واشنگٽن (ويب ڊيسڪ) آمريڪي صدر چيو آهي ته لبنان ۽ اسرائيل ۾ 10 ڏينهن جي جنگبندي شروع آهي، ويڙهاڪ تنظيم حزب الله به جنگبندي جي پابندي ڪندي. هن چيو ته ايران سان به جلد معاهدو ٿي ويندو. جنگبندي تي لبناني خوش ۽ اسرائيلي ناخوش آهن.الجزيره اسرائيل جي هڪ اخبار جي حوالي سان چيو آهي ته ڏکڻ لبنان ۾ اسرائيلي فوج ڪاروايون جاري رکندي ۽ حزب الله جي خاتمي تائين سک سان نه ويهبو. صدر ٽرمپ لاس ويگاس، نيواڊا ۾ هڪ تقريب کي خطاب ڪندي چيو ته ايران هڪ تمام پيارو ملڪ آهي، هو ايران سان جنگ ڪرڻ نٿو چاهي، پر ان جي ايٽمي پروگرام جي ڪري اهو ڪرڻو پيو. آمريڪي صدر چيو ته ايران جنگ تمام جلد ختم ٿيڻ گهرجي ۽ هي جنگ سٺي نموني ختم ٿيڻ واري آهي، ايران سان جنگ ٻن مهينن ۾ ختم ٿيڻ واري آهي، هن دعويٰ ڪئي ته اسان کي ايران ۾ تمام جلد فتح ملندي. صدر ٽرمپ چيو ته اسان جي هڪ جهاز ابراهام لنڪن تي 111 راڪيٽ فائر ڪيا ويا، اسان جي فوج سڀني 111 راڪيٽن کي تباهه ڪري ڇڏيو ۽ حملي کي ناڪام بڻائي ڇڏيو، ايران بهترين فوج جي ڪري جنگ ۾ جيڪو ڪجهه ڪرڻ چاهيندو هو اهو ڪيو، آمريڪا وٽ دنيا جي بهترين فوج آهي ۽ ان کي وڌيڪ بهتر بڻائي رهي آهي، آمريڪي فوج وٽ جديد ٽيڪنالاجي آهي ۽ ان کي وڌيڪ بهتر بڻائيندي.
هرموز ۽ لبنان بابت ٿيل اهم پيش رفت جو تفصيل
ايران جي پرڏيهي وزير عباس عراقچي چيو آهي ته لبنان ۾ 10 ڏينهن واري جنگبندي دوران هرموز لنگهه سڀني واپاري جهازن لاءِ “مڪمل طور کليل” آهي۔
ٽرمپ وڌيڪ چيو ته اهو لنگهه “مڪمل طور کليل ۽ ڪاروبار لاءِ تيار” آهي، پر ايران خلاف آمريڪا جي بحري ناڪابندي تيسين تائين جاري رهندي جيستائين ايران سان ڪو معاهدو نه ٿئي۔ هن دعويٰ ڪئي ته ايران خاطري ڪرائي آهي ته آئنده ڪڏهن به هرموز بند نه ڪندو.
ٽرمپ اهو به چيو ته ايران سان معاهدو “تمام جلدي” ٿي سگهي ٿو، ڇاڪاڻتہ گهڻا نقطا اڳ ئي طئي ٿي چڪا آهن۔ هن زور ڀريو ته آمريڪا ايران جو سمورو رچيل يورينيم حاصل ڪندو، جنهن کي هن “ايٽمي مٽي” قرار ڏنو۔
آمريڪي صدر چيو ته هن اسرائيل کي لبنان تي بمباري ڪرڻ کان “روڪي ڇڏيو” آهي۔ هن وڌيڪ چيو ته حزب الله جي موجودگي وارو معاملو ايران سان الڳ نموني ۽ “مناسب طريقي” سان حل ڪيو ويندو۔
نيتن ياهو عزم ظاهر ڪيو ته اسرائيل لبناني گروپ کي “ختم ڪرڻ” جي ڪارروائي جاري رکندو، ڇاڪاڻتہ “ڪم اڃا مڪمل نه ٿيو آهي.”
اسرائيل دوکيبازي يا غداري ڪئي ته اسانجي آڱر به ٽريگر تي آهي، حزب الله
حزب الله چيو آهي ته لبنان ۾ جاري جنگبندي دوران جيڪڏهن اسرائيل طرفان ڪا به “دوکيبازي يا غداري” ٿيندي ته هو ڀرپور جواب ڏيندا ۽ اسانجي آڱر به “ٽريگر تي رکيل” آهي. ٽيليگرام تي جاري ڪيل بيان ۾، ايران جي حمايت يافته هن گروپ پنهنجي هينئر تائين جي ڪاررواين جو ذڪر ڪندي چيو ته هن 2 مارچ کان 16 اپريل تائين اسرائيل خلاف 2,184 ڪارروايون ڪيون آهن۔ حزب الله، جنهن کي برطانيا ۽ آمريڪا سميت ڪيترن ئي ملڪن طرفان دهشتگرد تنظيم قرار ڏنو ويو آهي، جنگبندي ڳالهين ۾ شامل نه هئي، جتي اسرائيل سڌو سنئون لبناني حڪومت سان ڳالهين ڪري رهيو هو۔ خميس ڏينهن جنگبندي جي خبر تي ردِعمل ڏيندي، حزب الله چيو ته “ڪا به جنگبندي سڄي لبناني علائقي تي لاڳو هجڻ گهرجي ۽ اسرائيلي دشمن کي ڪنهن به قسم جي حرڪت جي آزادي نه ڏيڻ گهرجي.” اسرائيل 10 ڏينهن جي عارضي جنگبندي تي اتفاق ڪيو، پر وزيراعظم بنيامين نيتن ياهو زور ڀريو ته جنگبندي جي مدي دوران اسرائيلي فوج لبناني علائقي ۾ “سيڪيورٽي زون” ۾ موجود رهندي۔
جنگبندي جي ايران پاران آجيان، اها حزب الله جي مزاحمت جي ڪاميابي قرار
ايران لبنان ۾ جنگبندي جي آجيان ڪئي آهي ۽ ان کي هڪ سفارتي ڪاميابي ۽ حزب الله جي “مزاحمت” جو نتيجو قرار ڏنو آهي۔ پرڏيهي وزارت جي ترجمان اسماعيل بقائي چيو ته تهران هن جنگبندي کي آمريڪا سان هڪ وسيع سمجھاڻي جو حصو سمجهي ٿو، جيڪا پاڪستان جي ثالثي سان ٿيل ڳالهين ذريعي طئي ٿي۔ هن زور ڏنو ته ايران هميشه علائقي ۾ وڌيڪ وسيع جنگبندي لاءِ ڪوششون ڪندو رهيو آهي۔ سينيئر عملدارن پڻ حزب الله جي ڪردار کي ساراهيو۔ پارليامينٽ جي اسپيڪر محمد باقر قاليباف ايڪس تي عربي ۾ لکيو ته هي معاهدو “حزب الله جي ثابت قدمي ۽ محورِ مزاحمت جي اتحاد جو نتيجو آهي”، جيڪو اصطلاح تهران پنهنجي علائقائي اتحادي گروپن جي نيٽ ورڪ لاءِ استعمال ڪندو آهي۔ ايران جي پاسدارانِ انقلاب جي قدس فورس جي ڪمانڊر اسماعيل قاآني حزب الله کي “فاتح” قرار ڏنو ۽ چيو ته هي معاهدو لبنان جي مزاحمت جي ثابت قدمي ۽ اسلامي جمهوريه ايران جي حمايت جو نتيجو آهي۔
جنگبندي بعد هزاري لبنانين جي گهرن ڏانهن واپسي
اسرائيل سان آڌي رات کان لاڳو ٿيل جنگبندي کان پوءِ بي گهر ٿيل لبنانين جا هزارين ماڻهو بيروت جي ڏاکڻي مضافات ۽ ڏاکڻي لبنان جي شهرن ۽ ڳوٺن ڏانهن واپس وڃڻ شروع ٿي ويا آهن۔ جمعي جي صبح سوير محتاط جشنن جي وچ ۾ واپسي جو عمل شروع ٿيو، جيڪو هفتن تائين جاري سخت ويڙهه کان پوءِ ٿيو آهي۔ بيروت جي اتر طرف ويندڙ رستا گاڏين سان ڀرجي ويا، جتي وڏي انگ ۾ ماڻهو راڄڌاني جي ڏاکڻي علائقن ڏانهن موٽي رهيا هئا۔ بيروت ۽ جبلِ لبنان کي ڏاکڻن شهرن صيدا ۽ صور سان ڳنڍيندڙ سامونڊي شاهراهه تي پڻ واپس ويندڙ خاندانن جون گاڏيون ڊگهين قطارن ۾ نظر آيون۔ ڪجهه ماڻهو گهرن ڏانهن ويندي فتح جا نشان به ڏيکاري رهيا هئا۔ نوجوان ڇوڪريون به فتح جا نشان ڏيکاريندي ڪافي خوش نظر آيون.
اسرائيل ۽ لبنان جنگبندي جي پاڪستان پاران آجيان
صدر آصف علي زرداري ۽ وزيراعظمشهباز شريف جمعي ڏينهن لبنان ۽ اسرائيلوچ ۾ جنگبندي جي اعلان جي آجيان ڪئي آهي. صدر جي آفيس جي سرڪاري X اڪائونٽ تان جاري ڪيل بيان ۾ صدر زرداري چيو ته هن “لبنان ۾ جنگبندي کي ڇڪتاڻ گهٽائڻ ۽ علائقائي استحڪام ڏانهن هڪ قدم طور ڀليڪار ڪيو آهي”، ۽ پاڪستان جي طرفان لبنان جي خودمختياري جي حمايت کي ٻيهر ورجايو، هن گڏوگڏ ويسٽ ايشيا ۾ مستقل امن حاصل ڪرڻ لاءِ آمريڪا ۽ ايران وچ ۾ تڪرار گهٽائڻ جي جاري ڪوششن جي پڻ حمايت ڪئي. وزيراعظم شهباز شريف ايڪس تي پنهنجي پوسٽ ۾“اميد ظاهر ڪئي آهي ته هي قدم پائيدار امن لاءِ راهه هموار ڪندو.” هن پيغام ۾ لکيو ته “پاڪستان لبنان جي خودمختياري ۽ علائقائي سالميت لاءِ پنهنجي اڻ ٽٽ حمايت کي ٻيهر ورجائي ٿو، ۽ علائقي ۾ مستقل امن لاءِ ڪيل هر ڪوشش جي حمايت جاري رکندو.”
پاڪستاني جهازن، عملي ۽ آبنائي هرمز ۾ محفوظ نيويگيشن جي سيڪيورٽي کي يقيني بڻايو وڃي: پاڪستاني نمائندو
گڏيل قومن ۾ پاڪستان جي مستقل نمائندي عاصم افتخار آبنائي هرمز جي بندش تي گهري ڳڻتي جو اظهار ڪيو ۽ چيو ته آبنائي هرمز جي صورتحال جو دنيا جي ملڪن تي منفي اثر پئجي رهيو آهي، پاڪستاني عوام به ان کان متاثر ٿي رهيا آهن، ان جا اثر صرف توانائي جي فراهمي تائين محدود نه آهن پر ڀاڻ ۽ ٻين ضروري شين تائين به پهچن ٿا.پاڪستاني مستقل نمائندي چيو ته اهي آبنائي هرمز کي جلد کولڻ ۽ صورتحال کي معمول تي آڻڻ جي بنيادي مقصد سان متفق آهن. هي معاملو خطي ۽ ان کان ٻاهر سڀني رياستن لاءِ اهم آهي. آبنائي هرمز سان لاڳاپيل ڪنهن به بحث يا انتظام ۾ جي سي سي ملڪن جي جائز مفادن کي نظر ۾ رکڻ گهرجي.عاصم افتخار پاڪستاني جهازن ۽ عملي جي سيڪيورٽي، محفوظ نيويگيشن ۽ هن آبنائي ۾ عام سامونڊي حرڪت جي بحالي جو مطالبو ڪيو.
اميد آهي ته حزب الله هن نازڪ وقت تي معقول طريقي سان ڪم ڪندي: ٽرمپ
آمريڪي صدر، اسرائيل-لبنان جنگ بندي تي رد عمل ظاهر ڪندي چيو ته جيڪڏهن حزب الله معقول طريقو اختيار ڪري ٿو، ته اهو انهن لاءِ هڪ بهترين لمحو هوندو، ڪو به جاني نقصان نه ٿيندو، ۽ آخرڪار امن ضرور ايندو.
اسرائيل لبنان جنگ بندي تهران حزب الله جي حق ۾ نعرن سان گونجندو رهيو
اسرائيل لبنان جنگ بندي تهران حزب الله جي حق ۾ نعرن سان گونجندي رهي، هزارين ماڻهو ايراني گادي واري شهر جي دل ۾ گڏ ٿيا ۽ لبناني مزاحمتي تنظيم حزب الله جي حق ۾ ۽ اسرائيل جي خلاف نعرا لڳايا.ايراني انقلابي گارڊ ڪور جي قدس فورس جي ڪمانڊر برگيڊيئر جنرل اسماعيل قاآني هڪ بيان ۾ چيو ته معزز لبناني ۽ خطي جا ماڻهو ڄاڻن ٿا ته هن فيصلي واري جنگ جو فاتح حزب الله آهي. جيڪڏهن جنگ بندي قائم ٿئي ٿي ته اها لبناني مزاحمت جي ثابت قدمي ۽ ايران جي حمايت جو نتيجو آهي.ان دوران، لبنان ۽ اسرائيل جي وچ ۾ 10 ڏينهن جي جنگ بندي جي جشن لاءِ بيروت ۾ هوائي فائرنگ ڪئي وئي.
جنگ کي روڪڻ ۾ پاڪستان جو اثرائتو ۽ ذميوار ڪردار ساراهه جوڳو آهي: ايراني صدر
ايراني صدر مسعود پيشڪشيان چيو ته ايران خطي ۾ امن، استحڪام ۽ ڀائراڻا لاڳاپا چاهي ٿو. اسلامي امت جو اتحاد صيهوني حڪومت کي پنهنجن مقصدن حاصل ڪرڻ کان روڪيندو. هن زور ڏنو ته خطي جي سلامتي کي خطي جي ملڪن پاران يقيني بڻايو وڃي.
ايراني اسپيڪر جي لبنان جنگ بندي ۾ ثالثي ڪرڻ تي پاڪستان ۽ فيلڊ مارشل جي تعريف
ايراني پارليامينٽ جي اسپيڪر محمد باقر قاليباف چيو آهي ته لبنان جنگ بندي حزب الله جي ثابت قدمي ۽ اتحاد جو نتيجو آهي.ايراني پارليامينٽ جي اسپيڪر چيو ته اسان هن جنگ بندي کي احتياط سان ڏسنداسين ۽ مڪمل ڪاميابي حاصل ڪرڻ تائين گڏ رهنداسين، ۽ هي پيش رفت مڪمل فتح حاصل ڪرڻ تائين احتياط سان اڳتي وڌندي رهندي.اسپيڪر جنگ بندي لاءِ پاڪستان جي ثالثي جي ڪوششن ۽ فيلڊ مارشل عاصم منير جي ڪردار جي پڻ تعريف ڪئي ۽ انهن جو شڪريو ادا ڪيو. هن وڌيڪ چيو ته اسان پنهنجي عزم تي قائم آهيون ۽ پنهنجي موقف کان پوئتي نه هٽنداسين.
دشمن چاهين ٿا ته ايران انهن جي آڏو هٿيار ڦٽا ڪري، پر خواهش پوري نه ٿيندي: ايراني آرمي چيف
ايراني آرمي چيف آف اسٽاف ميجر جنرل امير حاتمي جو چوڻ آهي ته دشمن چاهين ٿا ته ايران انهن جي آڏو هٿيار ڦٽا ڪري، پر انهن جي خواهش ڪڏهن به پوري نه ٿيندي.هڪ تقريب کي خطاب ڪندي، ايراني آرمي چيف آف اسٽاف چيو ته ڏهاڪن جي ٻاهرين دٻاءُ ۽ قاتلانه حملن جي باوجود، عوام جي لوهي ارادي ۾ ڪو به گهٽتائي نه آئي آهي. دشمنن غلط اندازو لڳايو هو ته قيادت جي خاتمي سان ملڪ به ٽٽي پوندو. جڏهن ايراني سفارتي عملدار ڳالهين ۾ مصروف هئا، ته ايران دشمن جي جارحيت کي منهن ڏنو.ميجر جنرل امير حاتمي چيو ته ايراني اختيارين جي بهادر ڪوششن جنگ دوران ايران لاءِ ڪا به پريشاني پيدا نه ڪئي. بحري ناڪابندي قزاقي جي هڪ شڪل آهي. ايران دشمنن جي ڪوششن کي ڪامياب ٿيڻ نه ڏيندو. مون جهڙا هزارين ماڻهو هن ملڪ ۽ ان جي ماڻهن لاءِ پاڻ کي قربان ڪرڻ لاءِ تيار آهن. اسان ڪڏهن به نه جهڪنداسين.
