ڪراچي(اسٽاف رپورٽر) سنڌ بلڊنگ ڪنٽرول اٿارٽي (SBCA) جي آفيس مان جاري ڪيل باضابطه نوٽيفڪيشنز موجب، حڪومت سنڌ جي لوڪل گورنمينٽ اينڊ ايڇ ٽي پي (HTP) کاتي جي حڪمن جي روشنيءَ ۾ سنڌ بلڊنگ ڪنٽرول اٿارٽي ۾ فوري طور تي ۽ ايندڙ حڪمن تائين ٽائون وار نظام قائم ڪيو ويو آهي. ان سلسلي ۾ آفيسرن ۽ عملي جون مقرريون ۽ بدليون ڪيون ويون آهن. هن انتظامي فيصلي جو مقصد عمارتن جي ڪنٽرول واري نظام کي وڌيڪ بهتر بڻائڻ، غيرقانوني اڏاوتن جي روڪٿام، ڪارڪردگيءَ ۾ تيزي آڻڻ ۽ ٽائون سطح تي معاملن کي شفاف نموني هلائڻ آهي. جن ٽائونز ۾ آفيسرن (ڊائريڪٽرن، ڊپٽي ڊائريڪٽرن، اسسٽنٽ ڊائريڪٽرن، سينيئر بلڊنگ انسپيڪٽرن ۽ بلڊنگ انسپيڪٽرن) کي مقرر ڪيو ويو آهي، انهن ۾ هيٺيان ٽائون شامل آهن: بلديه ٽائون ۽ چنيسر ٽائون ،گڊاپ ٽائون ۽ مومن آباد، موريو ميربحر ۽ ناظم آباد، نارٿ ڪراچي ۽ نارٿ ناظم آباد، اورنگي ٽائون ۽ صدر، صفورا ۽ شاهه فيصل ٽائون، سهراب ڳوٺ ۽ گلبرگ، گلشن اقبال ۽ ابراهيم حيدري، جناح ٽائون ۽ ڪورنگي، لانڍي ۽ لياقت آباد، لياري ۽ ملير، منگهوپير ۽ موريپور / ماڙيپور ۽ ماڊل ڪالوني جي لاڳاپيل آفيسرن کي هدايت ڪئي وئي آهي ته اهي فوري طور تي پنهنجون نيون ذميواريون سنڀالين. هن قدم سان عمارتن بابت ضابطن تي عملدرآمد کي يقيني بڻائڻ ۽ عوامي شڪايتن جو ترت ازالو ڪرڻ ۾ مدد ملندي.
