اسلام آباد: (بيورو رپورٽ) اليڪشن ڪميشن آف پاڪستان قومي ۽ صوبائي اسيمبلي جي مخصوص سيٽن تي ميمبرن جي رڪنيت معطل ڪري ڇڏي.اليڪشن ڪميشن طرفان جاري ڪيل نوٽيفڪيشن موجب قومي ۽ صوبائي اسيمبلين جي ٽوٽل 77 مخصوص سيٽن تي ميمبرن جي رڪنيت معطل ڪئي وئي آهي، معطل ڪيل سيٽن ۾ عورتن جون 66 ۽ اقليتن جون 11 سيٽون شامل آهن.نوٽيفڪيشن موجب قومي اسيمبلي جي 21 مخصوص سيٽن تي ميمبرن جي رڪنيت معطل ڪئي وئي. اقليتن جي سيٽ تي قومي اسيمبلي جي 3 جڏهن ته عورتن جي 19 سيٽن تي ميمبرن جي رڪنيت معطل ڪئي وئي.اي سي پي موجب خيبرپختونخواهه اسيمبلي ۾ عورتن جون 21 ۽ اقليتن جي 4 سيٽن تي ميمبرن جي رڪنيت معطل ڪئي وئي آهي. اهڙي طرح پنجاب اسيمبلي ۾ عورتن جي 24 ۽ اقليتن جي 3 سيٽن تي ميمبرن جي رڪنيت معطل ڪئي وئي آهي.اليڪشن ڪميشن طرفان جاري ڪيل نوٽيفڪيشن موجب پنجاب اسيمبلي ۾ اقليتي سيٽن تي چونڊيل 3 ميمبرن جي رڪنيت معطل ڪئي وئي آهي. سنڌ اسيمبلي ۾ عورتن جي 2 ۽ اقليتن جي هڪ سيٽ تي ميمبرن جي رڪنيت معطل ڪئي وئي آهي. اهڙي طرح قومي اسيمبلي ۾ مسلم ليگ(ن) جي 13 عورتن ۽ هڪ اقليتي سيٽ گهٽ ٿي وئي، قومي اسيمبلي ۾ پيپلز پارٽي جون 5 ۽ جمعيت علماءِ اسلام(جي يو آءِ) (ف) جون 3 سيٽون گهٽ ٿي ويون.خيبرپختونخواهه اسيمبلي ۾ جي يو آءِ جون 10، (ن) ليگ جون 6 سيٽون گهٽ ٿيون. اهڙي طرح خيبرپختونخواهه اسيمبلي ۾ پيپلز پارٽي جون 7 سيٽون گهٽ ٿي ويون. اهي مخصوص سيٽون اضافي طور تي پاڪستان مسلم ليگ(ن) پاڪستان پيپلز پارٽي ۽ ٻين پارٽين ۾ ورهايون ويون هيون.
