نوشهروفيروز)ڊ ر) ايڊيشنل سيشن جج سيد اڪرام الرحمٰن جي عدالت هڪ شهري جي درخواست تي ڦر جي ڏوهه ۾ ايس ايڇ او ۽ اي ايس آءِ درياخان مري سميت 6 پوليس اهلڪارن تي ڪيس داخل ڪرڻ جو حڪم ڏنو آهي. ٻئي پاسي سول جج عدم ثبوت جي بنياد تي 8 جوارين کي آزاد ڪرڻ جو حڪم ڏنو آهي. ايديشنل سيشن جج آڏو وسيم عباس وڳڻ، ايڊووڪيٽ نديم شرمعرفت داخل ڪيل درخواست ۾ چيو آهي ته مان، الهه رکيو ۽ جان محمد ڳوٺ کان درياخان مري اچي رهيا هئاسين ته رستي تي پوليس اهلڪارن اسان کي بيهاريو جتي موجود ايس ايڇ او مجيب الرحمٰن ناريجو، اي ايس آءِ مغل سيال ۽ 4 نامعلوم پوليس اهلڪارن اسان کان ساڍا 26 هزار روڪ ۽ هڪ عدد راڊو گهڙي ڦر ڪرڻ بعد ڌمڪيون ڏنيون ۽ چيو ته ڪنهن کي دانهن ڏني ته توهان تي ڪوڙا ڪيس داخل ڪيا ويندا. عدالت اهڙو موقف ٻڌڻ بعد ايس ايڇ او مجيب الرحمٰن ناريجو، اي ايس آءِ مغل سيال ۽ 4 نامعلوم اهلڪارن تي عدالت ۾ سڌو ڪيس هلائڻ جو فيصلو ٻڌايو. ٻئي پاسي سيڪنڊ سول جج حيدر علي ڀيو جي عدالت جوا کيڏڻ جو ڏوهه ثابت نه ٿيڻ تي 8 جوابدارن کي باعزت بري ڪري ڇڏيو.
درياخان مري ٿاڻي تي سرڪار جي مدعيت ۾ داخل ڪيس ۾ ڄاڻايو ويو هو ته جوابدار فاروق عرف ڪالو وڳڻ، ذوالفقار وڳڻ، الهبچايو وڳڻ، محمد اسلم، فدا حسين، قربان علي، عبدالرحمٰن ۽ شاهنواز درياخان مري لڳ ڳوٺ ڪالو وڳڻ ۾ جوا کيڏي رهيا هئا ته پوليس کي ڏسي فرار ٿي ويا. اڄ اهڙي ڪيس جي عدالت ۾ ٻڌڻي دوران جوابدارن جي وڪيل نديم شر پنهنجا دليل ڏيندي چيو ته منهنجي اصيلن اهڙو ڪو به ڏوهه ناهي ڪيو ۽ سندن مٿان داخل ڪيل ڪيس ڪوڙو آهي. عدالت اهڙو موقف ٻڌڻ بعد جوبدارن کي ڏوهه ثابت نه ٿيڻ تي باعزت بري ڪري ڇڏيو.
