ڪراچي: (اسٽاف رپورٽر) سنڌ جي گهرو ۽ قانون واري وزير ضياءَ الحسن لنجار جي صدارت هيٺ ٽرانسپورٽرز ايسوسيئيشنز جي وفدن سان اهم اجلاس، ٽرانسپورٽ برادري جا مسئلا حل ڪرڻ لاءِ هدايتون سنڌ جي گهرو ۽ قانون واري وزير ضياءَ الحسن لنجار جي صدارت هيٺ ٽرانسپورٽرز ايسوسيئيشنز جي وفدن سان اهم اجلاس منعقد ٿيو، جنهن ۾ ٽرانسپورٽ برادري کي درپيش مسئلن، خاص طور تي ڊرائيونگ لائسنس جي جاري ڪرڻ، ٿرڊ پارٽي موٽر وهيڪل انشورنس، ٽريفڪ مئنيجمينٽ ۽ امن امان سان لاڳاپيل معاملن جو تفصيلي جائزو ورتو ويو. ٽرانسپورٽرز جي نمائندن گهرو وزير کي ڪمرشل ۽ گڊز ٽرانسپورٽ آپريٽرز کي درپيش مسئلن کان آگاهه ڪيو. اجلاس ۾ خاص طور تي LTV ۽ HTV ڊرائيونگ لائسنس جاري ڪرڻ، ٿرڊ پارٽي انشورنس ۽ SITE، نارٿ ڪراچي سميت مختلف علائقن ۾ سيڪيورٽي سان لاڳاپيل معاملن تي غور ڪيو ويو. سنڌ جي گهرو وزير لاڳاپيل اختيارين کي هدايت ڪئي ته اهل ڊرائيورن کي سهولتون فراهم ڪيون وڃن ۽ مقرر ٽيسٽ ۽ سمورا قانوني گهرجون پوريون ڪندڙ ڊرائيورن کي LTV ۽ HTV لائسنس جاري ڪيا وڃن. ڊي آءِ جي ڊرائيونگ لائسنس اجلاس کي آگاهه ڪيو ته گهربل ٽيسٽ ڪاميابي سان مڪمل ڪندڙ ۽ مقرر قانوني گهرجون پوريون ڪندڙ اهل اميدوارن کي ڊرائيونگ لائسنس جاري ڪيا ويندا. اجلاس ۾ ٿرڊ پارٽي موٽر وهيڪل انشورنس جي معاملي تي پڻ تفصيلي غور ڪيو ويو. سيڪريٽري ايڪسائيز موجوده طريقيڪار ۽ ٽرانسپورٽرز پاران اٿاريل مسئلن جي حل لاءِ کنيل قدمن بابت بريفنگ ڏني. اجلاس کي ٻڌايو ويو ته پبلڪ ۽ ڪمرشل ٽرانسپورٽ سان لاڳاپيل انشورنس جا معاملا حڪومتي پاليسي ۽ لاڳو قانونن موجب حل ڪيا ويندا. سنڌ جي گهرو وزير سيڪريٽري ايڪسائيز، سيڪريٽري قانون، ڊي آءِ جي ڊرائيونگ لائسنس ۽ ڊي آءِ جي ٽريفڪ کي هدايت ڪئي ته گڏيل رابطي ۽ ڪوآرڊينيشن ذريعي ڊرائيونگ لائسنس ۽ موٽر وهيڪل انشورنس سان لاڳاپيل مسئلن جي قابلِ عمل حل لاءِ قدم کنيا وڃن. اجلاس ۾ ٽرڪ اسٽينڊز ۽ ٽرانسپورٽ ٽرمينلز لاءِ زمين سان لاڳاپيل معاملن جو پڻ جائزو ورتو ويو. سيڪريٽري ٽرانسپورٽ ان حوالي سان ٿيندڙ اڳڀرائي بابت اجلاس کي آگاهه ڪندي ٻڌايو ته معاملي جي حل لاءِ سمري مجاز اٿارٽي ڏانهن اماڻي وئي آهي. ٽرانسپورٽرز جي نمائندن SITE، نارٿ ڪراچي ناردرن باءِ پاس ۽ شهر جي ٻين علائقن ۾ ٽرانسپورٽرز کي درپيش سيڪيورٽي مسئلن جي پڻ نشاندهي ڪئي. سنڌ جي گهرو وزير معاملي جو نوٽيس وٺندي اجلاس ۾ موجود ايڊيشنل آءِ جي ڪراچي کي لاڳاپيل ضلعن ۽ علائقن ۾ ٽرانسپورٽرز لاءِ مناسب سيڪيورٽي انتظام يقيني بڻائڻ جي هدايت ڪئي. ٽريفڪ مئنيجمينٽ سان لاڳاپيل معاملن تي پڻ خيالن جي ڏي وٺ ڪئي وئي ۽ ڊي آءِ جي ٽريفڪ کي هدايت ڪئي وئي ته ٽريفڪ قانونن ۽ ضابطن تي عملدرآمد يقيني بڻائيندي ٽرانسپورٽرز کي درپيش جائز مسئلن جي حل لاءِ سهولتون فراهم ڪيون وڃن. ضياءَ الحسن لنجار ٽرانسپورٽرز جي وفدن کي يقين ڏياريو ته ٽرانسپورٽ برادري جا جائز مسئلا ترجيحي بنيادن تي حل ڪيا ويندا ۽ سمورا لاڳاپيل کاتا انهن مسئلن جي بروقت حل لاءِ ويجهو رابطو ۽ اثرائتي ڪوآرڊينيشن يقيني بڻائين. سنڌ جي گهرو وزير وڌيڪ چيو ته “ٽرانسپورٽرز معاشي سرگرمين ۽ مسافرن ۽ سامان جي آمدورفت ۾ اهم ڪردار ادا ڪن ٿا، انهن جا جائز مسئلا قانون ۽ حڪومتي پاليسي موجب حل ٿيڻ گهرجن.” اجلاس ۾ ايڊيشنل چيف سيڪريٽري گهرو، ڪمشنر ڪراچي، سيڪريٽري ٽرانسپورٽ اينڊ ماس ٽرانزٽ، سيڪريٽري قانون، سيڪريٽري ايڪسائيز، ايڊيشنل آءِ جي ڪراچي، ڊي آءِ جي ڊرائيونگ لائسنس، ڊي آءِ جي ٽريفڪ ۽ ٻين سينيئر عملدارن شرڪت ڪئي. جڏهن ته ٽرانسپورٽ برادري جي نمائندگي نثار حسين جعفري، چيئرمين آل پاڪستان گڊز ٽرانسپورٽ الائنس؛ ملڪ شهزاد اعوان، پاڪستان گڊز ٽرانسپورٽ الائنس؛ ملڪ شبر، سنڌ گڊز؛ ياسين نيازي، يونائيٽيڊ گڊز ٽرانسپورٽ الائنس؛ ۽ عبيد گل، جنرل سيڪريٽري ڪراچي گڊز ڪيريئر ايسوسيئيشن سميت ٻين نمائندن ڪئي.
