ڪراچي( اسٽاف رپورٽر) پي آءِ اي 450 کان وڌيڪ آفيسر ڪراچي کان اسلام آباد بدلي ڪري ڇڏيا، لاڙڪاڻو ۽ نوابشاهه ۾ بڪنگ آفيس به بند ڪرڻ جو فيصلو ڪيو ويو.رضا ڪارانه اسڪيم هيٺ ريٽائرمينٽ لاءِ استاف کي مجبور ڪرڻ جا حربا شروع ڪيا ويا آهن. ملازمن ۾ سخت بيچيني ڦهليل آهي، لاڙڪاڻو آفيس 70 کان 80 لک ماهوار ڪمائي ڏيڻ واري آفيس آهي، گلگت ۽ اسڪردو سدائين خساري ۾ هلنديون آهن پر عوامي سهولت خاطر اهي قائم آهن پر سنڌ جون آفيسون بند ڪري تعصب پرستي ڪئي پئي وڃي. ذريعن موجب پي آءِ اي اختيارين لاڙڪاڻو، نوابشاهه ۽ ٻين شهرن مان پي آءِ اي آفيسرن کي پهرين ڪراچي موڪليو ويو، جتان کين اوچتو اسلام آباد رپورٽ ڪرڻ جو حڪم ڏنو، پي آءِ اي آفيسرن ۾ اوچتو بدلي تي بيچيني پکڙجي وئي. 22 جنوري 2019ع ۾ وزير اعظم عمران خان جي صدارت ۾ ٿيل اجلاس ۾ پي آءِ اي جي هيڊ آفيس ڪراچي مان اسلام آباد منتقل ڪرڻ جو فيصلو ٿيو هو.
