اسلام آباد(بيورو رپورٽ) پاڪستان جي فوجي ترجمان چيو آهي ته ڀارتي فوج ڪنٽرول لائن تي نيلم ويلي ۾ ڪلسٽر بارود استعمال ڪيو آهي جيڪو جنيوا ڪنوينشن جي خلاف ورزي آهي. فوجي ترجمان مطالبو ڪيو ته عالمي برادري نوٽيس وٺي. آءِ ايس پي آر مان جاري ڪيل بيان ۾ ٻڌايو ويو آهي ته 30 ۽ 31 جولاءِ جي وچ واري رات ڀارتي فوج نيلم وادي ۾ ڪلسٽر بارود استعمال ڪيو جنهن سبب 4 سالن جي ٻار سميت 3 ڄڻا فوت ۽ 11 ٻيا سخت زخمي ٿي ويا هئا. هن چيو ته جنيوا ڪنوينشن ۽ عالمي انساني حقن جي قانون موجب غير فوجي علائقن ۾ ڪلسٽر بارود جي استعمال تي پابندي آهي. ترجمان چيو ته ڀارتي فوج جي اخلاقي پستي جو اهو وڏو ثبوت آهي ۽ عالمي برادري ان جي جاچ ڪري.
