ڪراچي (اسٽاف رپورٽر) موسميات کاتي خبردار ڪيو آهي ته ايندڙ هفتي ڪراچي سميت سنڌ ۾ گرمي وڌي ويندي ۽ شهرين کي گهرجي ته هو گرمي کان بچاءَ لاءِ انتظام ڪن. موسميات کاتي جي ويب سائيٽ تي جاري ڪيل پڌرائي ۾ ڄاڻايو ويو آهي ته پهرين مئي کان 3 مئي تائين گرمي جو پد 40 کان 42 ڊگري سينٽي گريڊ رهڻ جو امڪان آهي ۽ هيٽ اسٽروڪ جا واقعا ٿي سگهن ٿا. مغربي هوائن جو سلسلو گهٽ ٿيڻ ڪري گرمي وڌي ويندي. موسميات کاتي عوام کي صلاح ڏني آهي ته هو اس ۾ رهڻ ۽ خاص ڪري 12 کان 3 وڳي جي وچ ۾ ٻاهر نڪرڻ کان پاسو ڪن، پاڻي وڌ کان وڌ پيئڻ گهرجي ۽ بوتل پاڻ سان گڏ رکو، مٿي تي ڪپڙو رکو يا پي ڪيپ پايو.
