انگلينڊ کي عالمي ڪپ جي سيمي فائنل ۾ ارجنٽينا خلاف اهڙو موقعو مليو آهي، جيڪو کيس هميشه لاءِ فٽبال جي تاريخ ۾ امر بڻائي سگهي ٿو. اربع ۽ خميس جي وچ واري رات 12 هين وڳي ٿيندڙ هي مقابلو 1966ع ۾ ويمبلي اسٽيڊيم تي عالمي ڪپ کٽڻ کانپوءِ انگلينڊ جي سڀ کان وڏي ميچ قرار ڏني پئي وڃي.
گذريل ڇهن ڏهاڪن دوران انگلينڊ صرف ٻه ڀيرا عالمي ڪپ جي سيمي فائنل تائين پهتو آهي، پهريون ڀيرو 1990ع ۾ اٽلي ۾ ۽ پوءِ اٺ سال اڳ روس ۾. پر هن ڀيري ارجنٽينا سان مقابلو پراڻي رقابت، تاريخي پسمنظر ۽ تڪراري واقعن سبب وڌيڪ اهميت اختيار ڪري ويو آهي.
انگلينڊ گذريل ٻن يورپي چيمپيئن شپ جي فائنلن ۾ شڪست کائي چڪو آهي، پر ائٽلانٽا جي جديد اسٽيڊيم ۾ هيڊ ڪوچ ٿامس ٽوخل ۽ سندس رانديگرن وٽ اهو موقعو آهي ته هو 60 سالن کان پوءِ انگلينڊ کي پهرين مردن جي عالمي ڪپ جي فائنل تائين پهچائي پنهنجو نالو تاريخ ۾ لکرائي ڇڏين.
ٽوخل جي ميچ کان اڳ واري پريس ڪانفرنس کي وڏي هال ۾ منتقل ڪرڻ باوجود هر سيٽ ڀرجي وئي، جنهن مان هن مقابلي بابت عالمي دلچسپي جو اندازو لڳائي سگهجي ٿو.
هي ميچ انگلينڊ لاءِ هڪ ٻيو موقعو آهي ته هو آخرڪار عالمي ڪپ جي فائنل تائين پهچي، جيڪو 1966ع ۾ سر الف ريمزي جي ٽيم پاران جولز ريمي ٽرافي کٽڻ کان پوءِ اڃا تائين ممڪن نه ٿي سگهيو آهي.
ڇا هاڻي “تقريباً ڪامياب” انگلينڊ منزل ماڻيندو؟
وڏن عالمي مقابلن ۾ انگلينڊ جي تازي ڪارڪردگي سٺي رهي آهي، پر ايتري سٺي نه، جو ٽرافي کٽي سگهي. ٽيم هر ڀيري منزل جي ويجهو پهچي ٿي، پر آخري قدم کڻڻ ۾ ناڪام رهي آهي.
اعليٰ سطح جي فٽبال ۾ اصل اهميت صرف ٽرافين جي هوندي آهي، ۽ انگلينڊ لاءِ اڃا تائين اها ڪاميابي هڪ اذيتناڪ خواب بڻيل آهي.
2018ع جي عالمي ڪپ ۾ سيمي فائنل تائين پهچڻ کي وڏي ڪاميابي سمجهيو ويو، پر ڪروشيا خلاف شروعاتي پنجين منٽ ۾ ڪيران ٽرپيئر جي گول کانپوءِ انگلينڊ دفاعي انداز اختيار ڪري ورتو ۽ اضافي وقت ۾ 2-1 تان هارائي ويو.
ان کان پوءِ ڪووڊ-19 سبب ملتوي ٿيل يورو 2020 جو فائنل جولاءِ 2021ع ۾ ويمبلي تي ٿيو. ان ميچ ۾ به انگلينڊ ٻئي منٽ ۾ لُڪ شا جي گول سان اڳتي نڪري ويو، پر وري ساڳي بي عملي جو شڪار ٿيو ۽ آخرڪار اٽلي هٿان پينالٽين تي هارائي ويو. اها ساڳي اٽلي هئي، جيڪا ان کانپوءِ لڳاتار ٽن عالمي ڪپن لاءِ به ڪواليفائي نه ڪري سگهي.
چار سال اڳ قطر ۾ عالمي ڪپ جي ڪوارٽر فائنل ۾ فرانس خلاف شڪست رڳو اها هئي ته هڪ سٺي ٽيم کان وڌيڪ مضبوط ٽيم کٽي وئي، جيتوڻيڪ آخري لمحن ۾ هيري ڪين جي پينالٽي وڃائڻ سبب اها مايوسي وڌيڪ وڌي وئي.
يورو 2024ع تائين انگلينڊ جو سفر به گهڻو متاثر ڪندڙ نه هو، ۽ آخرڪار برلن جي فائنل ۾ اسپين کيس 2-1 تان شڪست ڏئي ڇڏي.
ٿامس ٽوخل چيو: “هاڻي اسان آخري قدم به کڻڻ چاهيون ٿا. اسان اڳتي وڌڻ چاهيون ٿا. مون کي پنهنجي ٽيم جي ماحول ۽ توانائي تمام پسند آهي. رانديگر انتهائي پرجوش ۽ وڏي عزم وارا آهن، ۽ اهڙي جذبي جي ئي هن ميچ ۾ ضرورت آهي.”
ڇهه ڏهاڪن تي پکڙيل تڪرارن جي تاريخ
ارجنٽينا خلاف هي سيمي فائنل 1990ع ۾ اولهه جرمني يا 2018ع ۾ ڪروشيا خلاف کيڏيل سيمي فائنلن کان مختلف آهي، ڇاڪاڻ ته ٻنهي ملڪن جي وچ ۾ 1966ع کان وٺي شديد راندين واري رقابت ۽ تڪرارن جي ڊگهي تاريخ موجود آهي.
1966ع جي ڪوارٽر فائنل ۾ ارجنٽينا جي ڪپتان انتونيو راٽن کي ريڊ ڪارڊ ڏنو ويو، جنهن کانپوءِ سندس ساٿي رانديگر ميدان ڇڏڻ جي ڌمڪي ڏيڻ لڳا.
11 جولاءِ تي 89 ورهين جي عمر ۾ فوت ٿيندڙ راٽن کي وڏي مشڪل سان ميدان کان ٻاهر موڪليو ويو، جڏهن ته ميچ کانپوءِ انگلينڊ جي ڪوچ الف ريمزي پنهنجي رانديگرن کي ارجنٽينا جي رانديگرن سان شرٽون مٽائڻ کان روڪي ڇڏيو ۽ بعد ۾ کين “جانور” قرار ڏنو.
1986ع ۾ ميڪسيڪو جي ازٽيڪا اسٽيڊيم ۾ ٻنهي ٽيمن جو ٻيهر مقابلو ٿيو، جنهن وقت فالڪ لينڊ جنگ کي صرف چار سال ٿيا هئا.
اهو ئي اهو مشهور ميچ هو، جنهن ۾ ڊياگو ماراڊونا جو تڪراري “هينڊ آف گاڊ” گول ۽ پوءِ سندس تاريخي انفرادي گول ڏسڻ ۾ آيو. ارجنٽينا 2-1 تان کٽي آخرڪار عالمي چيمپيئن به بڻيو.
1998ع جي عالمي ڪپ ۾ آخري 16 جي ميچ دوران ڊيوڊ بيڪهم، ڊياگو سيميوني کي لت هڻڻ سبب ريڊ ڪارڊ ڏٺو، جڏهن ته 18 ورهين جي مائيڪل اوون پنهنجي شاندار سولو گول سان عالمي شهرت حاصل ڪئي.
ميچ پينالٽين تائين پهتي، جتي ارجنٽينا کٽي وئي ۽ انگلينڊ کي هڪ ٻي عالمي مايوسي ملي.
2002ع ۾ جاپان جي ساپورو شهر ۾ ٿيل گروپ ميچ ۾ بيڪهم پينالٽي ذريعي واحد گول ڪري انگلينڊ کي فتح ڏياري، پر ارجنٽينا الزام هنيو ته مائيڪل اوون، مورسيو پوچيٽينو جي چئلينج دوران ڊائيو هنئي هئي.
ٽوخل چيو: “هي دنيا جي ٻن وڏين فٽبال قومن جي وچ ۾ وڏي رقابت آهي. مان چئي سگهان ٿو ته تاريخ اهم ناهي، پر حقيقت ۾ اها اهم آهي. رانديگر به ان کان واقف آهن. جڏهن ٻنهي ٽيمن جي وچ ۾ ايترا يادگار لمحا موجود هجن ته ان کي عام فٽبال ميچ نٿو چئي سگهجي.”
ارجنٽينا جي ڪوچ ليونيل اسڪالوني چيو: “اسان سڀني وٽ هن تاريخ سان لاڳاپيل پنهنجون يادون آهن، ۽ اهو سڀ ڪجهه هن مقابلي کي وڌيڪ جذباتي بڻائي ٿو.”
ميسي جو آخري عالمي ڪپ؟
ڇا هي عالمي ڪپ ارجنٽينا جي سپر اسٽار ليونيل ميسي جي آخري عالمي مهم هوندي؟ هن قطر 2022ع ۾ آخرڪار عالمي ڪپ کٽي پنهنجو وڏو خواب پورو ڪيو ۽ 2014ع ۾ جرمني هٿان فائنل ۾ شڪست سميت پراڻيون مايوسيون ختم ڪيون. هاڻي ميسي 39 ورهين جو ٿي چڪو آهي، پر سندس ذهانت، مهارت ۽ راند ڪرڻ جي صلاحيت اڃا به برقرار آهي، جيتوڻيڪ هو هاڻي گهڻو وقت هلندي کيڏندو آهي.
هن عالمي ڪپ دوران ميسي پنهنجي ڪل ڊوڙيل فاصلي جو 47 سيڪڙو حصو هلندي طئي ڪيو آهي، جيڪو ٽورنامينٽ جي ڪنهن به آئوٽ فيلڊ رانديگر کان وڌيڪ آهي. تنهن هوندي به ميسي اڃا تائين ارجنٽينا جي سڀ کان وڏي اميد آهي.
آخري 16 ۾ مصر خلاف ارجنٽينا 2-0 تان پوئتي هئي، پر آخري 11 منٽن ۾ ٽي گول ڪري ميچ کٽي ورتي. ان فتح کانپوءِ ميسي جون خوشيءَ ۽ راحت جا ڳوڙها سندس جذبي جو ثبوت هئا.
ٿامس ٽوخل چيو: “ميسي لاجواب آهي. سندس ڪاميابين، معيار ۽ قيادت بابت چوڻ لاءِ لفظ ئي ناهن بچيا. هو هر ٽيم جو اهم ترين رانديگر هوندو آهي، ۽ هن ارجنٽينا ٽيم ۾ به ساڳي حيثيت رکي ٿو.”
ڪين ۽ بيلنگهم انگلينڊ جي وڏي اميد
انگلينڊ وٽ تاريخ رقم ڪرڻ جو موقعو آهي، ۽ جوڊ بيلنگهم ۽ هيري ڪين جهڙا ٻه عالمي معيار جا رانديگر ٽيم کي سيمي فائنل تائين وٺي آيا آهن.
ٻئي طرف ٿامس ٽوخل دنيا جي سڀ کان وڌيڪ عزت لائق ڪوچن مان هڪ آهي، جنهن 2021ع ۾ چيلسي کي چيمپيئنز ليگ کٽرائي ناڪ آئوٽ مرحلن ۾ پنهنجي مهارت ثابت ڪئي هئي.
انگلينڊ هن عالمي ڪپ ۾ هيل تائين 13 گول ڪيا آهن، جن مان 12 گول صرف بيلنگهم ۽ هيري ڪين ڪيا آهن. ٻيو واحد اسڪور ڪندڙ مارڪس راشفورڊ آهي، جنهن ڪروشيا خلاف افتتاحي ميچ ۾ آخري گول ڪيو هو.
هي انگ ظاهر ڪن ٿا ته انگلينڊ گهڻي ڀاڱي انهن ٻن رانديگرن تي ڀاڙي رهيو آهي، پر ساڳئي وقت اهو به ثابت ڪن ٿا ته ٻئي پنهنجي ڪيريئر جي بهترين فارم ۾ آهن.
جيئن انگلينڊ کي ڪجهه ميچن ۾ ڏکيائين کي منهن ڏيڻو پيو، تيئن ارجنٽينا به ڪيپ ورڊي، مصر ۽ سوئٽزرلينڊ خلاف ناڪ آئوٽ مرحلن ۾ مشڪل سان اڳتي وڌي.
ٻئي ٽيمون خطري جي ڪناري تائين پهتيون آهن، ۽ ٿامس ٽوخل کي اميد هوندي ته هن ڀيري ارجنٽينا ان خطري مان بچي نه سگهندي.
