اسلام آباد (بيورو رپورٽ)وزيراعظم شهباز شريف اڄ گڏيل عرب امارات جي ٻن ڏينهن جي دوري تي روانو ٿيندو، جتي هو ورلڊ گورنمينٽ سمٽ ۾ شرڪت ڪندو.وزيراعظم گڏيل عرب امارات جي نائب صدر، وزيراعظم ۽ دبئي جي حڪمران شيخ محمد بن راشد المڪتوم جي دعوت تي دورو ڪري رهيو آهي.سربراهي اجلاس ۾ وڏي تعداد ۾ رياستن حڪومت جا سربراهه، عالمي پاليسي ساز ۽ خانگي شعبي جون اهم شخصيتون شرڪت ڪنديون.مارچ 2024 ۾ عهدو سنڀالڻ کان پوءِ وزيراعظم شهباز شريف جو هي يو اي اي جو ٻيو دورو آهي، وزيراعظم سان گڏ هڪ اعليٰ سطحي وفد به هوندو، جنهن ۾ نائب وزيراعظم اسحاق ڊار ۽ ٻيا اهم ڪابينا ميمبر شامل هوندا.وزيراعظم گڏيل معاشي ترقي، ڊجيٽل تبديلي ۽ گورننس سڌارن لاءِ پاڪستان جي ويزن کي اجاگر ڪندو، ۽ ورلڊ گورنمينٽ سمٽ ۾ به اهم خطاب ڪندو.وزيراعظم گڏيل عرب امارات جي قيادت سان ٻطرفي ملاقاتون پڻ ڪندو.وزيراعظم شرڪت ڪندڙ ملڪن جي رياست ۽ حڪومت جي سربراهن ۽ ملٽي نيشنل ڪمپنين جي سربراهن سان پڻ ملاقات ڪندو.
