ڪراچي(اسٽاف رپورٽر)ڪراچي ۾ لوڊشيڊنگ کان مستثنيٰ علائقن ۾ ڏينهن رات لوڊشيڊنگ جو اعلان ڪيو ويو آهي. ڪي اليڪٽرڪ ان کان اڳ بجلي چوري ۽ لائن لاسز ۽ باقاعدي بل جي ادائگي جي استثنيٰ وارن علائقن کي بند ڪري ڇڏيو هو ۽ شهر جو ڪو به اهڙو علائقو نه هو جتي 4 کان 14 ڪلاڪ بجلي نه هجي، سخت گرمي ۽ بي گهر شهرين مختلف هنڌن تي احتجاج پڻ ڪيو. پر ڪي اليڪٽرڪ جي تازي اعلان ثابت ڪري ڇڏيو ته ڪمپني کي ڪابه پرواهه ناهي. ڪي اليڪٽرڪ طرفان صارفين کي موڪليل ايس ايم ايس موجب، مستثنيٰ علائقن ۾ رات جي وقت 2 ڪلاڪ يا 3 ڪلاڪ لوڊشيڊنگ ڪئي ويندي.صارفين لاءِ ڪمپني جو تازو پيغام آهي ته پيداوار ۾ گهٽتائي سبب رات ۾ ٻه ڀيرا باقاعده لوڊشيڊنگ ٿيندي، ڪلاڪ ڪلاڪ لوڊشيڊنگ ٿيندي.اهڙي پيغام کانپوءِ ڊفينس، ڪلفٽن، پي اي سي ايڇ ايس ۽ گلشن اقبال سميت مختلف علائقن ۾ لوڊشيڊنگ سبب پريشاني جي لهر پکڙجي وئي آهي.صارفين جو چوڻ آهي ته نيڪالي وارن علائقن ۾ اڳ ئي 4 ڪلاڪ لوڊشيڊنگ ڪئي پئي وڃي، نئين اعلان کانپوءِ بجلي جي لوڊشيڊنگ جو مدو 6 ڪلاڪن تائين پهچي ويندو.
