ڪراچي (اسٽاف رپورٽر) سنڌ جي وڏي وزير سيد مراد علي شاهه عالمي بئنڪ جي سهڪار سان ٻوڏ متاثرن لاءِ 110 ارب رپين جو هائوسنگ منصوبو شروع ڪرڻ جو فيصلو ڪيو آهي جنهن لاءِ چيف سيڪريٽري جي سربراهي ۾ هڪ اسپيشل يونٽ قائم ڪيو ويندو. اها ڳالهه جمعي ڏينهن سنڌ جي وڏي وزير سيد مراد علي شاهه ۽ ورلڊ بئنڪ جي ڪنٽري ڊائريڪٽر مسٽر ناجي بنهاسين وچ ۾ ملاقات دوران سامهون آئي جنهن اسلام آباد مان وڊيو لنڪ ذريعي اجلاس ۾ شرڪت ڪئي. اجلاس ۾ صوبائي وزيرن ڊاڪٽر عذرا پيچوهو، منظور وساڻ، ناصر شاهه، ڄام خان شورو، ضياءَ عباس شاهه، رسول بخش چانڊيو، مرتضيٰ وهاب، چيف سيڪريٽري سهيل راجپوت، چيئرمين پي اينڊ ڊي حسن نقوي ۽ لاڳاپيل سيڪريٽرين شرڪت ڪئي جڏهن ته ورلڊ بينڪ جي ٽيم ۾ پروگرام ليڊر عبدالرزاق خليف، سينيئر ڊزاسٽر ريسڪ مينيجمينٽ اسپيشلسٽ ايلف ايهان، بلال خالد، ڪامران اڪبر، يونزئي لگ ۽ فرح يامين شامل هئا. سنڌ جي وڏي وزير چيو ته هن اڳواٽ ئي ٽيمون مقرر ڪري ڇڏيون آهن ته جيئن ٻوڏ هيٺ آيل شهرن ۽ ڳوٺن مان پاڻي نيڪال ڪيو وڃي، پاڻي ڪڍڻ جو عمل جاري آهي ۽ اميد آهي ته هڪ اڌ مهيني اندر پاڻي ڪڍيو ويندو ۽ وڌيڪ چيو ته پاڻي گهٽجڻ کانپوءِ متاثرن لاءِ گهرن جي اڏاوت شروع ڪئي ويندي. وڏي وزير چيو ته سياري جي مند اچي رهي آهي تنهنڪري اسان کي ماڻهن لاءِ رهائش جو بندوبست ڪرڻو پوندو. هن عالمي بئنڪ تي زور ڀريو ته هو هائوسنگ پروجيڪٽ لاءِ مالي مدد ڪري. وڏي وزير ۽ ورلڊ بئنڪ جي ڪنٽري ڊائريڪٽر ڊگهي بحث کانپوءِ 110 ارب رپين جو منصوبو شروع ڪرڻ جو فيصلو ڪيو جنهن لاءِ چيف سيڪريٽري جي اڳواڻي ۾ هڪ ڪمپني قائم ڪئي ويندي. ڪمپني جو چيف ايگزيڪيوٽو آفيسر (سي اي او) سندن گهرن جي تعمير شروع ڪندو جنهن لاءِ سرڪاري ۽ خانگي شعبي جي سهڪار سان سروي جاري آهي. ڪراچي: وڏي وزير ورلڊ بينڪ سان گڏجي هڪ ٻئي منصوبي جي شروعات ڪندي چيو آهي ته ڪراچي ۾ ٻوڏ وگهي روڊن جو ڄار تباهه ٿي ويو آهي ۽ نيڪال جو نظام برباد ٿي ويو آهي. هن وڌيڪ چيو ته هو شهر ۾ تباهه ٿيل روڊن جي بحاليءَ لاءِ 13 ارب رپين جو منصوبو شروع ڪرڻ چاهي ٿو. ورلڊ بئنڪ منصوبي لاءِ 6 ارب رپيا ڏيڻ جو واعدو ڪيو جنهن تي وڏي وزير چيو ته هوءَ باقي 7 ارب رپيا ٻين وسيلن مان وصول ڪندو. سيوريج لائينن جي مرمت ۽ تعمير جي حوالي سان مراد علي شاهه چيو ته تازين برساتن کين ناڪاره بڻائي ڇڏيو آهي. هن وڌيڪ چيو ته سندس حڪومت 25 ارب رپين جي اسڪيم تي ڪم ڪيو آهي ته جيئن سيوريج سسٽم کي وسيع ۽ نئين سر ترتيب ڏني وڃي. ورلڊ بينڪ جي ڪنٽري ڊائريڪٽر ان ڳالهه تي اتفاق ڪيو ته منصوبي جي مالي مدد KWSSIP منصوبي ذريعي ڪئي ويندي. ڄام صادق پل: وڏي وزير ڄام صادق پل يا پيراليل پل جي بحاليءَ جو منصوبو به ورتو جنهن لاءِ ورلڊ بئنڪ ۽ سنڌ حڪومت جي ٽيم ايندڙ هفتي اجلاس ۾ ان منصوبي تي ڳالهائڻ تي اتفاق ڪيو. زراعت: وڏي وزير هارين جي پريشاني بابت ڳالهائيندي چيو ته ٻوڏ سبب کين گڻو نقصان پهتو آهي. هن وڌيڪ چيو ته سندس حڪومت هارين کي ڀاڻ ۽ منظور ٿيل ٻج جي صورت ۾ رعايت ڏيڻ لاءِ 30 ارب رپين جي اسڪيم تيار ڪئي آهي. هن چيو ته اسان کي ڪجهه مراعتون ڏئي پنهنجي ٻوڏ واري زرعي صنعت کي بحال ڪرڻو پوندو ڇوته هاري طبقو منظور ٿيل ٻج، ڀاڻ ۽ ٻيون شيون خريد ڪرڻ جو وس ۾ نه آهن. ورلڊ بينڪ ان مقصد لاءِ 323 ارب ڊالر فراهم ڪرڻ تي راضي ٿي ويو آهي ته جيئن هاري پنهنجي زمينن کي ٻيهر سرسبز ڪرڻ لاءِ ايندڙ ربيع جي فصل جي تياري شروع ڪري سگهن. ڪراچي. سنڌ حڪومت ٻوڏ متاثرن علائقن مان پاڻي نيڪال ڪرائڻ ۽ برساتن سبب ڪراچي سميت سنڌ جي ٻين ضلعن جي روڊن، سيوريج لائنن سميت ٻئي انفراسٽرڪچر جي بحاليءَ جو ڪم تيز ڪرڻ جو فيصلو ڪندي پيپلز پارٽي جي نمائندن کي انتظاميه سان گڏجي متاثرن علائقن جي بحالي ۽ امدادي سرگرمين ۾ ڀرپور ڪردار ادا ڪرڻ جي هدايت ڪئي آهي. اهڙو فيصلو جمعي ڏينهن پي پي پي سنڌ جي صدر سينيٽر نثار کهڙي جي صدارت ۾ سنڌ اسيمبليءَ ۾ هڪ اعليٰ سطحي اجلاس ۾ ڪيو ويو. اجلاس ۾ صوبائي وزير بلديات سيد ناصر شاهه، صوبائي وزير سعيد غني، وڏي وزير جو معاون خاص ۽ جنرل سيڪريٽري وقار مهدي، نجمي عالم، نعمان شيخ ۽ ٻين شرڪت ڪئي. اجلاس ۾ ٻوڏ کان پوءِ جي صورتحال جو جائزو ورتو ويو ۽ متاثرن جي امدادي سرگرمين سميت متاثر علائقن جي انفراسٽرڪچر جي بحاليءَ جو ڪم تيز ڪرڻ جو فيصلو ڪيو ويو. ان موقعي تي سينيٽر نثار کهڙي چيو ته سنڌ حڪومت ٻوڏ متاثر علائقن مان پاڻي جي فوري طور نيڪال جو ڪم جلد مڪمل ڪري ٻئي مرحلي ۾ متاثرن کي سندن گهرن ۾ آباد ڪندي. هن ڳالهائيندي وڌيڪ چيو ته عمران خان جي آڊيوز ليڪس مان سندس سازش وارو بيانيو ٽوپي ڊرامو ثابت ٿي چڪو آهي. عمران خان ڪوڙ تي سازشي بيانيو ٺاهي ملڪي مفادن کي نقصان پهچايو جنهن تي عمران خان خلاف ڪاروائي ڪئي وڃي. هن چيو ته گيم عمران خان جي هٿن مان نڪري چڪي آهي ۽ هو بند گهٽي ۾ ڦاسي چڪو آهي ان لاءِ هو ڪجهه به ڪري پر عام چونڊون وقت تي ئي ٿينديون. هن چيو ته اڌ ملڪ ٻوڏ جي زد ۾ آهي پر عمران خان جلسا جلسا کيڏي رهيو آهي. هن چيو ته عمران عدليه ۽ ادارن تي حملي آور ٿي چاهي ٿو ته ڪو ان سان ڳالهائي. هن چيو ته اقتدار مان نڪرڻ جي بيعزتي عمران خان جي اعصاب تي سوار تي ٿي چڪي آهي. عمران خان غرور جي انتها ۾ ڪٿي اڪيلو نه رهجي وڃي. هن چيو ته جلسا اسين به ڪري سگهون ٿا پر اسان جي لاءِ ملڪ جي معاشي بهتري ترجيح آهي ۽ ملڪ کي بهتر رخ ۾ وٺي وڃڻ لاءِ ڪنهن جو انتطار ڪرڻ بنا چارٽر آف اڪانامي ۽ چارٽر آف رائيٽس لاءِ ڪم ڪنداسين.
