروائي ڪئي پئي وڃي.
بعد ۾ نيتن ياهو پنهنجي آفيس پاران جاري ڪيل بيان ۾ اردوان کي ”يهود دشمن آمر“ قرار ڏنو ۽ واعدو ڪيو ته اسرائيل ”خطي کي غير مستحڪم ڪرڻ جي ترڪيءَ جي ڪوششن“ خلاف سخت قدم کڻندو رهندو.
بيان ۾ چيو ويو، ”اردوان هڪ يهود دشمن آمر آهي، جنهن ڪردن جو قتل عام ڪيو، حماس جي دهشتگرد تنظيم پاران ڪيل قتل عام جي حمايت ڪري ٿو ۽ پنهنجي ئي عوام تي ظلم ڪري ٿو.“
بيان ۾ وڌيڪ چيو ويو، ”اسرائيل خطي کي غير مستحڪم ڪرڻ جي ترڪيءَ جي ڪوششن ۽ پنهنجي سلامتي لاءِ هر خطري خلاف سختي سان ڪارروائي ڪندو رهندو.“
