ڪراچي )اسٽاف رپورٽر) رٿابندي ۽ ترقيءَ واري کاتي جي صوبائي وزير ڄام خان شووري چيو آهي ته سنڌ حڪومت نيشنل ايس ڊي جيز انويسٽمنٽ فيئر ۾ تقريبن 562 ملين آمريڪي ڊالرن جي ماليت جا 7 سيڙپڪاري منصوبا پيش ڪيا آهن، جن جو مقصد عوامي انفراسٽرڪچر، ٽرانسپورٽ ۽ بنيادي سهولتن جي شعبن ۾ سيڙپڪاريءَ جا موقعا پيدا ڪرڻ آهي. هن چيو ته سنڌ ۾ پاڻيءَ جي فراهميءَ جي چئلينجن سان منهن ڏيڻ، آبي وسيلن جي بهتر انتظام ۽ ترقياتي منصوبن لاءِ نجي شعبي ۽ ترقياتي ڀائيوارن جي سيڙپڪاري وڏي اهميت رکي ٿي. تقريب ۾ پلاننگ اينڊ ڊولپمينٽ جو چيئرمين نجم شاهه، آبپاشي سيڪريٽري ظريف کيڙو، بلوچستان جا عملدار ۽ ٻيا اعليٰ عهديدار شريڪ هئا. نيشنل ايس ڊي جيز انويسٽمنٽ فيئر جي پڄاڻي تقريب کي خطاب ۽ بعد ۾ ميڊيا سان ڳالهه ٻولهه ڪندي ڄام خان شووري چيو ته ٻن ڏينهن واري هن فيئر ترقياتي ضرورتن کي سيڙپڪاريءَ جي موقعن ۽ مالياتي حل سان جوڙڻ لاءِ هڪ اهم پليٽفارم فراهم ڪيو، جتي منصوبا جوڙيندڙ ادارن، سيڙپڪارن، مالياتي ادارن ۽ ترقياتي ڀائيوارن وچ ۾ سڌوسنئون رابطا ۽ ٻولين جا عمل ٿيا. هن چيو ته سنڌ ۾ عوامي انفراسٽرڪچر ۽ خدمتن جي منصوبن ۾ پبلڪ پرائيويٽ پارٽنرشپ جو مضبوط تجربو موجود آهي. ملير ايڪسپريس وي، ريورائين فاريسٽري، ڊيلٽا بليو ڪاربن، شاهراهه ڀٽو ۽ ٿر ڪول پروجيڪٽ ان جون نمايان مثالون آهن. انهن منصوبن مان ظاهر ٿئي ٿو ته مناسب منصوبه بندي ۽ اثرائتي ڀائيواريءَ ذريعي عوامي ضرورتن کي سيڙپڪاريءَ جي اهل منصوبن ۾ تبديل ڪري سگهجي ٿو. پاڻيءَ جي فراهميءَ جي مسئلن تي گفتگو ڪندي سنڌ جي منصوبه بندي ۽ ترقيءَ جي وزير چيو ته ڪراچيءَ کي ڪينجهر ڍنڍ مان تقريبن 100 کان 150 ڪلوميٽر پري کان پاڻي فراهم ڪيو ويندو آهي، جڏهن ته صوبي جا وڏا شهر سنڌو نديءَ جي ٻنهي پاسن تي آباد آهن ۽ سنڌ جي پاڻيءَ جي ضرورتن جو وڏو انحصار سنڌو نديءَ تي آهي. نديءَ ۾ پاڻيءَ جي کوٽ سان صوبي ۾ پاڻيءَ جي فراهميءَ جا مسئلا وڌي ويندا آهن. هن چيو ته سنڌ ۾ ٽيوب ويلن جو تعداد هڪ لک کان گھٽ آهي، جڏهن ته سندس بيان موجب پنجاب ۾ تقريبن 14 لک ٽيوب ويل موجود آهن. هن سنڌو نديءَ ۾ آلوده پاڻيءَ جي آمد ۽ ڪوٽڙي بئراج تي پاڻيءَ ۾ حل ٿيل نمڪيات (TDS) جي وڌندڙ سطح تي پڻ ڳڻتيءَ جو اظهار ڪيو ۽ چيو ته پاڻيءَ جي معيار ۽ فراهميءَ بابت مسئلن تي اثرائتا قدم کڻڻ جي ضرورت آهي. ڄام خان شووري چيو ته برسات جي پاڻيءَ کي ذخيرو ڪرڻ ۽ استعمال ۾ آڻڻ جي منصوبن ۾ سيڙپڪاري پڻ هڪ اهم چئلينج آهي. رين واٽر هارويسٽنگ جي منصوبن کي اثرائتي انداز ۾ اڳتي وڌائڻ لاءِ مالياتي وسيلن، مناسب منصوبه بندي ۽ سيڙپڪاريءَ جا نوان طريقا اختيار ڪرڻا پوندا. هن چيو ته پائيدار ترقيءَ جي مقصدن (SDGs) جي حاصلات لاءِ صرف سرڪاري بجيٽ تي انحصار ڪافي ناهي، بلڪه نجي سيڙپڪاري، ترقياتي فنانسنگ، موسمياتي فنانس ۽ پبلڪ پرائيويٽ پارٽنرشپ کي اثرائتي نموني ڪم ۾ آڻڻو پوندو. سندس موجب هر منصوبي جي نوعيت لحاظ کان مناسب مالياتي ماڊل اختيار ڪرڻ ضروري آهي تڏهن ئي منصوبن جي پڄاڻي ۽ عوام کي بهتر سهولتن جي فراهمي يقيني بڻائي سگهجي ٿي. رٿابندي ۽ ترقيءَ کاتي واري وزير چيو ته سنڌ حڪومت منصوبن جي تياري، شفاف طريقيڪار ۽ سيڙپڪاريءَ لاءِ سازگار ادارجاتي نظام کي بهتر بڻائڻ تي توجهه ڏئي رهي آهي. هن واضح ڪيو ته سيڙپڪاري فيئر جي اصل ڪاميابي تڏهن ٿيندي جڏهن پيش ڪيل منصوبا عملي ڀائيواري، سيڙپڪاري، روزگار جي موقعن ۽ بهتر عوامي خدمتن ۾ تبديل ٿيندا. ڄام خان شووري سيڙپڪارن، مالياتي ادارن ۽ ترقياتي ڀائيوارن کي سنڌ ۾ سيڙپڪاريءَ جي موقعن مان فائدو حاصل ڪرڻ جي دعوت ڏيندي چيو ته صوبائي حڪومت منصوبن کي عملي شڪل ڏيڻ لاءِ لاڳاپيل ادارن سان سهڪار جاري رکندي.
