اسلام آباد (بيورو رپورٽ) پاڪستان تحريڪ انصاف (پي ٽي آءِ) جي چيئرمين بئريسٽر گوهر چيو آهي ته سياسي مسئلن جو سياسي حل ڳولڻ لاءِ هر پارٽي کي هڪ قدم پوئتي هٽڻ گهرجي.ان معاملي تي ڳالهائيندي بئريسٽر گوهر محسن نقوي سان ملاقاتن جي ترديد نه ڪئي ۽ چيو ته اهڙيون ملاقاتون ٿينديون رهنديون آهن ۽ ڳالهيون ٿيڻ گهرجن، پر هن وقت ماحول خاموش آهي ۽ اڃا تائين ڪا اڳڀرائي نه ٿي سگهي آهي. هن يقين ڏياريو ته احتجاج دوران ڪنهن به قانون جي ڀڃڪڙي نه ڪئي ويندي ۽ نه ئي رستا بند ڪيا ويندا، ۽ لانگ مارچ لاءِ سرڪاري وسيلن جو بلڪل به استعمال نه ڪيو ويندو. هن وڌيڪ چيو ته عدالت کي خيبر پختونخواهه جي انسپيڪٽر جنرل (آءِ جي) کان حلف نامي جو مطالبو نه ڪرڻ گهرجي ها، ۽ نه ئي اهڙو تاثر پيدا ڪرڻ گهرجي ها ته خيبر پختونخواهه جا ماڻهو ۽ پوليس پاڻ ۾ ٽڪرائجي سگهن ٿا. بئريسٽر گوهر ٻڌايو ته خيبر پختونخواهه پوليس جي آپريشنل صلاحيت وڌائڻ لاءِ ڪوششون جاري آهن ۽ صوبي گذريل سال پوليس کاتي تي 45 ارب رپيا خرچ ڪيا. هن وڌيڪ چيو ته اهي يقيني بڻائيندا ته پوليس جي معاملن ۾ ڪا به سياسي مداخلت نه ٿئي؛ جڏهن وڏي وزير کي پوليس تي اختيار ملندو ته هو اهي اختيار ذاتي پسند جي بنياد تي استعمال نه ڪندو، بلڪه فورس کي بهتر بڻائڻ لاءِ قدم کڻندو.
