ڪراچي (اسٽاف رپورٽر) سنڌ جي نگران وڏي وزير جسٽس (ر) مقبول باقر وزيراعظم هائوس اسلام آباد ۾ وزيراعظم انوارالحق ڪاڪڙ سان ملاقات ڪئي جنهن ۾ سندس صوبي جي 5 اهم ترقياتي منصوبن تي خيالن جي ڏي وٺ ڪئي ۽ کين زور ڏنو ته صوبي جي اهم منصوبن تي رڪاوٽن کي ختم ڪيو وڃي ۽ منصوبن کي وقت سِر مڪمل ۽ افتتاح ڪرڻ لاءِ ضروري هدايتون جاري ڪيون وڃن. سومر ڏينهن وزيراعليٰ هائوس مان جاري ڪيل بيان ۾ چيو ويو آهي ته وڏي وزير جسٽس باقر وزيراعظم انورالحق ڪاڪڙ سان اهم ملاقات ڪئي جنهن ۾ هن 5 منصوبن ۾ رڪاوٽن بابت آگاهي ڏني جن کي وزيراعظم جي ڌيان ڇڪرائڻ سان ختم ڪري سگهجي ٿو. وڏي وزير چيو ته وزيراعظم جو جواب نه رڳو هاڪاري پر گهڻو مددگار ۽ اطمينان بخش هو. ڪي سي آر: وڏي وزير وزيراعظم کي ٻڌايو ته وفاقي حڪومت کي ڪراچي سرڪلر ريلوي (ڪي سي آر) منصوبي جي قرض لاءِ ساوورين گارنٽي فراهم ڪرڻ جي ضرورت آهي جيڪا قومي ٻڌيءَ جو ثبوت بڻجندي. وڏي وزير چيو ته ساوورين گارنٽي منصوبي ۾ شامل سيڙپڪارن ۽ اسٽيڪ هولڊرن لاءِ مالي تحفظ ۽ خاطري تي اعتماد وڌندو ۽ وزيراعظم کي درخواست ڪئي ته وفاقي حڪومت فريم ورڪ معاهدي تي صحيحون ڪري ته جيئن سي پيڪ تحت منصوبو اڳتي وڌي سگهي. جسٽس (ر) باقر وزيراعظم کي اها به درخواست ڪئي ته هو پاڪستان ريلوي کي هدايت ڪري ته اها زمين رائٽ آف وي (RoW) سان گڏ ڪي سي آر حوالي ڪري جيڪا منصوبي جي ڪاميابي جي ڪُنجي آهي. وزيراعظم سنڌ جي وڏي وزير کي يقين ڏياريو ته هو سنڌ حڪومت جي اهم منصوبن جو مسئلو حل ڪندو. بي آر ٽي ريڊ لائين: ريڊ لائين منصوبي تي خيالن جي ڏي وٺ ڪندي نگران وڏي وزير جسٽس باقر نگران وزيراعظم کي ٻڌايو ته اي ڊي بي (ADB) سان گڏ اي آءِ آءِ بي (AIIB)، اي ايف ڊي (AFD) ۽ جي سي ايف (GCF) ان منصوبي تي ڪم ڪري رهيا آهن جڏهن ته (اي ڊي بي) ۽ ڪو فنانسرز جي سهڪار سان ان تي عمل ڪيو پيو وڃي. ڪراچي ريڊ لائين BRT منصوبي بابت پي سي- ون کي 15 اپريل 2019 تي CDWP پاران ڪليئر ڪيو ويو ۽ 29 آگسٽ 2019 تي ECNEC پاران 78384.33 ملين رپيا (503.21 ملين ڊالر) جي لاڳت سان منظور ڪيو ويو. قرض جو معاهدو سنڌ حڪومت ۽ ايشيائي ترقياتي بئنڪ وچ ۾ جون 2020ع ۾ ٿيو ۽ آڪٽوبر 2020ع ۾ لاڳو ٿيو. وڏي وزير، وزيراعظم کي ٻڌايو ته 6.31 ارب رپين جي لاڳت جو تجويز ڪيل پرائس ايڊجسٽمينٽ/وڌائڻ وارو فارمولا ٽرانس ڪراچي بورڊ ۽ سنڌ ڪابينا پاران منظور ڪيو ويو آهي. سنڌ حڪومت پرائس ايڊجسٽمينٽ/ واڌ واري فارمولا جي تجويز اڳواٽ منظوري لاءِ ايڪنڪ/ پلاننگ ڪميشن کي موڪلي ڇڏي آهي جيڪا ٻن مهينن کان التوا هيٺ آهي. وڏي وزير، وزيراعظم کي گذارش ڪئي ته ايڪنڪ/پلاننگ ڪميشن کي جلد کان جلد اڳواٽ منظوري جاري ڪرڻ جي هدايت ڏني وڃي جنهن سان ٽرانس ڪراچي کي نقصان جي ازالي ۽ سائيٽ تي ڪم ٻيهر شروع ڪرڻ کانپوءِ منصوبي کي وقت تي مڪمل ڪرڻ جي اجازت ملندي. وزيراعظم، وڏي وزير کي يقين ڏياريو ته هو ان معاملي تي رٿابندي ڪميشن سان ڳالهه ٻولهه ڪري منظوري حاصل ڪندو. ڪي فور (ڪي-IV): جسٽس باقر گريٽر ڪراچي بلڪ واٽر سپلاءِ (ڪي فور) بابت بحث تي ڳالهائيندي چيو ته خراب ٿيل انفراسٽرڪچر ۽ ڪمزور ڊسٽريبيوشن سسٽم سبب پاڻي جي فراهمي ۽ استعمال ۾ فرق وڌي ويو آهي جنهن سبب عوام ڏکائين کي منهن ڏئي رهيا آهن ان ڳڻتي جوڳي صورتحال کي نظر ۾ رکندي وفاقي حڪومت واپڊا ذريعي گريٽر ڪراچي بلڪ واٽر سپلائي اسڪيم K-IV، فيز ون (260 MGD) منصوبي جي شروعات لاءِ راضي ڪيو. نظر ثاني ٿيل PC-I کي ايڪنڪ اڳ ۾ ئي 2022 ۾ 126404.751 ملين رپين جي منظوري ڏئي چڪو آهي. وڏي وزير چيو ته اصل ۾ منصوبي تي ڪم مارچ 2023ع تائين مڪمل ٿيڻو هو، منصوبي تي مختلف سببن ڪري دير ٿي رهي آهي ۽ هاڻي منصوبي جي مڪمل ٿيڻ جي آخري تاريخ آڪٽوبر 2024 آهي. منصوبي کي وقت تي مڪمل ڪرڻ کي نظر ۾ رکندي وفاقي حڪومت پي ايس ڊي پي 24-2023 ۾ 68.119 ارب رپيا رکڻ جي درخواست ڪئي جنهن جي نتيجي ۾ رڳو 15.5 ارب رپيا مختص ڪيا ويا آهن. هن وڌيڪ چيو ته هن منصوبي لاءِ رکيل رقم اڻپوري آهي تنهنڪري اهو آڪٽوبر 2024ع تائين مڪمل نه ٿيندو. نگران وڏي وزير، وزيراعظم کي درخواست ڪئي ته لاڳاپيل وزارت کي هدايت ڪري ته هلندڙ مالي سال 24-2023ع دوران گريٽر ڪراچي بلڪ واٽر سپلائي اسڪيم K-IV منصوبي کي ڄاڻايل وقت اندر مڪمل ڪرڻ لاءِ گهٽ ۾ گهٽ 24.5 ارب رپين جي واڌو رقم مختص ڪئي وئي. وزيراعظم منصوبي لاءِ پنهنجي سهڪار جو يقين ڏياريو. ملير ايڪسپريس وي: وڏي وزير، وزيراعظم کي ٻڌايو ته ملير ايڪسپريس وي تي ڪم تيزي سان هلي رهيو آهي پر وفاقي حڪومت جي ڪجهه وزارتن جي اين او سيز/پرمٽس تعميراتي ڪم جي اڳڀرائي ۾ وڏي رڪاوٽ وڌي آهي. ۽ ڪمرشل بئنڪون – پروجيڪٽ جي قرض ڏيندڙن پاران لاڳاپيل اين او سيز جي ادائيگين سان اڳتي وڌڻ لاءِ شرط رکي ڇڏي آھي. وڏي وزير چيو ته جيڪڏهن 15 نومبر 2023 تائين اين اوسيز نه ڏنيون ويون ته قرض ڏيندڙ/بئنڪ وڌيڪ ادائگيون بند ڪري ڇڏينديون. وزيراعظم وڏي وزير کي خاطري ڪرائي ته هو اين او سي جاري ڪرڻ جي عمل کي تيز ڪرڻ لاءِ لاڳاپيل وزارت سان ڳالهائيندو ته جيئن منصوبي کي جلد کان جلد مالي مدد ملي سگهي. ڪراس ان پٽ ٽيڪس: وڏي وزير ڪراس ان پٽ ٽيڪس تي پڻ خيالن جي ڏي وٺ ڪئي جنهن تحت وفاقي حڪومت، سنڌ حڪومت جا 31 ارب رپيا ڪٽيا آهن. هن وزيراعظم تي زور ڀريو ته هو ايف بي آر کي هدايت ڪري ته ڪٽيل رقم کي سنڌ روينيو بورڊ (ايس آر بي) سان ڳنڍي ته جيئن حڪومت پاران ڪٽيل رقم جو مامرو حل ٿي سگهي. نگران وڏي وزير جي اعتراضن تي غور ڪندي نگران وزيراعظم کيس چيو ته هو صوبائي چيئرمين پلاننگ اينڊ ڊولپمينٽ، سيڪريٽري ٽرانسپورٽ ۽ ماس ڪميونيڪيشن ۽ ٻين لاڳاپيل آفيسرن تي ٻڌل ٽيم اسلام آباد اماڻي جتي هو لاڳاپيل وفاقي سيڪريٽرين سان ملاقاتون ڪري گڏيل معاملا طئي ڪيا وڃن. وزيراعظم وڏي وزير کي هدايت ڪئي ته هو وفاقي حڪومت سان اجلاس جي تاريخ طئي ڪرڻ لاءِ (وزيراعظم) سيڪريٽريٽ سان رابطو ڪري.
