کٽمنڊو(ويب ڊيسڪ)نيپال ۽ تبت جي سرحد تي آيل اوچتي وڏي ٻوڏ ۾ فوتين جو انگ 177 ٿي ويو آهي. بي بي سي موجب رڳو نيپال ۾ 517 فارينرز سميت 800 کان مٿي ماڻهو لاپتا آهن. جڏهن ته رائٽرز موجب چين ۽ نيپال ۾ لاپتا ماڻهن جو انگ 1500 کان مٿي آهي جن ۾ 700 کان وڌيڪ فارينرز شامل آهن. ٻوڏ کان پوءِ امدادي ڪارڪن بچيل ماڻهن جي ڳولا ڪري رهيا آهن. تيز رفتار مٽي ۽ پاڻي جي وهڪري سبب گهر تباهه ٿي ويا، رستا پاڻي هيٺ اچي ويا ۽ پلون لڙهي ويون آهن.
نيپال ۾ 800 کان وڌيڪ ماڻهو گم آهن ۽ هينئر تائين گهٽ ۾ گهٽ 177 لاش هٿ آيا آهن. برسات ۽ علائقي جي ڏکئي جاگرافي سبب امدادي ڪارروايون وڌيڪ مشڪل بڻجي ويون آهن. هيليڪاپٽر ذريعي بچايل هڪ شخص چيو: ”منهنجي زال اڃا به ڪٿي نه ڪٿي مٽيءَ جي ڍير هيٺان دٻيل آهي.“
تبت ۾ گهٽ ۾ گهٽ 558 ماڻهو گم آهن، جڏهن ته ٽن ماڻهن جي فوت ٿيڻ جي تصديق ٿي چڪي آهي. اڃا اهو واضح ناهي ته تبت ۽ نيپال جي گم ٿيل ماڻهن بابت انگ اکر هڪ ٻئي سان اوورليپ ڪن ٿا يا نه.
آمريڪي جيولوجيڪل سروي موجب، گليشيئر جي هڪ حصي جي ٽٽڻ ۽ ملبو لڙهي اچڻ سبب هي ٻوڏ آئي. ماهرن کي خدشو آهي ته دريائن ۾ گڏ ٿيل ملبو هڪ ٻي ٻوڏ جو سبب بڻجي سگهي ٿو.
ٻوڏ سبب 517 غير ملڪي سياح لاپتا آهن، نيپال
نيپال جي سياحت واري بورڊ جي تازي انگن اکرن موجب، هن وقت تائين گهٽ ۾ گهٽ 517 پرڏيهي شهري گمشدہ ماڻهن جي فهرست ۾ شامل آهن. گم ٿيل شهرين جو سڀ کان وڏو انگ هيٺين ملڪن سان تعلق رکي ٿو،ڀارت178 ،آمريڪا65 ،يوڪرين 53 ، ملائيشيا51،آسٽريليا35، برطانيا33 ۽ ڪينيڊا جا 25 شهري شامل آهن.گم ٿيل ڪيترائي پرڏيهي شهري نيپال جي اترين علائقن جي ڏورانهن، پر دلڪش وادين ۾ ٽريڪنگ جي سفرن يا مذهبي زيارتن تي هئا، جيڪي سياحن لاءِ وڏي ڪشش جو مرڪز آهن.
اهو ذهن ۾ رکڻ ضروري آهي ته اهڙين آفتن کان پوءِ، خاص طور تي انهن علائقن ۾ جيڪي اڳ ئي ڏورانهان ۽ پهچ کان ٻاهر هوندا آهن ۽ جتي رابطي جا نيٽ ورڪ متاثر ٿي ويندا آهن، آفت جي مڪمل پيماني جي خبر سامهون اچڻ ۾ ڪيترائي ڏينهن لڳي سگهن ٿا. ڪنهن شخص جو گمشدہ ماڻهن جي فهرست ۾ شامل هجڻ لازمي ناهي ته هو فوت ٿي ويو هجي؛ ممڪن آهي ته هو رڳو اختيارين يا پنهنجي پيارن سان رابطو ڪرڻ جي قابل نه هجي.
