مٺي(لیاقت نھڙیو) ٿرپارڪرضلعي جي سول اسپتال ساڍن ٽن ڪروڙ روپين جي قرضي ٿيڻ بعد مريضن کي کاڌو ڏيڻ بند ڪري ڇڏيو، غذائي کوٽ ۽ مختلف بيمارين سبب 3 ٻارڙا فوت ٿي ويا. هلندڙ مهيني جولاء ۾ فوتي ٻارڙن جو انگ 22 ۽ ھلندڙ سال 437 ٿي ويو. هن وقت 100 ٻار اسپتال ۾ داخل آهن. اسپتال جي ذريعن سنڌيار کي ٻڌايو ته سول اسپتال مٺي رڳو مريضن کي کاڌو کارائڻ جي مد ۾ 50 لکن جي قرضي بڻجي وئي آهي ۽ مختلف مدن ۾ جن ۾ دوائون، تيل، گئس، پيٽرل پمپ ۽ گاڏيون ٺھرائڻ جي مد ۾ ٽن ڪروڙن جي قرضي بڻيل آھي. جڏھن ته سمورين سرڪاري اسپتالن ۾ صحت جون سهولتون نه هئڻ ڪري روزانو جي بنياد تي ڪيترائي معصوم ٻارڙا مختلف بيمارين ۾ داخل ڪري حيدرآباد ۽ ڪراچي ريفر ڪيا وڃن ٿا.
جڏھن ته سول اسپتال مٺي جي ٻارن واري وارڊ ۾ داخل ٽي ٻارڙا فوت ٿي ويا آهن، جن ۾ يارنهن مهينن جي ڀرتو ڀيل، جامون ميگهواڙ ۽ ڄام خان راڄڙ جا تازا ڄاول ٻارشامل آهن. اسپتال ۾ علاج جون سهولتون نه آهن ۽ ڏڪاريل ڏيهه واسي پنهنجي جگر جي ٽڪڙن جو علاج ڪرائڻ لاء دربدر ٿي ويا آھن. ٿر مان چونڊيل نمائندا سندن جا مسئلا حل ڪرڻ ۽ ٿر واسين کي صحت جون سهولتون فراهم ڪرڻ ۾ مڪمل ناڪام ويا آھن.
