لاهور (ويب ديسڪ) عدالت مسلم ليگ (ن) جي گرفتار 58 ڪارڪنن کي پوليس رمانڊ ۾ ڏيڻ جي درخواست رد ڪندي 14 ڏينهن جي جھوڊيشل رمانڊ تي جيل موڪلڻ جو حڪم ڏئي ڇڏيو. جھُڊيشل مئجسٽريٽ حافظ نفيس يوسف جي عدالت ۾ پوليس گرفتار ڪارڪنن کي پيش ڪيو، پوليس جي وڪيل چيو ته هنن کي 8 ڏينهن جي جسماني رمانڊ تي پوليس حوالي ڪيو. ليگي ڪارڪنن جي وڪيل فرهاد علي مخالفت ڪندي چيو ته ڪيس ۾ لاڳو ڪيل 6 قلم ضمانت جوڳا آهن ۽ هن ڪيس ۾ قلم 440 لاڳو نٿو ٿئي، ڇو ته هي ڪنهن کي قتل ڪرڻ يا يرغمال بڻائڻ نه آيا هئا پر هٿين خالي سياسي سرگرمي ۾ شرڪت لاءِ آيل هئا. هن چيو ته هي عدالت آهي نيب جو حڪم هتي نه هلندو. عدالت 58 ئي گرفتار ڪارڪنن کي جيل موڪلي ڇڏيو. ياد رهي ته رائيونڊ ۾ زمين خريدڻ واري ڪيس ۾ جاچ لاءِ 11 آگسٽ تي مريم نواز کي نيب لاهور طلب ڪيو هو ان موقعي تي مسلم ليگي ڪارڪن ۽ اڳواڻ جمع ٿيا هئا ۽ پوليس سان چڪرين بعد کين گرفتار ڪيو ويو هو. جنهن بعد نيب جي چوڻ تي چونگ پوليس ٿاڻي تي مريم نواز سميت 300 مسلم ليگي ڪارڪنن ۽ اڳواڻن تي ڪيس داخل ڪيو ويو هو.
