پارا چنار(ويب ڊيسڪ)پ پ چيئرمين بلاول ڀٽو زرداري چيو آهي ته کلاڙي کي زبردستي وزيراعظم بڻائي ملڪ سان ظلم نه ڪرڻ گهرجي ها. پارا چنار ۾ جلسي کي خطاب ڪندي بلاول ڀٽو زرداري چيو ته هي مديني جي رياست نه پر هن رياست جي نالي جي توهين آهي، اها ڪهڙي رياست آهي جنهن ۾ اميرن لاءِ رليف ۽ غريبن لاءِ مهانگائي هجي؟ پ پ چيئرمين چيو ته هو معاشي ناڪامي ۽ بحران سبب تاريخي مهانگائي کي منهن ڏئي رهيا آهن، عمران خان چوندو هو ته 10 لک نوڪريون ڏيندس، آءِ ايم ايف وٽ نه ويندس پر آءِ ايم ايف وٽ ويندو ۽ ملڪ کي بچائيندو، معاشي خودمختياري جي ڳالهه ڪئي وئي. هن چيو ته عمران خان جي معاشي ناڪامي جو بار ملڪ جي غريب عوام کي بجلي جي بلن جي صورت ۾ برداشت ڪرڻو پيو، هر شعبي ۾ مهانگائي جو سونامي آهي. بلاول ڀٽو زرداري چيو ته ڪير به پنهنجي غلطيءَ کي مڃڻ لاءِ تيار ناهي پر وقت اچي ويو آهي ته گڏجي پاڪستان کي ٻڏڻ کان بچايو وڃي، اسان کي وقت جي فرعون سان وڙهڻو پوندو ۽ اڄ به وقت جي يزيد خلاف بيٺا آهيون، پارليامينٽ ۾ ميمبرن جي نمائندگي ۾ مان ٽئين نمبر تي آهيان. ڪردار ۾ پهريون درجو آهي.هن چيو ته بدترين مهانگائي ۽ ڪرپشن عمران جي دور ۾ ٿي آهي، مان اهو نٿو چوان پر ٽرانسپيرينسي وارا چون ٿا. مان عمران کي چوان ٿو ته ڪرپشن ڪرپشن جا ڪوڙ بند ڪر نه ته اسين خاتون اول جي ڪرپشن جا قصا عوام آڏو آڻينداسين. اهو به ٻڌائينداسين ته عثمان بوزدار پيسا ڪنهن کي ڏنا هئا. سلائي مشين جي ڪمائي مان آمريڪا م جائيداد ڪيئن خريد ڪئي وئي. هن چيو ته ڪجهه شيون ڏيکاري اسان ثابت ڪيو ته عمران خان جي حڪومت ختم ٿي چڪي آهي، ڪٺ پتلي حڪومت ختم ٿي چڪي آهي، اسان ڏيکاريو آهي ته عمران خان اڪثريت وڃائي چڪو آهي ان ڪري هو هاڻي وزيراعظم ناهي رهيو. جيڪڏهن توهان 172 ميمبر آڻي سگهو ٿا ته سڀاڻي آڻيو توهان کي وزيراعظم قبول ڪنداسين پر توهان آڻي نه سگهندا. ميمبر آڻيو يا بني گالا وڃو. هن چيو ته اڳ به عمران خان چوندو هو ته عدم اعتماد جي رٿ آڻيو، اسان 8 مارچ کان انتظار ڪري رهيا آهيون پر هي ڪهڙو ڪپتان آهي جيڪو پچ تان ڀڄي رهيو آهي، عمران خان ٿوري راند ڏيکاري. رانديگر ٿيو، جيڪڏهن توهان بهادر ۽ همت آهيو ته مقابلو ڪريو، جيڪڏهن توهان کي فخر آهي ته اڳتي اچو. وزيراعظم عمران خان کي خطاب ڪندي پ پ چيئرمين چيو ته هي شخص چوندو هو ته ڪشمير جو سفير بڻجي ويندس.
