نئين دهلي(ويب ڊيسڪ) ڀارت ۾ پاڪستاني هاءِ ڪميشن موجب، 25 پاڪستاني مهاڻا ڇنڇر ڏينهن ڀارتي جيلن مان آزادي ملڻ کان پوءِ وطن واپس پهچي ويا. اهي لاهور ۾ واگها-اٽاري سرحد ذريعي پاڪستان ۾ داخل ٿيا.
قيدين اميگريشن جون ڪارروايون مڪمل ڪرڻ کان پوءِ سرحد پار ڪئي ۽ کين پاڪستاني اختيارين حوالي ڪيو ويو. پاڪستاني مشن جي عملدارن وطن واپسي جي عمل ۾ سهولت فراهم ڪئي ۽ سرحد تي موجود رهيا.
هاءِ ڪميشن چيو ته، ”پاڪستان حڪومت ڀارتي جيلن ۾ قيد سمورن پاڪستاني شهرين جي آزادي ۽ وطن واپسي لاءِ پنهنجون ڪوششون جاري رکندي.“
وطن واپسي کان پوءِ فشرمين ڪوآپريٽو سوسائٽي 25 مهاڻن جي آزادي تي مڇي ماريندڙ برادري کي مبارڪباد ڏني. سوسائٽي موجب آزاد ٿيل مهاڻن جو تعلق ڪراچي ۽ ٺٽي سان آهي.
بيان ۾ چيو ويو ته، ”فشرمين ڪوآپريٽو سوسائٽي (FCS) مڇي ماريندڙ برادري کي انهن 25 پاڪستاني مهاڻن جي آزادي تي دل جي گهراين سان مبارڪباد پيش ڪري ٿي، جيڪي ڀارتي جيلن ۾ قيد هئا.“
ايف سي ايس وڌيڪ اميد ظاهر ڪئي ته ”آزاد ٿيل مهاڻا پنهنجن گهرن ۽ خاندانن ڏانهن واپس ويندا ۽ معمول جي زندگي ٻيهر شروع ڪندا.“
ايف سي ايس جي ترجمان غلام رسول شيخ موجب وطن واپسي کان پوءِ انهن 25 مهاڻن کي پنجاب رينجرز حوالي ڪيو ويو.
هن مهيني جي شروعات ۾ پاڪستان-ڀارت عوامي فورم فار پيس اينڊ ڊيموڪريسي (PIPFPD)، نيشنل فش ورڪرز فورم (NFF-India)، پاڪستان فشر فوڪ فورم (PFF) ۽ قيد مهاڻن جي خاندانن پاڪستان ۽ ڀارت جي وزيراعظمن کي هڪ خط لکيو هو.
خط ۾ ٻنهي حڪومتن تي زور ڏنو ويو هو ته انهن سمورن قيدين کي فوري طور آزاد ڪري وطن واپس موڪليو وڃي، جيڪي پنهنجون سزائون مڪمل ڪري چڪا آهن ۽ جن جي قوميت جي تصديق لاڳاپيل حڪومتن طرفان ٿي چڪي آهي.
خط ۾ ٻنهي حڪومتن کي اپيل ڪئي وئي هئي ته آزادي جي ڏهاڙي جي تقريبن جي موقعي کي انسانيت، انصاف ۽ عام ماڻهن جي وقار لاءِ گڏيل عزم جو مظاهرو ڪرڻ لاءِ استعمال ڪندي قيدين کي آزاد ڪيو وڃي.
پهرين جولاءِ تي پاڪستان ڀارت تي زور ڏنو هو ته اهي 97 پاڪستاني قيدي آزاد ڪري وطن واپس موڪلي، جيڪي پنهنجون سزائون مڪمل ڪري چڪا هئا. ان وقت پرڏيهي آفيس موجب انهن قيدين ۾ 33 مهاڻا به شامل هئا.
اهو بيان ٻنهي ملڪن وچ ۾ قونصلر رسائي بابت 2008ع جي معاهدي تحت قيدين جي فهرستن جي ڏي وٺ جي موقعي تي جاري ڪيو ويو هو. معاهدي تحت ٻنهي ملڪن کي هر سال هڪ جنوري ۽ هڪ جولاءِ تي هڪ ٻئي جي تحويل ۾ موجود قيدين جون فهرستون هڪ ٻئي سان شيئر ڪرڻيون پونديون آهن.
ڇنڇر ڏينهن وطن واپسي کان اڳ موجود تازي انگن اکرن موجب، پاڪستان ۾ 198 ڀارتي مهاڻا قيد هئا، جڏهن ته ڀارت جي جيلن ۾ 53 پاڪستاني مهاڻا قيد هئا. انهن مان ڪيترائي مهاڻا پنهنجون سزائون مڪمل ڪرڻ کان پوءِ به ڪيترن سالن تائين جيلن ۾ قيد رهندا آيا هئا.
10 ڀارتي مهاڻن جون سزائون 16 جولاءِ 2021ع تي، 115 جون 16 مارچ 2022ع تي، 21 جون 17 نومبر 2022ع تي، 10 جون 31 جنوري 2023ع تي، ۽ 22 مهاڻن جون سزائون 18 جولاءِ 2024ع تي مڪمل ٿي چڪيون هيون.
