ڪراچي (اسٽاف رپورٽر)ڪراچي جي صدر علائقي ۾ ايم اي جناح روڊ تي هڪ آتشبازي جي گودام ۾ ڌماڪي ۾ 34 ماڻهو زخمي ٿي پيا، ڌماڪي کان پوءِ گودام مان دونھون نڪري رهيو آهي ۽ فائر برگيڊ جون گاڏيون باهه وسائڻ ۾ مصروف آهن. ڪراچي جي مکيه هاءِ وي ايم اي جناح روڊ تي تاج ڪمپليڪس جي ويجهو هڪ آتشبازي جي گودام ۾ منجهند جو ڌماڪو ٿيو. ڌماڪو ايترو شديد هو جو ان جو آواز پري تائين ٻڌو ويو ۽ آس پاس جي عمارتن جا شيشا ٽٽي ويا. ريسڪيو 1122 جي ترجمان موجب، جيئن ئي سينٽرل ڪمانڊ اينڊ ڪنٽرول ريسڪيو 1122 کي اطلاع مليو، هڪ فائر اينڊ ريسڪيو ٽيم 1 ايمبولينس ۽ 2 فائر برگيڊ ٽرڪن سان گڏ واقعي واري هنڌ پهچي وئي ۽ باهه وسائڻ جي ڪوشش ڪئي پئي وڃي.پوليس اختيارين موجب، ڌماڪي جي نتيجي ۾ 34 ماڻهو زخمي ٿيا آهن، جڏهن ته انهن مان گهڻا شيشي جي ٽڪرن جي ڪري زخمي ٿيا آهن.ٽراما سينٽر ڊاڪٽر روٿ پاؤ سول اسپتال ڪراچي جي ايگزيڪيوٽو ڊائريڪٽر ڊاڪٽر صابر ميمڻ موجب، باهه ۾ زخمي ٿيل اٺ ماڻهن کي ٽراما سينٽر آندو ويو آهي ۽ سڀني جي حالت نازڪ آهي.سنڌ جي وڏي وزير سيد مراد علي شاهه ايم اي جناح روڊ تي هڪ آتشبازي جي گودام ۾ باهه لڳڻ جو نوٽيس ورتو آهي.سنڌ جي وڏي وزير جي ترجمان موجب، سيد مراد علي شاهه هدايت ڪئي آهي ته باهه تي جلد کان جلد ضابطو آڻڻ جي ڪوشش ڪئي وڃي، ته جيئن ڪو به جاني نقصان نه ٿئي.سنڌ جي وڏي وزير ڪمشنر ڪراچي کي هدايت ڪئي آهي ته زخمين کي فوري طور تي طبي امداد فراهم ڪئي وڃي.مراد علي شاهه چيو ته شهر ۽ آبادي جي وچ ۾ ڪنهن به اهڙي مواد جي پيداوار جي اجازت ناهي جيڪا نقصان پهچائي سگهي.سنڌ جي وڏي وزير ڪمشنر ڪراچي کي هدايت ڪئي ته باهه تي ضابطو آڻڻ کان پوءِ ان بابت تفصيلي رپورٽ پيش ڪئي وڃي.
