سڊني(ويب ڊيسڪ)آسٽريليا جي بونڊي بيچ تي فائرنگ جي واقعي کان پوءِ 12 ماڻهو فوت ٿي ويا آهن ــ جن ۾ هڪ هٿياربند حمله آور به شامل آهي ــ هي حملو يهودي برادري جي حنوڪا جي پهرين ڏينهن تي نشانو بڻايو ويو هو.. هڪ حملو ڪندڙ جي سڃاڻپ نويد اڪرم طور ٿي آهي، جنهن جي پوليس نيشنلٽي ظاهر نه پئي ڪري، سندس گهر تي ڇاپو هڻي تلاشي به ورتي وئي آهي.
پوليس موجب، واقعي دوران 29 ٻين ماڻهن کي اسپتال منتقل ڪيو ويو، جڏهن ته ٻه پوليس اهلڪار به گولين جو نشانو بڻيا. اختيارين هن واقعي کي دهشتگرد حملو قرار ڏنو آهي. جيئرو بچيل هڪ ٻيو هٿياربند انتهائي نازڪ حالت ۾ آهي.
بيچ تي حنوڪا جي تقريب ۾ 1,000 کان وڌيڪ ماڻهو شرڪت ڪري رهيا هئا. نيو سائوٿ ويلز جي وزيراعليٰ ڪرس منس چيو ته: “اڄ رات آسٽريليا جي يهودي برادري لاءِ اسان جون دليون رت روئي رهيون آهن. مان صرف اهو تصور ڪري سگهان ٿو ته جڏهن هو هن قديم مذهبي عيد جي خوشي ملهائي رهيا هئا، تڏهن پنهنجن پيارن جي قتل کي ڏسي کين ڪيترو ڏک پهتو هوندو.”
آسٽريليا ۾ اجتماعي فائرنگ جا واقعا تمام گهٽ ٿيندا آهن، ۽ بونڊي بيچ تي ٿيل هي حملو 1996ع ۾ پورٽ آرٿر ۾ ٿيل قتلِ عام کان پوءِ سڀ کان وڌيڪ جاني نقصان وارو واقعو آهي، ان واقعي ۾ هڪ اڪيلي هٿياربند 35 ماڻهن کي قتل ڪيو هو.
بونڊي بيچ ڪٿي آهي؟
بونڊي بيچ نيو سائوٿ ويلز رياست ۾، سڊني جي اوڀر حصي ۾، آسٽريليا جي اوڀر ڪناري تي واقع آهي. هي آسٽريليا جي سڀ کان وڌيڪ مشهور سامونڊي ڪنارن مان هڪ آهي، جتي هر سال لکين سياح ايندا آهن، ۽ هي علائقو سياحت لاءِ انتهائي اهم حيثيت رکي ٿو.
بونڊي بيچ تي ڇا ٿيو؟
نيو سائوٿ ويلز پوليس مقامي وقت موجب شام 6:47 وڳي فائرنگ جي اطلاع تي پهتي، جڏهن وڊيوز ۾ سوين ماڻهن کي سامونڊي ڪناري کان ڀڄندي ڏٺو ويو. پوليس پنهنجي شروعاتي بيان ۾ ماڻهن کي محفوظ جاءِ تي لڪڻ ۽ عام ماڻهن کي علائقي کان پري رهڻ جي هدايت ڪئي. ان ئي وقت مقامي ميڊيا ڪيمبل پريڊ جي ڀرپاسي ماڻهن جي زمين تي ليٽي پوڻ جون خبرون ڏيڻ لڳي.
بي بي سي طرفان تصديق ٿيل هڪ وڊيو ۾ ٻه هٿياربند هڪ ننڍڙي پُل تان فائرنگ ڪندي نظر اچن ٿا، جيڪا ڪيمبل پريڊ جي ڪار پارڪ کان سڌي بيچ ڏانهن وڃي ٿي. يهودي عيد حنوڪا جي پهرين ڏينهن جي تقريب بونڊي بيچ تي، ان ئي پُل جي ويجهو ٿي رهي هئي، جتان حمله آور فائرنگ ڪري رهيا هئا. تقريب ۾ 1,000 کان وڌيڪ ماڻهو موجود هئا.
وزيراعليٰ منس ان شخص کي به خراجِ تحسين پيش ڪيو، جنهن وڊيو ۾ هڪ حمله آور کان بندوق کسيندي ڏٺو ويو. هن چيو: “اهو شخص سچ پچ هڪ هيرو آهي، ۽ مون کي ڪو شڪ ناهي ته سندس بهادري سبب اڄ رات ڪيترين ئي زندگين کي بچايو ويو.”
وڊيو ۾ ڏسي سگهجي ٿو ته اهو شخص حمله آور جي پويان وڃي کيس ٻانهن ۾ جڪڙي ٿو. ان کان پوءِ هٿيار کسيل حمله آور واپس پُل ڏانهن هٽي ٿو، جتي ٻيو حمله آور اڃا فائرنگ ڪري رهيو هو. وڊيو جي جاري رهڻ دوران، هڪ ٻيو شخص زخمي حالت ۾ ڀڄندو نظر اچي ٿو، ۽ پوءِ هڪ پوليس اهلڪار پويان کان اچي حمله آورن تي فائر کولي ٿو.
هڪ ٻئي تصديق ٿيل وڊيو ۾ ساڳئي پُل تي ڪيترائي پوليس اهلڪار نظر اچن ٿا، جن مان هڪ بي جان ماڻهو کي سي پي آر ڏيندي نظر اچي ٿو، جڏهن ته ڪو ماڻهو رڙيون ڪري ٿو: “هو مري ويو آهي، هو مري ويو آهي.”
ڪيترا ماڻهو مارجي ويا ۽ زخمي ٿيا؟
پوليس موجب، هي حملو بيچ تي ٿيندڙ حنوڪا تقريب کي نشانو بڻايو ويو. پوليس تصديق ڪئي آهي ته 12 ماڻهو، جن ۾ هڪ هٿياربند به شامل آهي، مارجي ويا آهن. ٻيو هٿياربند انتهائي نازڪ حالت ۾ آهي. اختيارين جو چوڻ آهي ته 29 ماڻهن کي اسپتال منتقل ڪيو ويو، جڏهن ته ٻه پوليس اهلڪار به زخمي ٿيا آهن.
هڪ اکين ڏٺي شاهد بيري، جيڪو پنهنجي ٻارن سان گڏ حنوڪا تقريب ۾ موجود هو، ٻڌايو ته هن ٻن ماڻهن کي پُل تان فائرنگ ڪندي ڏٺو. هن چيو ته زمين تي لاش پيل هئا، ۽ هو پنهنجي ٻارن سميت هڪ دوست جي ڪار ۾ فرار ٿيڻ ۾ ڪامياب ٿي ويو.
تازي صورتحال ڇا آهي؟
پوليس آچر واري فائرنگ کي دهشتگرد حملو قرار ڏنو آهي. واقعي واري هنڌ جي چوڌاري سيڪيورٽي زون قائم ڪيو ويو آهي، جتي پوليس خاص سامان ذريعي هڪ ڪار مان هٿ آيل هٿرادو ڌماڪيدار مواد (IEDs) جي جاچ ڪري رهي آهي، جيڪا مارجي ويل هٿياربند سان لاڳاپيل ٻڌائي وڃي ٿي. پوليس عوام کي اڃا به علائقي کان پري رهڻ جي هدايت ڪري رهي آهي.
نيو سائوٿ ويلز پوليس ڪمشنر مال لينن پريس ڪانفرنس ۾ چيو: “جاچ ۾ ڪا به ڪسر نه ڇڏي ويندي.” هن چيو ته في الحال هٿياربندن بابت ڪا به ڄاڻ ظاهر نه ڪئي ويندي ۽ عوام کي سڪون رکڻ جي اپيل ڪئي، ۽ چيو ته “هي بدلي وٺڻ جو وقت ناهي.” لينن وڌيڪ چيو ته پوليس هڪ شڪي شخص بابت اڳ ۾ واقف هئي، پر ان بابت “تمام گهٽ ڄاڻ” موجود هئي. پوليس اهو به واضح نه ڪري سگهي آهي ته ٽيون هٿياربند به شامل هو يا نه، پر جاچ جاري آهي.
بعد ۾ آسٽريليا جي انٽيليجنس سربراهه مائيڪ برگس چيو ته اڃا تفصيل ڏيڻ لاءِ وقت کان اڳ آهي، پر هن چيو: “انهن مان هڪ شخص اسان کي ڄاڻايل هو، پر فوري خطري طور نه، تنهنڪري هاڻي اسان کي ڏسڻو پوندو ته ڇا ٿيو.”
ٽيليويزن خطاب ۾ آسٽريليا جي وزيراعظم اينٿوني البانيزي بونڊي بيچ فائرنگ کي
“يهودين خلاف نفرت، دهشتگردي ۽ قوم جي دل تي وار” قرار ڏنو. هن چيو: “اڄ اسان ڏٺو ته آسٽريليائي شهري خطري ڏانهن ڊوڙيا ته جيئن ٻين جي مدد ڪري سگهن. اهي ماڻهو هيرو آهن، ۽ سندن بهادري زندگيون بچايون آهن.”
حنوڪا ڇا آهي؟
حنوڪا، جنهن کي عبراني ۾ چانوڪا چيو وڃي ٿو، يهودين جي روشنيءَ جي عيد آهي. لفظ حنوڪا جو مطلب “وقف” آهي، ۽ هي يهودي تاريخ جي هڪ وڏي معجزي جي ياد ۾ ملهايو ويندو آهي. حنوڪا جون تاريخون هر سال بدلجن ٿيون، پر هي تقريب هميشه نومبر يا ڊسمبر ۾ ايندي آهي ۽ اٺ ڏينهن جاري رهندي آهي. هي تقريب بونڊي جي يهودي مرڪز چاباد طرفان منظم ڪئي وئي هئي، جنهن ۾ هر عمر لاءِ تفريحي پروگرام ۽ سرگرميون شامل هيون، ۽ لڳ ڀڳ 1,000 ماڻهو شرڪت ڪري رهيا هئا.
