اسلام آباد: (بيورو) سپريم ڪورٽ منشيات جي وصولي ڪيس ۾ هاءِ ڪورٽ ۽ ٽرائل ڪورٽ جي فيصلي کي ڪالعدم قرار ڏيندي ملزم سردار محمد کي بري ڪرڻ جو حڪم ڏئي ڇڏيو آهي.سپريم ڪورٽ حڪم ڏنو آهي ته جيڪڏهن ملزم ڪنهن ٻئي ڪيس ۾ گهربل نه آهي ته ان کي فوري طور تي آزاد ڪيو وڃي. استغاثه پنهنجو ڪيس ثابت ڪرڻ ۾ ناڪام ٿي وئي، جنهن ڪري سپريم ڪورٽ شڪ جو فائدو ڏيندي ملزم کي آزاد ڪرڻ جو حڪم ڏئي ٿي.جسٽس اشتياق ابراهيم تحريري فيصلي ۾ لکيو ته شاهدن جي بيانن ۾ واضح تضاد آهن. رڪارڊ موجب، پوليس جي شاهدن جي بيانن ۾ ڏوهه واري هنڌ تي پهچڻ جي وقت ۽ جڳهه بابت به فرق آهي، جڏهن ته منشيات جي وصولي کان وٺي ليبارٽري منتقلي تائين محفوظ تحويل جو تسلسل ثابت نه ٿي سگهيو.فيصلي ۾ وڌيڪ چيو ويو آهي ته ڪيس جي فائل جي منتقلي ۾ دير ۽ فرق استغاثه جي ڪيس لاءِ موتمار ثابت ٿيو. ان کان علاوه، جرم جي جاءِ جو نقشو ۽ ڊائري جون داخلائون عدالت ۾ پيش نه ڪيون ويون، جڏهن ته سخت سزا وارن ڪيسن ۾، ثبوت جو معيار پڻ سخت ۽ شڪ کان ٻاهر هجڻ گهرجي.
