ڪراچي(ويب ڊيسڪ)هيومن رائٽس ڪميشن آف پاڪستان (ايچ آر سي پي) غير قانوني گرفتارين، حراست ۽ جبري گمشدگين جي لڳاتار ٿيندڙ واقعن تي سخت ڳڻتي جو اظهار ڪيو آهي. ڪميشن موجب هن سلسلي کي “پاڪستان ۾ فوري طور تي روڪيو وڃڻ گهرجي”.
انساني حقن لاءِ ڪم ڪندڙ هن اداري سوشل ميڊيا پليٽ فارم ايڪس تي لکيو آهي ته پشاور يونيورسٽي جي شاگردن حبيب وزير ۽ عدنان وزير جي مبينا گمشدگي، جيڪي 12 نومبر 2025ع تي حڪومت طرفان سڏايل گرينڊ جرگي ۾ شرڪت کان پوءِ لاپتا ٿيا، ان ڳالهه جو مثال آهي ته قانوني تقاضائن کي معمول موجب ڪيئن نظرانداز ڪيو پيو وڃي.
ايچ آر سي پي جي بيان موجب، اڳوڻي قومي اسيمبلي جي ميمبر نثار پنهوار ۽ سندس پٽ محسن پنهوار جي مبينا گمشدگي پڻ انتهائي ڳڻتي جوڳي آهي. اطلاعن مطابق، کين 22 ڊسمبر 2025ع تي ڪراچي مان سادن ڪپڙن ۾ ملبوس ماڻهن کڻي ويا، حالانڪه ان کان اڳ نثار پنهوار جي مختصر آزادي کان پوءِ يقين ڏياريو ويو هو.
ايچ آر سي پي موجب، اهي واقعا بلوچستان ۾ عورتن ۽ ننڍي عمر جي ماڻهن جي حراست سان پڻ لاڳاپيل آهن، جن ۾ معذور شاگردياڻي ۽ ڪارڪن ماه جبين بلوچ سميت گهٽ ۾ گهٽ ڇهه ٻيا ماڻهو شامل آهن، جن کي نومبر ۽ ڊسمبر 2025ع دوران گرفتار ڪيو ويو.
تنظيم جو چوڻ آهي ته “اهڙا قدم آئيني ضمانتن جي ڀڃڪڙي آهن ۽ خاندانن توڙي برادرين کي ناقابلِ تلافي نقصان پهچائين ٿا”.
بيان ۾ وڌيڪ چيو ويو آهي ته “اسين ٻيهر زور ڀريون ٿا ته رياست کي شفافيت يقيني بڻائڻ گهرجي، ذميوارن کي جوابده بڻائڻ گهرجي ۽ متاثر خاندانن کي بغير ڪنهن شرط جي انصاف تائين رسائي فراهم ڪرڻ گهرجي”.
