اسلام آباد: (بيورو رپورٽ) سپريم ڪورٽ اهو اصول مقرر ڪيو آهي ته عورت جي ظاهري رضامندي کانسواءِ طلاق جي دعويٰ کي خلع ۾ تبديل نٿو ڪري سگهجي. جسٽس مسرت هلالي پنج صفحن تي ٻڌل فيصلو لکيو، چيف جسٽس يحيٰ آفريدي جسٽس هلالي جي فيصلي سان اتفاق ڪيو، ٻن رڪني بينچ فيصلو ڏنو ته عدالت طلاق جي دعويٰ کي خود بخود خلع ۾ تبديل نه ٿي ڪري سگهي، فيملي ڪورٽ ۽ پشاور هاءِ ڪورٽ جي فيصلي کي رد ڪندي درخواست ڏيندڙ نائلا جاويد کي 12 لک رپيا ڏاج طور ادا ڪرڻ جو حڪم ڏنو.سپريم ڪورٽ جي فيصلي موجب نائلا جاويد ظلم ۽ قانونيت جي بنياد تي شادي کي ختم ڪرڻ لاءِ درخواست داخل ڪئي هئي، فيملي ڪورٽ ظلم جي الزامن تي فيصلو ڏيڻ بدران خلع جي بنياد تي شادي کي ختم ڪري ڇڏيو، فيملي ڪورٽ عورت کي خلع جي بنياد تي ڏاج ڇڏڻ جو حڪم ڏنو هو، عورت درخواست ڏيندڙ خلع جي درخواست نه ڪئي هئي.سپريم ڪورٽ موجب، طلاق جي دعويٰ کي ظاهري رضامندي کانسواءِ خلع ۾ تبديل نٿو ڪري سگهجي. مڙس ٽرائل دوران ٻيهر شادي ڪئي. ٻي شادي مسلم خانداني قانون آرڊيننس جي سيڪشن 6 جي خلاف ورزي آهي. مڙس اعتراف ڪيو ته هن ٻي شادي لاءِ ثالثي ڪائونسل کان اجازت يا منظوري نه ورتي هئي.فيصلي ۾ چيو ويو آهي ته مڙس زال کي سار سنڀال به فراهم نه ڪئي. عورت کي جرح دوران غلط طور تي پيش ڪيو ويو. اهي سڀئي عنصر قانون ۾ ظلم جي زمري ۾ اچن ٿا. انهن حالتن ۾، عورت جو پنهنجي مڙس سان گڏ رهڻ کان انڪار نافرماني ناهي.
