ڪراچي (اسٽاف رپورٽر) اڳوڻي صدر آصف علي زرداري جي نجي اسپتال ۾ انجيو پلاسٽي ٿيڻ جو امڪان آهي. ڪجهه ڏينهن اڳ ضمات تي آزاد ٿيندڙ اڳوڻي صدر آصف علي زرداري جو ڪالهه ڪراچي جي هڪ نجي اسپتال ۾ طبئي معائنو ڪيو ويو. آصف علي زرداري ڪراچي جي هڪ نجي اسپتال ۾ داخل آهي جتي ڊاڪٽر نديم قمر جي سربراهي ۾ ڊاڪٽرن جي ٽيم ان جي طبيعت کي مسلسل مانيٽر ڪري رهيا آهن. وزيراعليٰ سنڌ مراد علي شاهه ۽ وزير صحت عذره پيچوهو ميڊيڪل بورڊ سان رابطي ۾ آهن. ذريعن جو چوڻ آهي ته آصف علي زرداري جي طبيعت ۾ بهتري اچي رهي آهي ۽ هو پاڻ گهڻي عرصي کان پوءِ گهر ۾ آرام ڪرڻ سان طبيعت ۾ بهتري محسوس ڪري رهيو آهي. ڊاڪٽرن جي ٽيم اڄ به ان جو تفصيلي طبي معائنو ڪيو ۽ ان جا ضروري ٽيسٽ ورتا جڏهن ته انجيو پلاسٽي لاءِ ڊاڪٽرن جي مشاورت جاري آهي. واضح رهي ته آصف زرداري ضمانت تي آزاد ٿيڻ بعد جمعي تي ڪراچي پهتو هو ۽ ڇنڇر تي ان کي نجي اسپتال ۾ داخل ڪيو ويو هو.
