ڪراچي(پ ر) پاڪستان نيشنل شپنگ ڪارپوريشن PNSC خرچ گهٽائڻ لاءِ مختلف ڪمپنين سان ٻه ڌار ڌار مفاهمت جي ياداشت نامن (ايم او يوز) تي صحيحون ڪيون آهن. هڪ ياداشت نامي تي IMGC ۽ وحيد گروپ آف انڊسٽريز جي ڪنسورشيم سان ڏور اوڀر کان پاڪستان تائين کاڄرو تيل کڻي اچڻ لاءِ آهي. پاڪستان هر سال 3 بلين ڊالر کان وڌيڪ جو کاڄرو تيل درآمد ڪري ٿو، جنهن مان وڏو حصو آمريڪي ڊالر ۾ فريٽ چارجز جي مد ۾ ادا ڪيو وڃي ٿو. ايم او يو تي صحيحن سان خوردني تيل جا درآمد ڪندڙ بهتر پوزيشن ۾ هوندا ته جيئن درآمد جي لاڳت ۾ گهٽتائي ٿي سگهي. ان اقدام سان نه رڳو پرڏيهي مٽاسٽا جي بچت ٿيندي پر پاڪستاني مارڪيٽن ۾ خوردني تيل جي معاشي ۽ قابل اعتماد دستيابي کي به يقيني بڻائي سگهبو.
ٻيو ياداشت نامو پاڪستان نيشنل شپنگ ڪارپوريشن ۽ ENAR پيٽروليم ريفائننگ سان ڪيو ويو آهي. جنهن هيٺ ENAR پيٽروليم ۽ ريفائننگ جي سهولت فراهم ڪندي تمام گھٽ اگهه تي سلفر فيول آئل فراهم ڪندي. ان سان ڪارپوريشن کي پرڏيهي بندرگاهن تان اهو تيل کڻڻ واري ڪم جي بچت ٿيندي ۽ خرچ به گهٽبا. اهو بندوبست اهڙي وقت ۾ ٿيو آهي جڏهن پاڪستان پرڏيهي مٽاسٽا واري ناڻي جي شديد کوٽ کي منهن ڏئي رهيو آهي
