اسلام آباد(رپورٽ اياز مهر)پاڪستاني فلم “موڪلاڻي: دي لاسٽ مهاڻا” پهريون ڀيرو ملڪ لاءِ جئڪسن وائلڊ ميڊيا ايوارڊز ۾ ايوارڊ کٽي ورتو آهي، هي ڳالهه پروڊڪشن ڪمپني جواد شريف فلمز جي پريس رليز ۾ ٻڌائي وئي آهي. 1991ع ۾ جئڪسن هول وائلڊ لائف فلم فسٽيول جي نالي سان ٺهندڙ هي ايوارڊ، فطرت ۽ جهنگلي حيات تي ٻڌل فلمن ۾ شاندار ڪاميابين کي مڃتا ڏئي ٿو. تنظيم جي ويب سائيٽ موجب، ان جو مقصد اهڙين ڪهاڻين جي اثر کي وڌائڻ آهي جيڪي ڌرتيءَ جي تحفظ ۽ بحالي جي گڏيل ذميواري کي اجاگر ڪن ٿيون. پريس رليز موجب، هي فلم جيڪا ايوراڊ کٽندڙ هدايتڪار ۽ پروڊيوسر جواد شريف ٺاهي آهي 500 کان وڌيڪ فلمن جي انٽريز مان چونڊي وئي ۽ 2 آڪٽوبر تي جئڪسن، وائيومنگ ۾ ٿيندڙ ايوارڊز گالا ۾ “گلوبل وائسز ڪيٽيگري” ۾ فاتح قرار ڏني وئي. پريس رليز ۾ چيو ويو ته “200 کان وڌيڪ بين الاقوامي ججن هڪ هزار ڪلاڪن کان وڌيڪ مواد ڏسي، پوءِ هن فلم کي گلوبل وائسز ڪيٽيگري ۾ بهترين قرار ڏنو.” فلم جي باري ۾ چيو ويو آهي ته اها “منڇر ڍنڍ جي مهاڻا برادري جي ڪهاڻي ٻڌائي ٿي، جيڪي صدين کان پاڻيءَ تي ٻيڙين جي گهرن ۾ رهندڙ ماهيگير آهن ۽ جن جي زندگي جو روايتي طرز هاڻي ختم ٿيڻ جي ڪناري تي آهي.” مهاڻا برادري کي ڍنڍ جي گهٽجندڙ پاڻي، زهريلي آلودگي ۽ پنهنجي ثقافتي ورثي جي زوال جو شڪار آهي. منڇر ڍنڍ، جيڪا دادو ضلعي جي تعلقي سيوهڻ شريف کان لڳ ڀڳ 18 ڪلوميٽر اولهه طرف انڊس هاءِ وي تي واقع آهي، پاڪستان جي سڀ کان وڏي مٺي پاڻي واري ڍنڍن مان هڪ سمجهي وڃي ٿي ۽ اها ئي هڪ اهڙي ڍنڍ آهي جتي ماڻهو سوين سالن کان ڪاٺين جي ٻيڙين تي رهندا پيا اچن. پريس رليز ۾ وڌيڪ ٻڌايو ويو آهي ته فلم نيشنل جيوگرافڪ سوسائٽي ۽ ڪلائيميٽ ڪهاڻي جي سهڪار سان تيار ڪئي وئي آهي. بيان موجب، “موڪلاڻي هڪ اهڙي برادريءَ جو نه رڳو ڏسڻ ۾ حسين پر انتهائي انساني رخ پيش ڪندڙ پورٽريٽ آهي، جيڪا پنهنجي ثقافتي وجود جي ختم ٿيڻ جي ويجهو آهي۔ انهن جي جدوجهد پاڪستان ۾ موسمياتي تبديليءَ جي وڏي بحران کي ظاهر ڪري ٿي.” جواد شريف چيو ته هي فلم هڪ اهڙي برادريءَ کي آواز ڏئي ٿي “جنهن کي دنيا وساري ڇڏڻ جي خطري ۾ آهي.” هن چيو: “انهن جي ڪهاڻي موسمياتي تبديلي، ثقافتي نقصان ۽ انساني ۽ قدرتي توازن جي تحفظ جي ضرورت کي ظاهر ڪري ٿي. عالمي سطح تي انهن جي ڪهاڻيءَ کي تسليم ڪيو وڃڻ انتهائي فخر جو لمحو آهي. هي جي عزت ۽ اعزاز سڀ کان وڌيڪ مهاڻا برادري کي وڃي ٿو.” اسلام آباد ۾ قائم جواد شريف فلمز هڪ ايوراڊ کٽيندڙ پروڊڪشن ڪمپني آهي جيڪا ثقافت، سماجي انصاف ۽ موسمياتي تبديليءَ تي ٻڌل دستاويزي فلمن لاءِ مشهور آهي، جن ۾ 2015ع جي “K2 اينڊ دي اِن وِزيبل فوٽ مين”، 2018ع جي “انڊس بلوز” ۽ 2021ع جي “نٽاري” شامل آهن.
