ڪراچي(اسٽاف رپورٽر) نوابشاهه کان ايندڙ ايمبولينس ايم 9 موٽر وي تي کاهي ۾ ڪرڻ سبب هڪ شخص فوت ٿي ويو.ريسڪيو ذريعن موجب، ڪراچي ۾ ايم 9 موٽر وي تي جمالي پل جي ويجهو نوابشاهه کان ايندڙ هڪ خانگي ايمبولينس ۾ حادثو پيش آيو، جنهن ۾ ايمبولينس روڊ کان لهي وئي ۽ کاهي ۾ ڪري پئي، حادثي جي نتيجي ۾ مريض فوت ٿي ويو ۽ هڪ عورت سميت ٽي ماڻهو زخمي ٿي پيا.ريسڪيو ذريعن موجب، ايمبولينس نوابشاهه کان ڪراچي هڪ مريض کي کڻي آئي هئي، فوت ٿيل شخص جي سڃاڻپ 50 سالن جي علي محمد جي نالي سان ٿي آهي، جڏهن ته زخمين ۾ 26 سالن جو سوگدار، 45 سالن جي مينا ۽ 20 سالن جو وقار شامل آهن.
