تهران (ويب ڊيسڪ) ايران جي صدر مسعود پز شڪيان چيو آهي ته ايراني عوام هرگز هٿيار نه ڦٽا ڪندو، اڄ ايران هڪ ئي وقت اسرائيل ۽ آمريڪا ٻنهي جي سامهون ڪاميابيءَ سان ڊٽل آهي.نئين دهليءَ ۾ مذهبي اڳواڻن، دانشورن ۽ واپارين کي خطاب ڪندي ايراني صدر چيو ته اسرائيل ۽ آمريڪا ايران کي ڌمڪائڻ ۽ دٻاءُ وجهڻ جي ڪوشش ڪن ٿا، پر ملڪ اهڙي دٻاءُ اڳيان جهڪڻ کان انڪار ڪري ٿو.ايراني صدر زور ڏئي چيو ته اهي ڪڏهن به انهن اڳيان نه جهڪندا؛ جيڪڏهن کين مجبور ڪيو ويو ته اهي ڀرپور جواب ڏيندا.پز شڪيان نشاندهي ڪئي ته هڪ ئي لمحي ۾ اسڪول جا 168 ٻار شهيد ٿي ويا، ان باوجود ”توهان اسان کي دهشتگرد سڏيو ٿا؟“ هن انهن ماڻهن جي عملن تي سوال اٿاريو جيڪي انسانن کي قتل ڪن ٿا، سائنسدانن کي بم ڌماڪن جو نشانو بڻائين ٿا ۽ اسڪولن توڙي اسپتالن تي حملا ڪن ٿا.ايراني صدر کين چئلينج ڪندي چيو ته جيڪڏهن انهن ۾ همت آهي ته صرف فوجين ۽ عسڪري اهلڪارن سان وڙهن؛ هن سوال ڪيو ته اهي بنيادي ڍانچي، ماڻهن جي روزگار ۽ گذر سفر جي ذريعن کي ڇو نشانو بڻائين ٿا.قابلِ ذڪر آهي ته ايراني صدر مسعود پز شڪيان هن وقت ”برڪس“ (BRICS) سربراهي اجلاس ۾ شرڪت لاءِ ڀارت جي گاديءَ واري شهر نئين دهليءَ ۾ موجود آهن.
