ڪراچي(ويب ڊيسڪ)اسپين ۽ فرانس جي ٻيلن ۾ لڳل باهه بي قابوبڻيل آهي، موسمياتي تبديلي سبب پيدا ٿيل سخت گرمي جي لهرن جي ڪري باهه ڦهلجي رهي آهي ۽ 2 لک 75 هزار کان وڌيڪ ماڻهو پنهنجا گهر ڇڏڻ تي مجبور ٿي ويا آهن. هن باهه اٽلي ۽ اسڪاٽلينڊ جي ڪجهه علائقن کي به متاثر ڪيو آهي.
وڏي پيماني تي امدادي ڪارروائي: فرانس جي اختيارين باهين تي ضابطو آڻڻ لاءِ فوجي مال بردار جهاز مقرر ڪيو آهي. اسپين جي وزيراعظم پيڊرو سانچيز چيو آهي ته هي هفتيوار موڪلون ٻيلن جي باهين تي ضابطو آڻڻ لاءِ “هڪ اهم موقعو” آهن. يورپي يونين پڻ ٻنهي ملڪن جي مدد لاءِ پنهنجي هنگامي جهازن کي مقرر ڪيو آهي.
موسمياتي بحران: ٻيلن جون باهيون اهڙي سال ۾ لڳيون آهن، جڏهن يورپ ۾ ساڳئي عرصي جي سالياني اوسط جي ڀيٽ ۾ تمام گهڻي زمين سڙي چڪي آهي، جنهن جي تصديق ٻيلن جي باهين بابت انگن اکرن مان ٿئي ٿي. موسمياتي بحران سبب موسم وڌيڪ گرم ۽ خشڪ ٿي رهي آهي، جنهن ڪري باهيون وڌيڪ شديد ٿين ٿيون، جڏهن ته دريائن، ڍنڍن ۽ زمين مان پاڻي گهٽجڻ سبب قدرتي ماحول وڌيڪ سڪي وڃي ٿو.
فرانس جي هڪ وزير سياحن کي خاطري ڪرائيندي اپيل ڪئي آهي ته هو ملڪ جي ڏکڻ اولهه ۾ لڳل شديد باهين باوجود فرانس جا پنهنجا موڪلن وارا منصوبا رد نه ڪن.
اسپين جي گادي واري شهر ميڊرڊ کان ٻاهر روبليدو ڊي چاويلا واري علائقي ۾ ٻيلن جي باهين سان وڙهندڙ فوجي فائر فائٽرن ڇنڇر جي صبح هڪ ڳئون جي ٻچي کي بچائي ورتو، جڏهن ته باهيون اڃا تائين شدت سان جاري آهن.
هڪ فائر فائٽر پهرين گابي تي پاڻي هاري ان کي ٿڌو ڪيو ۽ پوءِ ٻيهر زمين تي لڳل باهيون وسائڻ واري مهم ۾ شامل ٿي ويو.
يورپي ڪميشن جي صدر ارسولا فان ڊير ليئن چيو آهي ته يورپ فرانس ۽ اسپين سان گڏ بيٺو آهي، جيڪي بي قابو باهين کي منهن ڏئي رهيا آهن. هن ٻڌايو ته يورپي يونين پنهنجي هنگامي امدادي ذخيرن مان جهاز ٻنهي ملڪن ڏانهن موڪليا آهن.
هن ايڪس (اڳوڻي ٽوئيٽر) تي لکيو: “تباهه ڪندڙ ٻيلن جي باهين کي منهن ڏيندڙ فرانس ۽ اسپين سان يورپ مڪمل يڪجهتي سان گڏ بيٺو آهي.”
هن وڌيڪ چيو ته يورپي يونين جي ريسڪيو هنگامي امدادي ٻيڙي جا پنج جهاز ۽ ٻه هيليڪاپٽر هن وقت فرانس ۾ ڪم ڪري رهيا آهن، جڏهن ته چار وڌيڪ جهاز اڄ اسپين پهچي رهيا آهن.
ارسولا فان ڊير ليئن چيو: “منهنجون همدرديون انهن بهادر فائر فائٽرن سان آهن، جيڪي باهين سان وڙهي رهيا آهن، ۽ انهن سڀني ماڻهن سان به، جن کي پنهنجا گهر خالي ڪرڻا پيا.”
ٻئي طرف، منتظمن اعلان ڪيو آهي ته ڏکڻ اولهه فرانس ۾ ٻيلن جي باهين وسائڻ لاءِ جاري وسيع امدادي ڪوششن سبب هن سال جي ٽور ڊي فرانس سائيڪل ريس جو آخري مرحلو به مختصر ڪيو ويو آهي.
