ڪراچي (اسٽاف رپورٽر) ڪراچي ۾ بلوچ ڪالوني ايڪسپريس وي ويجهو واقع ڪي-اليڪٽرڪ (K-Electric) جي گرڊ اسٽيشن ۾ لڳل باهه سبب ڪيترن ئي علائقن ۾ بجلي جي فراهمي معطل ٿي وئي.ميڊيا سان ڳالهائيندي چيف فائر آفيسر همايون خان ٻڌايو ته باهه بلوچ ڪالوني گرڊ اسٽيشن جي ٽن پينلز ۾ لڳي؛ انهن پينلز جي مٿان فيول ٽينڪ موجود هئا ۽ جڏهن ٽيم اتي پهتي ته باهه جا شعلا 30 کان 40 فوٽ اوچائي تائين اٿي رهيا هئا.چيف فائر آفيسر همايون خان موجب، اٺن فائر ٽينڊرز ۽ پاڻي جي ٻن ٽينڪرن (واٽر باؤزرز) جي مدد سان باهه تي ضابطو آندو ويو؛ ان واقعي ۾ ڪو به جاني نقصان نه ٿيو ۽ في الحال ”ڪولنگ“ (ٿڌو ڪرڻ) جو عمل جاري آهي.علائقي جي رهواسين جو چوڻ آهي ته باهه سبب منظور ڪالوني، بلوچ ڪالوني، محمود آباد ۽ پي اي سي ايڇ ايس ۾ بجلي جي فراهمي معطل ٿي وئي آهي.بلوچ ڪالوني گرڊ اسٽيشن ٻاهران ميڊيا سان ڳالهائيندي اسسٽنٽ ڪمشنر فيروز آباد، جويريا اقبال تصديق ڪئي ته باهه تي ضابطو آندو ويو آهي ۽ فائر برگيڊ جا اهلڪار واقعي واري هنڌ پهچي باهه وسائي ڇڏي.اسسٽنٽ ڪمشنر ٻڌايو ته واقعي ۾ ڪو به جاني نقصان نه ٿيو ۽ احتياطي قدم طور علائقي جي بجلي جي فراهمي بند ڪئي وئي هئي.
