لاهور (ويب ڊيسڪ) لاهور هاءِ ڪورٽ جي جسٽس سيد فرھاد علي شاهه غيرت جي نالي تي قتل واري مقدمي ۾ ڌرين وچ ۾ ٿيل راضي نامو (صلح) مسترد ڪندي نامزد ملزمان محمد ناصر ۽ پرويز جون ضمانت واريون درخواستون خارج ڪري ڇڏيون آهن. ملزمان تي 18 ورھين جي نجماں مائيءَ کي غيرت جي نالي تي فائرنگ ڪري قتل ڪرڻ جو الزام آهي.عدالت پنهنجي فيصلي ۾ قانوني نڪتو واضح ڪندي قرار ڏنو ته غيرت جي نالي تي قتل هڪ ناپذيرِ راضي نامو (غير قابلِ صلح) جرم آهي، ان ڪري اهڙي مقدمي ۾ راضي نامو ملزم کي ضمانت حاصل ڪرڻ جو ڪو به حق نٿو ڏئي. جسٽس سيد فرھاد علي شاهه وڌيڪ چيو ته نه ملڪي قانون ۽ نه ئي مذهب ڪنهن شخص کي نام نهاد غيرت جي نالي تي ڪنهن جي جان وٺڻ جي اجازت ڏئي ٿو، ۽ اهڙو عمل آئين جي آرٽيڪل 9 ۾ ڏنل زندگيءَ ۽ آزاديءَ جي بنيادي حق جي سخت منافي آهي.
