تهران (ويب ڊيسڪ) پاڪستان پاران ناڪابندي ختم ڪرڻ جي خاطري بعد ايران، آمريڪا سان ڳالهين لاءِ راضي ٿي ويو آهي. صدر ٽرمپ اعلان ڪيو آهي ته جي ڊي وينس جي سربراهي ۾ آمريڪي وفد اسلام آباد روانو ٿي ويو آهي، جيڪو رات دير سان پهچندو. رائٽرز ذريعن جي حوالي سان چيو آهي ته ايراني وفد اڱاري تي صبح اسلام آباد پهچندو. ان کان اڳ ايراني پرڏيهي وزارت جي ترجمان اسماعيل بقائي چيو هو ته ايراني وفد آمريڪا سان ڳالهين جي ٻئي دور لاءِ پاڪستان نه ويندو، ۽ ايران جو ڳالهين جي ٻئي دور ۾ حصو وٺڻ جو ڪو به ارادو ناهي.اسماعيل بقائي چيو ته آمريڪا جنگ بندي جي ڀڃڪڙي ڪئي، اسان پاڪستاني ثالث کي ٻڌايو آهي ته اسان ڳالهين لاءِ اسلام آباد نه اچي رهيا آهيون، ۽ جيڪڏهن آمريڪا ٻيهر حملو ڪيو ته اسان ڀرپور جواب ڏينداسين.هن چيو ته آمريڪا ظاهر ڪيو آهي ته هو سفارتي عمل کي اڳتي وڌائڻ ۾ سنجيده ناهي، آمريڪا جارحاڻي ڪارروائي ڪئي آهي ۽ جنگ بندي جي شرطن جي ڀڃڪڙي ڪئي آهي.ايراني پرڏيهي وزارت جي ترجمان چيو ته آمريڪي تجويزون بي معنيٰ آهن ۽ ان جا مطالبا غير حقيقي آهن، ايران واضح طور تي پنهنجا مطالبا بيان ڪيا آهن ۽ انهن کي تبديل نه ڪندو.اسماعيل بقائي چيو ته جڏهن ايران جي قومي مفادن جي حفاظت جي ڳالهه اچي ٿي، ته اسان ڊيڊ لائن يا الٽيميٽم تي يقين نٿا رکون.
هرموز کليو رهڻ گهرجي، چيني صدر
چين جي صدر شي جن پنگ سعودي ولي عهد محمد بن سلمان سان فون تي ڳالهه ٻولهه ڪئي آهي. ايران جنگ ختم ڪرڻ هرموز لنگهه کليو رکڻ بابت ڳالهيون ڪيون. ياد رهي ته چين جي نيوي جا جنگي جهاز به هرموز جي آس پاس پنهنجي ڪارگو جهازن جي مدد لاءِ موجود آهن.
جنگبندي باوجود ڏکڻ لبنان ۾ اسرائيلي حملا جاري
گذريل ڪجهه ڪلاڪن دوران Israelاسرائيل لبنان جي ڏکڻ ۾ ڪيترن ئي شهرن کي نشانو بڻايو آهي، جيتوڻيڪ 10 ڏينهن جي جنگبندي لاڳو آهي، الجزيره لبنان جي نيشنل نيوز ايجنسي جو حوالو ڏيندي رپورٽ ڪيو آهي۔ اين اين اي موجب هڪ ڊرون لٽاني درياءَ لڳ شهر کي نشانو بڻايو، جڏهنتہ فوري طور ڪنهن جاني نقصان جي رپورٽ ناهي ملي۔ ٻئي پاسي، ٽائر شهر ۾ اين اين اي جي نمائندي ٻڌايو ته شام ۾ بمباري ٿي آهي۔ ساڳي طرح،مريون ۾ موجود نمائندي ٻڌايو ته اسرائيلي فوج شهر طيبه ۾ پڻ بمباري ڪئي، ۽ شهرن القنتارا القيصر جي وچ واري علائقي ۾ به حملا ڪيا ويا آهن۔
يورپي يونين جو اسرائيل سان تعاون جو معاهدو معطل ڪرڻ تي غور
اي ايف پي، يورپي يونين جي مکيه سفارتڪار جي حوالي سان ٻڌايو آهي ته يورپي يونين پنهنجي ميمبر ملڪن جي تياري جو جائزو وٺندو ته ڇا اهي اسرائيل خلاف قدم کڻڻ لاءِ راضي آهن يا نه، جڏهنتہ اسپين ٻيهر مطالبو ڪيو آهي ته اسرائيل سان تعاون واري معاهدي کي معطل ڪيو وڃي، اي ايف پي موجب 27 ملڪن تي ٻڌل هن اتحاد جا پرڏيهي وزير اڱاري ڏينهن لگسمبرگ ۾ ٿيندڙ اجلاس ۾ هن معاملي تي بحث ڪندا، جيڪواسپين جي وزيراعظم جي سڏ تي گهرايو ويو آهي۔
آمريڪي وفد اسلام آباد لاءِ روانو ٿي ويو آهي، ٽرمپ
آمريڪا جو نائب صدر جي ڊي وينس جي سربراهي ۾ هڪ آمريڪي وفد پاڪستان ڏانهن روانو ٿي چڪو آهي ۽ امڪان آهي ته ڪجهه ڪلاڪن اندر پهچي ويندا، جتي ايران سان امن ڳالهين لاءِ ملاقاتون ٿينديون. اهڙو اظهار صدر ٽرمپ نيو يارڪ پوسٽ کي ڏنل انٽرويو ۾ ڪيو آهي. هن وڌيڪ چيو ته جيڪڏهن ڪا اڳڀرائي ٿئي ٿي ته هو ايران جي سينيئر اڳواڻن سان ملڻ لاءِ تيار آهي۔ ٽرمپ هڪ مختصر انٽرويو ۾ چيو: “اسان کي ڳالهيون ڪرڻيون آهن.” هن ان شڪ کي رد ڪيو ته ڳالهيون ناڪام ٿي سگهن ٿيون۔ “تنهنڪري هن مرحلي تي مان سمجهان ٿو ته ڪو به راند نه پيو کيڏي.” ٽرمپ تصديق ڪئي ته هڪ اعليٰ سطحي آمريڪي وفد ، جنهن ۾ وينس، خاص نمائندو اسٽيو وٽڪوف ۽ صلاحڪار جيئرڊ ڪشنر شامل آهن، اڳ ئي اسلام آباد ڏانهن روانو ٿي چڪا آهن، جتي ڳالهين جو ايندڙ دور ٿيندو۔ “هو هاڻي روانا ٿي چڪا آهن،” ٽرمپ صبح 9 وڳي (ET) کان ٿورو پوءِ چيو (شام 6 وڳي پاڪستاني وقت مطابق)۔ “هو اڄ رات اسلام آباد جي وقت مطابق اتي پهچي ويندا.”
جهاز تي جارحيت کان پوءِ آمريڪا جو مقابلو ڪرڻ لاءِ تيار آهيون: ايراني هٿياربند فوج جو ترجمان
ايراني ذريعن جو چوڻ آهي ته آبنائي هرمز تي آمريڪي ناڪي بندي جو تسلسل ايران-آمريڪا ڳالهين کي نقصان پهچائي رهيو آهي، ۽ ايران جي دفاعي صلاحيتون ۽ ميزائل پروگرام ڪنهن به قسم جي ڳالهين لاءِ کليل نه آهن.ٻئي طرف، ايراني هٿياربند فوج جي ترجمان جو چوڻ آهي ته اهي ايراني جهاز تي جارحيت کان پوءِ آمريڪا جو مقابلو ڪرڻ لاءِ تيار آهن.
چين پاران ايراني واپاري جهاز جي جبري حراست تي ڳڻتي جو اظهار
ايراني ڪارگو جهاز جي ضبط ٿيڻ جي جواب ۾، چيني پرڏيهي وزارت جي ترجمان چيو ته هڪ واپاري جهاز جي جبري حراست تي ڳڻتي آهي.چيني پرڏيهي وزارت جي ترجمان چيو ته آمريڪا-ايران ڳالهين جي موجوده صورتحال نازڪ مرحلي تي آهي. چين آمريڪا ۽ ايران جي وچ ۾ جاري ڳالهين ۾ تعميري ڪردار ادا ڪندو. اميد آهي ته ڌريون جنگ بندي معاهدي کي برقرار رکڻ لاءِ ذميواري سان ڪم ڪنديون.
جنگ ڪنهن جي به مفاد ۾ ناهي، ڇڪتاڻ گهٽائڻ لاءِ سفارتي رستو اختيار ڪرڻ گهرجي: ايراني صدر
ايراني صدر مسعود پيشڪشيان جو چوڻ آهي ته جنگ ڪنهن جي به مفاد ۾ ناهي، ڇڪتاڻ گهٽائڻ لاءِ هر عقلي ۽ سفارتي رستو اختيار ڪرڻ گهرجي.مسعود پيشڪشيان وڌيڪ چيو ته دشمن تي بي اعتمادي ۽ باهمي لاڳاپن ۾ احتياط هڪ ناقابل ترديد ضرورت آهي.
آمريڪا ۽ اسرائيل جا حملا ناڪام ٿيا آهن، ايران اڳ کان وڌيڪ متحد آهي: روس ۾ ايراني سفير
روس ۾ ايراني سفير ڪاظم جلالي جو چوڻ آهي ته ايران تي آمريڪي ۽ اسرائيلي حملا ناڪام ٿيا آهن، ايران اڳ کان وڌيڪ متحد آهي، ان وٽ لوهي ارادو آهي.ايراني سفير چيو ته ايران آبنائے هرمز مان گذرندڙ جهازن جي محفوظ گذر کي يقيني بڻائي ٿو، ۽ روس پاران ايران کي انٽيليجنس فراهم ڪرڻ جون رپورٽون سچ نه آهن.
آمريڪا سان موجوده ڳالهين کي جنگ جي ميدان جو تسلسل سمجهيو وڃي ٿو: ابراهيم عزيزي
ايراني پارليامينٽ جي قومي سلامتي ڪميٽي جي چيئرمين ابراهيم عزيزي چيو ته ايران آمريڪا سان ڳالهيون جاري رکڻ جو فيصلو ڪيو آهي، پر ڪنهن به حالت ۾ غير ضروري مطالبا قبول نه ڪيا ويندا.قطري ٽي وي سان ڳالهائيندي، ايراني پارليامينٽ جي قومي سلامتي ڪميٽي جي سربراهه ابراهيم عزيزي چيو ته ايران جي ڳالهين جي حڪمت عملي قومي مفادن ۽ سيڪيورٽي گهرجن تي ٻڌل آهي، ۽ ايران قومي مفادن جي بنياد تي ڪم ڪري ٿو.ابراهيم عزيزي چيو ته ايران پنهنجي قومي مفادن ۽ سيڪيورٽي جي حفاظت لاءِ جيڪو ڪجهه ڪرڻو آهي اهو ڪندو.هن چيو ته ايران آمريڪا سان ڳالهيون جاري رکڻ جو فيصلو ڪيو آهي، پر اسان موجوده ڳالهين کي جنگ جي ميدان جو تسلسل سمجهون ٿا.هن وڌيڪ چيو ته جيڪڏهن ڳالهين جا نتيجا جنگ جي ميدان ۾ حاصل ڪيل ڪاميابين کي برقرار رکڻ ۾ مدد ڪن ٿا، ته اهو عمل ايران لاءِ هڪ موقعو ٿي سگهي ٿو. جيڪڏهن آمريڪا دٻاءُ جي پاليسي تحت غير ضروري مطالبا ڪندو، ته اهڙيون ڳالهيون قابل قبول نه هونديون.ايراني پارليامينٽ جي قومي سلامتي ڪميٽي جي سربراهه چيو ته ڳالهين جو مطلب اهو ناهي ته ڪنهن به قيمت تي ڳالهيون ڪيون وڃن، ڳالهين جو مطلب اهو ناهي ته ٻئي ڌر جي هر طريقي کي قبول ڪيو وڃي، ايران واضح سرخ لڪيرون مقرر ڪيون آهن جن جو احترام ڪيو وڃي.هن چيو ته اسلام آباد ۾ ڳالهين واري ٽيم موڪلڻ ان تي منحصر آهي ته مثبت سگنل مليا آهن يا نه، اسان ڪڏهن به ڳالهين جي اصول کان پاسو نه ڪيو آهي، اهو ممڪن آهي ته اڄ يا سڀاڻي، وڌيڪ جائزي کان پوءِ، اسان ڳالهين جي امڪان تي غور ڪنداسين، ڳالهين لاءِ ضروري آهي ته آمريڪي ڳالهين واري ٽيم ايران جي پيغامن جو مثبت سگنل ڏئي.
سڀني لاءِ مفت تيل مارڪيٽ يا ڪنهن لاءِ به نه: ايراني نائب صدر
ايراني نائب صدر رضا عارف چيو ته ايراني تيل جي برآمدات کي روڪڻ سان ٻين لاءِ سيڪيورٽي جي اميد نٿي رکي سگهجي، ۽ آبنائے هرمز جي سيڪيورٽي مفت ۾ دستياب ناهي.
آمريڪي حملي ۾ شهيد ٿيندڙ مناب اسڪول جي ٻارن جي والدين جو پوپ ليو کي خط
ايران ۾ آمريڪي حملي ۾ شهيد ٿيندڙ مناب اسڪول جي ٻارن جي والدين عيسائين جي روحاني اڳواڻ پوپ ليو کي خط لکيو.والدين شهيد ٿيندڙ ٻارن جي آواز بڻجڻ تي پوپ ليو جو شڪريو ادا ڪيو. انهن خط ۾ لکيو ته توهان جو ‘هٿيار رکڻ’ جو پيغام ضرور ٻڌو ويندو. وائيٽ هائوس اڃا تائين مناب اسڪول حملي لاءِ معافي نه ورتي آهي.ياد رکڻ گهرجي ته مناب ۾ هڪ اسڪول تي آمريڪي حملي ۾ ڇوڪرين سميت 160 کان وڌيڪ ماڻهو شهيد ٿيا هئا. هي حملو 28 فيبروري تي ڪيو ويو هو.
