دبئي (ويب ڊيسڪ)پاڪستان ڪرڪيٽ ٽيم جي هيڊ ڪوچ ثقلين مشتاق جو چوڻ آهي ته قومي ٽيم جا فاسٽ بالر ڪافي عرصي کان شاندار پرفارمنس ڏئي رهيا آهن ۽ زخمي شاهين شاهه آفريدي کانسواءِ به اسان جو پيس اٽڪ شاندار آهي.ايشيا ڪپ 28 آگسٽ کان گڏيل عرب امارتن ۾ شروع ٿي رهيو آهي، جنهن جي پهرين ميچ ۾ روايتي حریف پاڪستان ۽ ڀارت جون ٽيمون آمهون سامهون ٿينديون، مشتاق پاڪستان ۽ ڀارت وچ ۾ ايندڙ ميچ سميت ٽيم جي تيارين تي به خيالن جي ڏي وٺ ڪئي.دبئي ۾ ميڊيا سان ڳالهائيندي ثقلين مشتاق چيو ته سمورا رانديگر پروفيشنل آهن، کين گرمي يا سردي جي ڪا پرواهه ناهي، رانديگر ڄاڻن ٿا ته ماحول ۾ پاڻ کي ڪيئن ٺهڪايو وڃي، ٽورنامينٽ لاءِ سمورن رانديگرن سخت محنت ڪئي آهي.شاهين شاهه آفريدي جي غير حاضري بابت جڏهن سوال ڪيو ويو ته ثقلين مشتاق چيو ته شاهين جي انجريشن راند جو حصو آهي پر اسان جا ٻيا فاسٽ بالر ڪافي عرصي کان سٺي ڪارڪردگي جو مظاهرو ڪري رهيا آهن، اسان وٽ نسيم شاهه، حارث رئوف ۽ محمد حسنين شامل آهن، اسان وٽ بالر آهن. ۽ مون کي تمام گهڻو يقين آهي ته اسان جو تيز بالنگ حملو اسان کي ميچ کٽائي سگهندو.پاڪستان ۽ ڀارت وچ ۾ هاءِ وولٽيج ميچ جي حوالي سان ثقلين مشتاق چيو ته اسان کي ان کي عام راند وانگر سمجهڻ گهرجي، ٻنهي ملڪن جا ماڻهو ڪرڪيٽ کي پسند ڪن ٿا ۽ انهن جو حق آهي ته هو پنهنجي ٽيم کي سپورٽ ڪن.قومي ٽيم جي هيڊ ڪوچ جو وڌيڪ چوڻ هو ته ايشيا ڪپ ۾ به ٻنهي ٽيمن جا رانديگر ڪوشش ڪندا ته ٻين ٽيمن جي رانديگرن وانگر پنهنجي بهترين ڪارڪردگي جو مظاهرو ڪندي، ايشيا ڪپ ۾ به ٻنهي ٽيمن جي رانديگرن کي نظر ۾ رکيو آهي.
