اسلام آباد(بيورو رپورٽ)اڳوڻي وزيرعظم عمران خان چيو آهي ته اميد ته فوج جي نئين قيادت جنرل (ر) قمر جاويد باجوا جي گذريل 8 مهينن ۾ ورتل اپائن کان پاڻ کي پري رکندي. اعظم سواتي جي گرفتاري ۽ ساڻس ٿيندڙ سلوڪ تي پوري قوم صدمي ۾ آهي. خيبر پختونخواه جي پارلياماني پارٽي کي ويڊيو لنڪ تي خطاب ۽ ٽوئٽر تي جاري ڪيل بيان م هن اعظم سواتي جي گرفتاري جي مذمت ڪندي چيو ته 74 سالن جي سينيٽر ڪهڙو ڏوهه ڪيو آهي، تنقيد ڪرڻ جي جمهوريت ۾ اجازت هوندي آهي. هن چيو ته اعظم سواتي کي گرفتار ڪرڻ وارن خلاف ڪاروائي ڪرڻ گهرجي ۽ جيڪڏهن کيس ڪجهه ٿيو ته اسين ذميوارن خلاف ڪاروائي ڪنداسين. هن چيو ته اسين ملڪ م اليڪشن چاهيون ٿا، حڪومت جيڪڏهن اليڪشن جي تاريخ لاءِ ڳالهيون ڪرڻ چاهي ته اسين تيار آهيون. جيڪڏهن هلندڙ مهيني تائين تاريخ طئي نه ٿي ته اسين پنجاب ۽ خبر پختونخواه جون اسمبليون ٽوڙي ڇڏينداسين جنهن بعد امپورٽيڊ حڪومت پاڻ ئي چونڊن لاءِ مجبور ٿيندي.
