ڪراچي (اسٽاف رپورٽر) سنڌ جي نگران وڏي وزير جسٽس (ر) مقبول باقر ٽرانسپورٽ ۽ ماس ٽرانزٽ کاتي جي مختلف منصوبن جو جائزو وٺندي کيس هدايت ڪئي ته سي پيڪ جي ايندڙ گڏيل ورڪنگ گروپ جي اجلاس ۾ گرين لائين ۽ اورينج لائين منصوبن جي رائيڊر شپ کي مناسب واڌاري لاءِ کنيل قدمن بابت ڪراچي سرڪلر ريلوي (KCR) منصوبي جي ڪاغذي ڪارروائي کي حتمي شڪل ڏني وڃي. هن اهي هدايتون خميس ڏينهن وزيراعليٰ هائوس ۾ هڪ اجلاس جي صدارت ڪندي جاري ڪيون. اجلاس ۾ چيئرمين پي اينڊ ڊي شڪيل منڱڻيجو، وڏي وزير جو پرنسپل سيڪريٽري حسن نقوي، سيڪريٽري ٽرانسپورٽ اسد زمان ۽ سنڌ ماس ٽرانزٽ اٿارٽي جي عملدارن شرڪت ڪئي. ڪي سي آر: سيڪريٽري ٽرانسپورٽ اسد زمان وڏي وزير کي بريفنگ ڏيندي چيو ته منصوبي جي فزيبلٽي مڪمل ڪئي وئي آهي ۽ ماس ٽرانسپورٽ سسٽم کي بهتر بڻائڻ لاءِ اهو بنيادي ماس ٽرانزٽ ڪوريڊور هوندو. ڪي سي آر جي فنانسنگ ايجنسي CPEC هوندي ۽ ان تي عملدرآمد، تڪميل ۽ آپريشن واري ڪم کي ڪراچي اربن ٽرانسپورٽ ڪمپني (KUTC) هلائندي. وڏي وزير کي ٻڌايو ويو ته چائنا ريلوي اٿارٽي کي پيش ڪيل تازي فزيبلٽي اسٽڊي کي حتمي شڪل ڏيڻ تي پاڪستان ۽ چيني وفدن وچ ۾ سيپٽمبر ۾ ڪي سي آر تي ڏهين جوائنٽ ورڪنگ گروپ (JWG) فورم تي ڳالهه ٻولهه ڪئي وئي. چيني وفد مثبت جواب ڏنو ۽ وقت سِر ضروري منظوريون ڏيڻ جي خاطري ڪرائي. وڏي وزير کي ٻڌايو ويو ته وفاقي حڪومت سنڌ حڪومت کي ڪي سي آر فريم ورڪ ايگريمينٽ کي اپڊيٽ/نظرثاني ڪرڻ لاءِ چيو آهي. وڏي وزير ٽرانسپورٽ کاتي کي هدايت ڪئي ته هو فريم ورڪ معاهدي کي حتمي شڪل ڏئي ۽ ايندڙ ٽن ڏينهن ۾ کيس رپورٽ پيش ڪري. وڏي وزير چيو ته هو ان منصوبي لاءِ فراهم ڪيل قرض جي ساوورين گارنٽي جاري ڪرڻ لاءِ وفاقي حڪومت سان ڳالهائيندو. گرين لائين: وڏي وزير کي ٻڌايو ويو ته بي آر ٽي گرين لائين منصوبي تي ڊسمبر 2021ع کان ڪم هلي رهيو آھي. اهو 20.9 ڪلوميٽر ڊگهو بي آر ٽي سسٽم آهي جنهن جي مقرر ڪيل رستي تي 80 بسون هلنديون آهن جن ۾ روزانو سراسري طور 55000 مسافر سفر ڪندا. وڏي وزير چيو ته مسافرن جي سفري گنجائش بسن جي ڊيگهه ۽ منصوبي جي لحاظ کان اطمينان جوڳي نه آهي. هن کي ٻڌايو ويو ته جڏهن ٻيون بي آر ٽي جهڙوڪ يلو لائين ۽ هڪ ٻيو فيڊر ڪم ڪرڻ شروع ڪندو ته بي آر ٽي گرين لائين تي روزانو 150000 کان 200000 تائين مسافرن جي تعداد ۾ اضافو ٿيندو. اورنج لائين: وڏي وزير کي ٻڌايو ويو ته بي آر ٽي اورنج لائن 3.8 ڪلوميٽر ڊگھي آھي جنھن جي مين ٽرنڪ تي 20 بسون آھن ۽ روزانو 3000 مسافرن جي تعداد رڪارڊ ڪئي وئي آھي. وڏي وزير ٽرانسپورٽ کاتي کي هدايت ڪئي ته عوام جي سهولت لاءِ اورنج لائين کي گرين لائين سان ڳنڍيو وڃي ۽ سوارين کي وڌايو وڃي. وڏي وزير ٽرانسپورٽ کاتي کي اهو ٽاسڪ ڏنو ته هو اورنج لائين کي گرين لائين سان ڳنڍڻ جا رستا ڳولي ۽ ٻنهي منصوبن جي ڳنڍڻ بابت سندن روٽ کي وڌائي. جسٽس باقر چيو ته ضم ٿيڻ واري عمل جو جائزو وٺڻ لاءِ هڪ ٻئي اجلاس جي صدارت ڪندس.
