راولپنڊي (ويب ڊيسڪ) خيبرپختونخوا جي اتر وزيرستان ۾ سيڪيورٽي فورسز پاران انٽيليجنس بنياد تي ڪارروائي دوران فتنه الخوارج جي 4 اهم ڪمانڊرن سميت 9 دهشتگرد مارجي ويا.سيڪيورٽي ذريعن موجب فورسز اتر وزيرستان جي علائقن پلنگ زئي، نديم ڪوٽ ۽ ڪوٽ خضري ۾ فتنه الخوارج خلاف آپريشن ڪيو، جنهن دوران 9 دهشتگرد مارجي ويا. ذريعن موجب مارجي ويل اهم دهشتگرد ڪمانڊرن ۾ خارجي خالد رضا، خارجي ڪامران، خارجي موسىٰ ۽ خارجي مفتوم شامل آهن. سيڪيورٽي ذريعن جو چوڻ آهي ته ڪارروائي دوران مارجي ويل دهشتگردن وٽان وڏي مقدار ۾ هٿيار ۽ گولا بارود پڻ هٿ ڪيو ويو، جڏهن ته آپريشن دوران فتنه الخوارج جا ڪيترائي ٺڪاڻا پڻ تباهه ڪيا ويا. هوڏانهن صدرِ مملڪت آصف علي زرداري اتر وزيرستان ۾ فتنه الخوارج خلاف ڪامياب ڪارروائي تي سيڪيورٽي فورسز کي خراجِ تحسين پيش ڪيو آهي. پنهنجي بيان ۾ صدر چيو ته 4 اهم ڪمانڊرن سميت 9 دهشتگردن جو خاتمو سيڪيورٽي فورسز جي پيشوراڻي صلاحيت ۽ بهادري جو ثبوت آهي. هن چيو ته دهشتگردن جي پرڏيهي سرپرستن ۽ سندن مقامي سهولتڪارن جون سموريون سازشون ناڪام بڻايون وينديون. آصف علي زرداري وڌيڪ چيو ته فتنه الخوارج خلاف عزمِ استحڪام تحت ڪارروايون دهشتگردي جي مڪمل خاتمي تائين جاري رهنديون.
