اسلام آباد (اياز مهر) جنرل پرويز مشرف 12 آڪٽوبر 1999 تي تڏهوڪي چونڊيل وزيراعظم ميان نواز شريف جو تختو اونڌو ڪري اقتدار تي قبضو ڪيو.*** هن جي آئين معطل ڪرڻ واري فيصلي کي سپريم ڪورٽ جائز قرار ڏنو ۽ اهو فيصلو ڏيندڙن ۾ افتخار محمد چوڌري به شامل هو.***3 نومبر 2007 تي هن ٻيهر ملڪ ۾ ايمرجنسي لاڳو ڪري 3 نومبر کان 15 ڊسمبر تائين آئين معطل ڪيو، سپريم ڪورٽ ۽ مختلف هاءِ ڪورٽس جي 61 ججن کي گرفتار ڪيو ويو ۽ نجي ٽي وي چينلز جي نشريات بند ڪئي وئي رڳو پي ٽي وي تي سرڪاري اعلان نشر ٿيندا رهيا *** 28 نومبر 2007 تي هن آرمي چيف جو عهدو ڇڏيو ۽ جنرل اشفاق پرويز ڪياني کي آرمي چيف ٺاهيو.***29 نومبر پرويز مشرف بطر عوامي صدر حلف کنيو***15 ڊسمبر 2007 تي هن آئين بحال ڪيو ۽ پي سي او واپس ورتو ، سپريم ڪورٽ ۽ هاءِ ڪورٽس جي ججن بحال ڪيل آئين هيٺ نئون حلف کنيو***7 جون 2008 تي هن اعلان ڪيو ته هو استعيفيٰ نه ڏيندو نه ئي جلاوطن ٿيڻ جو سندس ارادو آهي***پيپلز پارٽي جي حڪومت پرويز مشرف جي مواخذي جو اعلان ڪيو جنهن جي نتيجي ۾ هن 18 آگسٽ 2008 تي صدر جي عهدي تان استعيفيٰ جو اعلان ڪيو ۽ سندس 9 سالن جي دور جي پڄاڻي ٿي***22 جولاءِ 2009 تي عدالت مشرف کي 3 نومبر 2007 تي لاڳو ڪيل ايمرجنسي بابت ڪيس ۾ طلب ڪيو***پهرين آگسٽ 2009 تي سپريم ڪورٽ پرويز مشرف جي 3 نومبر وارن اپائن کي غير آئيني قرار ڏنو***6 آگسٽ 2009 تي پرويز مشرف برطانيا هليو ويو ۽ عدالت ۾ ڪو جواب داخل نه ڪيو
***8 جون 2010 تي سندس ساٿين آل پاڪستان مسلم ليگ نالي سياسي جماعت ٺاهي جنهن جو سربراه پرويز مشرف بڻيو***22 مارچ 2013 تي هن وطن واپسي کان اڳ 10 ڏينهن جي حفاظتي ضمانت ڪرائي***24 مارچ 2013 تي هو خود ساخته جلاوطني ختم ڪري چونڊ وڙهن لاءِ واپس آيو***29 مارچ 2013 تي سنڌ هاءِ ڪورٽ هن جي ضمانت ۾ واڌ ڪندي پرڏيهه وڃڻ تي پابندي لڳائي ۽ سندس نالو اي سي ايل ۾ داخل ڪرڻ جو حڪم ڏنو***5 اپريل 2013 تي سپريم ڪورٽ ڪيس جي سماعت جي منظوري ڏني***7 اپريل 20013 تي تڏهوڪي چيف جسٽس افتخار محمد چوڌري هن ڪيس کان ڌار ٿيڻ جو اعلان ڪيو***18 اپريل 2013 تي اسلام آباد هاءِ ڪورٽ مان ضمانت رد ٿيڻ بعد هو عدالت مان فرار ٿي ويو***19 اپريل تي هن ججز کي حراست ۾ وٺڻ واري ڪيس ۾ مئجسٽريٽ آڏو سرينڊر ڪيو ۽ حڪومت سندس چڪ شهزاد واري فارم هائوس کي سب جيل قرار ڏئي گهر ۾ نظر بند ڪيو***30 اپريل 2013 تي پشاور هاءِ ڪورٽ مشرف جي قومي اسمبلي ۽ سينٽ جي چونڊ حصو وٺڻ تي پابندي هڻي ڇڏي***14 جون 2013 تي هن ڪيس کان تڏهوڪو وزير قانون زاهد حماد علحدگي اختيار ڪندي چيو ته ايمرجنسي نافذ ڪرڻ جو فيصلو مشرف پاڻ ڪيو هو***24 جون 2013 تي وزيراعظم نواز شريف مشرف خلاف آئين جي سنگين خلاف ورزي تي بغاوت جو ڪيس داخل ڪرڻ جو اعلان ڪيو***18 نومبر 2013 تي چيف جسٽس افتخار محمد چوڌري بغاوت جي ڪيس جي ٻڌڻي لاءِ خصوصي ٽريبونل ٺاهڻ جو اعلان ڪيو***20 ڊسمبر 2013 تي پرويز مشرف پنهنجي دور حڪومت ۾ غلطين تي معافي ورتي***2 جنوري 2014 تي پرويز مشرف سنگين غداري ڪيس ۾ پيشي لاءِ وڃي رهيو هو ته کيس دل ۾ تڪليف ٿي ۽ عدالت بدران کيس راولپنڊي جي فوجي اسپتال ۾ داخل ڪيو ويو
***7 جنوري 2014 تي آرمڊ فورسز انسٽيٽيوٽ آف ڪارڊيولوجي عدالت ۾ رپورٽ جمع ڪرائي ته مشرف جي دل جون 3 شريانون بند آهن ۽ کيس 8 ٻيون به بيماريون لاحق آهن***7 فيبروري 2014 تي عدالت پرويز مشرف کي ٻيهر طلب ڪيو***18فيبروري 2014 ۾ مشرف عدالت ۾ پيش ٿيو ۽ ان وقت تائين 22 پيشيون ٿي چڪيون هيون، هن تي فرد جرم عائد نه ٿي سگهيو سندس وڪيلن چيو ته هن تي ڪيس فوجي عدالت ۾ هلن گهرجي***21 فيبروري 2014 تي عدالت حڪم جاري ڪيو ته ڪيس فوجي عدالت ۾ نه هلندو***30 مارچ 2014 تي مٿس فرد جرم عائد ڪئي وئي ۽ هن صحت جرم کان انڪار ڪيو***3 اپريل 2014 تي هن سپريم ڪورٽ ۾ درخواست داخل ڪئي ته سندس نالو اي سي ايل مان ڪڍيو وڃي جيئن هو بيمار والدهه جي عيادت لاءِ شارجه وڃي سگهي***7 اپريل 2014 تي آرمي چيف جنرل راحيل شريف بيان ڏنو ته فوج جي وقار جو تحفظ ڪيو ويندو***14 مئي 2014 تي ايف آءِ اي سنگين غداري ڪيس ۾ ثبوت عدالت ۾ پيش ڪيا***12 جون 2014 تي سنڌ هاءِ ڪورٽ سندس نالو اي سي ايل مان ڪڍڻ جو فيصلو ڏنو*** 14 جون 2014 تي وفاقي حڪومت سنڌ هاءِ ڪورٽ جي حڪم خلاف اپيل داخل ڪئي***23 جون 2014 تي سپريم ڪورٽ پرويز مشرف کي پرڏيهه وڃڻ جي اجازت ڏني***22 ڊسمبر 2015 تي پرويز مشرف بيان ڏنو ته هن جنرل ڪياني، وزيراعظم شوڪت عزيز ۽ ٻين سان مشاورت بعد ايمرجنسي نافذ ڪئي هئي.***16 مارچ 2016 تي سپريم ڪورٽ علاج لاءِ کيس پرڏيهه وڃڻ جي اجازت ڏيندي سندس نالو اي سي ايل مان خارج ڪرڻ جو حڪم ڏنو***18 مارچ تي پرويز مشرف چيو ته هو علاج لاءِ ٻاهر ٿو وڃي ۽ ڪجهه هفتن بعد موٽي ايندو
***11 مئي 2016 تي خصوصي عدالت پرويز مشرف کي مفرور قرار ڏنو***10 نومبر 2017 تي مشرف سياسي جماعتن جي اتحاد ٺاهڻ جو اعلان ڪيو***29 مارچ 2018 تي خصوصي عدالت جي جج جسٽس يحيٰ آفريدي بينچ کان علحدگي جو اعلان ڪيو***7 اپريل 2018 تي چيف جسٽس ثاقب نثار مشرف ٽرائل لاءِ ٻيهر خاص عدالت قائم ڪئي***31 مئي 2018 ۾ خصوصي عدالت جي حڪم تي مشرف جو شناختي ڪارڊ ۽ پاسپورٽ بند ڪرڻ جو حڪم ڏنو***29 آگسٽ تي عدالت کي ٻڌايو ويو ته انٽرپول مشرف جو ريڊ وارنٽ جاري ڪرڻ کان انڪار ڪيو آهي. مشرف سيڪورٽي جو بهانو بڻائي ملڪ اچڻ کان انڪار ڪيو***31 مارچ 2019 تي سپريم ڪورٽ چيو ته مشرف سنگين غداري ڪيس ۾ پيش ٿئي ٻئي صورت ۾ هو دفاع جي حق کان محروم ٿي ويندو***پهرين اپريل 2019 تي چيف جسٽس آصف سعيد کوسه چيو ته مشرف نه آيو ته سندس بيان کانسواءِ خصوصي عدالت ڪاروائي هلائي***11 جون 2019 تي سپريم ڪورٽ مشرف جو سناختي ڪارڊ ۽ پاسپورٽ بحال ڪرڻ جو حڪم ڏنو***8 آڪٽوبر تي عدالت 24 آڪٽوبر کان روزانو ٻڌڻي جو اعلان ڪيو*** عمران خان جي حڪومت 24 آڪٽوبر تي هن ڪيس جي پراسيڪيوشن ٽيم کي برطرف ڪري ڇڏيو***19 نومبر 2019 تي خصوصي عدالت ڪيس جي ٻڌڻي مڪمل ڪندي فيصلو محفوظ ڪيو ۽ 28 نومبر تي ٻڌائڻ جو اعلان ڪيو***25 نومبر تي وفاقي وزارت داخله اسلام آباد هاءِ ڪورٽ ۾ درخواست ڏني ته خصوصي عدالت کي محفوظ ڪيل فيصلو ٻڌائڻ کان روڪيو*** 27 نومبر تي اسلام آباد هاءِ ڪورٽ خصوصي عدالت کي فيصلو ٻڌائڻ کان روڪي ڇڏيو
***28 نومبر تي خصوصي عدالت چيو ته هو اسلام آباد هاءِ ڪورٽ جي فيصلي جا پابند ناهن***3 ڊسمبر 2019 تي اسلام آباد هاءِ ڪورٽ چيو ته خصوصي عدالت سندن حڪم مڃڻ جي پابند آهي*** 4 ڊسمبر تي پرويز مشرف جو ويڊيو بيان آيو ته خصوصي عدالت سندس موقف ٻڌڻ کانسواءِ هڪ طرفو فيصلو ڪرڻ چاهي ٿي ۽ انصاف جي تقاضا پوري نٿي ڪئي وڃي***5 ڊسمبر 2019 تي خصوصي عدالت 17 دسمبر تائين مهلت ڏيندي چيو ته ان ڏينهن دليل ٻڌڻ بعد فيصلو ڏنو ويندو*** 17 دسمبر تي عدالت پرويز مشرف کي سنگين غداري ڪيس ۾ موت جي سزا ٻڌائي ڇڏي. ٽن مان ٻن ججن موت جي سزا تي اتفاق ڪيو جن ۾ پشاور هاءِ ڪورٽ جو چيف جسٽس وقار احمد سيٺ ۽ لاهور هاءِ ڪورٽ جو جسٽس شاهد ڪريم شامل آهن جڏهن ته سنڌ هاءِ ڪورٽ جي جسٽس نذر اڪبر ان سان اختلاف ڪيو آهي.