ڪراچي(پ ر)پاڪستان انسٽيٽيوٽ آف پبلڪ فنانس اڪائونٽنٽس (پيفا) جي 17هين گريجوئيشن تقريب آءِ بي اي آڊيٽوريم، صدر ڪيمپس، ڪراچي ۾ منعقد ٿي، جنهن ۾ اٽڪل 100 گريجوئيٽس ۽ پوزيشن هولڊرز کي سندون ۽ انعام ڏنا ويا. تقريب ۾ گريجوئيٽس، سندن خاندانن، فيڪلٽي ميمبرن، بورڊ آف گورنرز جي ميمبرن، اڪائونٽنسي جي شعبي جي سينيئر ماهرن ۽ سرڪاري عملدارن شرڪت ڪئي.
تقريب سان مهمانِ خاص طور خطاب ڪندي جناب ميانداد راهوجو گريجوئيٽس ۽ پوزيشن هولڊرز کي مبارڪباد ڏني. هن سندن ڪاميابي جي پويان والدين ۽ خاندانن جي قربانين ۽ سهڪار کي به خراج تحسين پيش ڪيو. هن چيو ته پيفا 1993ع ۾ آءِ سي اي پي، آءِ سي ايم اي پاڪستان ۽ آڊيٽر جنرل آف پاڪستان جي کاتي گڏجي قائم ڪيو. هن ٻڌايو ته پيفا انٽرنيشنل فيڊريشن آف اڪائونٽنٽس (IFAC) جو مڪمل ميمبر آهي ۽ پاڪستان ۾ پبلڪ فنانس ۾ مهارت رکندڙ واحد پروفيشنل اڪائونٽنسي ادارو آهي. هن وڌيڪ چيو ته گريجوئيٽس هاڻي 9 هزار 300 کان وڌيڪ ميمبرن ۽ لڳ ڀڳ 39 هزار شاگردن جي برادريءَ جو حصو بڻجي رهيا آهن.
هن وڌيڪ چيو ته بجيٽ جي هر مد جي پويان ڪو انساني مقصد هوندو آهي، اهو اسڪول هجي، اسپتال هجي يا ڪنهن سرڪاري ملازم جي پگهار. هن چيو ته جڏهن عوامي پئسو ايمانداريءَ سان استعمال ٿئي ٿو ته اهو رستن، ڪلاس رومن، صاف پاڻي ۽ شهرين جي عزت ۾ بدلجي وڃي ٿو. هن گريجوئيٽس کي تلقين ڪئي ته هو پنهنجي ڪم کي قومي خدمت سمجهن، جيڪا شهري جي هڪ هڪ رپئي جي حفاظت ڪري ٿي.
پيفا جي بنيادي قدرن تي زور ڏيندي هن ايمانداريءَ کي هڪ پروفيشنل جي اصل قابليت قرار ڏنو. هن چيو ته “توهان جي صحيح توهان جي ساک آهي، ۽ ساک ئي اهو واحد اثاثو آهي جيڪو هڪ دفعو وڃائجي وڃي ته وري ٺهي نٿو سگهي.” هن نوجوان ماهرن کي ياد ڏياريو ته عوامي پئسو سڀ کان وڏي امانت آهي، ڇو ته اهو هر شهري جو آهي.
شعبي ۾ اچي رهيل تبديلين تي ڳالهائيندي جناب راهوجو انٽيگريٽيڊ فنانشل مئنيجمينٽ سسٽمز، اي پروڪيورمينٽ، ڊيٽا اينالٽڪس، آرٽيفيشل انٽيليجنس ۽ IPSAS ۽ IFRS جهڙن بين الاقوامي معيارن جو ذڪر ڪيو. هن گريجوئيٽس کي سکڻ جو سلسلو جاري رکڻ ۽ مضبوط پيشه ورانه فيصلي جي صلاحيت پيدا ڪرڻ جي تلقين ڪئي. هن چيو ته بهتر بجيٽ سازي، مضبوط اندروني ڪنٽرول، بروقت آڊٽ ۽ شفاف خريداري پاڪستان جي مالي چئلينجن کي منهن ڏيڻ لاءِ ضروري آهن. هن وڌيڪ چيو ته سنڌ کي سرڪاري ۽ نجي ٻنهي شعبن ۾ فرض شناس ماهرن جي ضرورت آهي.
هن گريجوئيٽس کي صلاح ڏني ته هو وقت جا پابند ۽ ڀروسي جوڳا بڻجن، مالي ۽ خريداري جا ضابطا پاڻ پڙهن، مڪمل دستاويزي رڪارڊ رکن، پنهنجي جونيئرن جي رهنمائي ڪن ۽ عاجزي اختيار ڪن. هن ايمانداريءَ جي بنياد تي هڪ مضبوط پروفيشن جوڙڻ لاءِ پيفا جي قيادت، فيڪلٽي ۽ عملي جي ڪوششن کي ساراهيو.
تقريب کي پيفا جي صدر جناب عثمان احسن به خطاب ڪيو، جڏهن ته پيفا جي ايگزيڪيوٽو ڊائريڪٽر جناب امداد علي شيخ به تقريب ۾ موجود هئا. تقريب يادگاري تحفن جي پيشڪش، گروپ فوٽو ۽ شڪريي جي ڪلمن سان پڄاڻيءَ تي پهتي.
