مانجهند (مهراڻ عمراڻي) جيئي سنڌ محاذ (سرور سهتوگروپ) جي مرڪزي باڊي جو اجلاس سن ۾ مرڪزي چيئرمين صوفي حضور بخش جي صدارت هيٺ ٿي گذريو جنهن ۾ فيض الله جوڻيجو، علي نواز ٻٽ، پروفيسر آزاد قاضي، آدم ٻٽ، اختر ڪاڪيپوٽو، سهيل سهتو، اشرف عمراڻي شرڪت ڪئي. اجلاس ۾ سنڌ جي موجوده صورتحال جو جائزو وٺندي موقف اختيار ڪيو ويو ته سنڌ هزارين سالن کان وجود رکي ٿي جنهن خلاف پاڪستان ۾ مختلف وقتن تي سازشون ڪيون وڃن ٿيون. تازو ايم ڪيو ايم، پي ٽي آءِ جي ميمبرن جي حمايت سان آئين جي آرٽيڪل 139 جي شق 4 تحت صوبي کان اختيار کسي مرڪز حوالي ڪرڻ جو بل پيش ڪيو ته جيئن صوبي کي ورهائي سگهجي اهڙي بل جي سخت لفظن ۾مذمت ڪندي ان خلاف مزاحمت پڻ ڪئي ويندي. جڏهن ته جن سنڌ ۽ قومي اسيمبلي جي ميمبر بل جي مخالفت ڪئي انهن جي واکاڻ ڪيون ٿا. اجلاس ۾ پي ٽي آءِ کي انتباه ڪيو ويو ته سنڌ دشمن منصوبن جو حصو نه بڻجي اجلاس ۾ ساڃاه وندن ۽ قومپرستن سان رابطا ڪري اتفاق راءِ پيدا ڪري گڏيل موقف اختيار ڪرڻ جو فيصلو ڪيو ويو. اجلاس ۾ پارٽي جي اڳوڻي چيئرمين مرحوم سرور سهتو جي 3 ورسي 6 نومڀر تي سندس اباڻي ڳوٺ بڌڪ جڏهن ته مرحوم قاسم پٿر جي ورسي 22 ڊسمبر تي بٺورو ۾ ملهائڻ جو فيصلو ڪيو ويو. پارٽي جي مرڪزي نيشنل ڪانگريس جو اجلاس دادو ۾ 16 ڊسمبر تي ٿيندو.
