ڪراچي(ويب ڊيسڪ)ڏکڻ آفريڪا جي ٽيم ڏکڻ ڪوريا کي زير جي ڀيٽ ۾ هڪ گول تان شڪست ڏئي پهريون ڀيرو پنهنجي تاريخ ۾ فٽبال عالمي ڪپ جي ناڪ آئوٽ مرحلي ۾ پهچي وئي آهي. ٽورنامينٽ جي شروعاتي مايوس ڪندڙ هار کان پوءِ اها هڪ حيرت انگيز واپسي قرار ڏني پئي وڃي.
ڏکڻ آفريڪا، جيڪا 2010ع ۾ ميزباني ڪرڻ کان پوءِ پهريون ڀيرو عالمي ڪپ ۾ شرڪت ڪري رهي هئي، گروپ اي جي فاتح ميڪسيڪوکان 2-0 تان هارائڻ کان پوءِ تقريباً مقابلي کان ٻاهر سمجهي وئي هئي.
پر پوءِ هن ٽيم زيڪ ريپبلڪ خلاف ڊرا کيڏي ۽ ڏکڻ ڪوريا خلاف ٻئي نمبر لاءِ فيصلائتي مقابلي ۾ ڪاميابي حاصل ڪئي. ڏکڻ آفريڪا جي فتح جو واحد گول ٿاپيلوماسيڪو ٻئي هاف ۾ ڪيو.
ڏکڻ ڪوريا جي هيڊ ڪوچ ماينگ بو هانگ هڪ حيران ڪندڙ فيصلو ڪندي پنهنجي ڪپتان سان هيونگ من کي شروعاتي ٽيم ۾ شامل نه ڪيو، جنهن کي ڪيترائي ماڻهو ايشيا جو بهترين فٽبالر سمجهندا آهن.
ايشيائي ٽيم ميچ جي شروعات بهتر نموني ڪئي. عارضي ڪپتان ڪم من جئي جي طاقتور هيڊر کي گول لائين تي اوبري مديبا روڪي ڇڏيو، جڏهن ته لي ڪينگ ان جو شاٽ به گول کان ٻاهر نڪري ويو.
ڏکڻ آفريڪا جلد ئي راند تي گرفت حاصل ڪري ورتي ۽ جوش سان حملن جو سلسلو جاري رکيو، پر گول ڪرڻ جا موقعا ضايع ڪندو رهيو.
30هين منٽ ۾ لڳو پئي ته ڏکڻ آفريڪا اڳواڻي حاصل ڪري وٺندو، جڏهن ايويڊنس ميڪگوپا کي بال مليو، جيڪو ڏکڻ ڪوريا جي گول ڪيپر ڪم سيونگ جييو پاران ٿالينتي ايمباٿا جي شاٽ روڪڻ کان پوءِ سامهون آيو هو.
پر ميڪگوپا ويجهي فاصلي تان به ڪمزور شاٽ هڻي سگهيو، جيڪو سڌو گول ڪيپر وٽ هليو ويو.
ٻئي هاف جي شروعات ۾ سون هيونگ من کي ميدان ۾ لاٿو ويو. هو انهن ٽن تبديلين مان هڪ هئي، جيڪي ڪوچ هانگ ميچ جو رخ بدلائڻ لاءِ ڪيون.
ٻئي هاف جي شروعات ۾ ماسيڪو هڪ ٻيو سٺو موقعو وڃائي ويٺو، جڏهن ته ڏکڻ ڪوريا جي فارورڊ اوه هيونگ جييو ٻئي پاسي ڏکڻ آفريڪا جي گول ڪيپر رونوين وليمز کي آزمائيندو رهيو.
جڏهن ميڪسيڪو مان خبر آئي ته ميزبان ميڪسيڪو، چيڪ ريپبلڪ خلاف اڳواڻي حاصل ڪري چڪو آهي، ته ميچ ۾ تڪڙ ۽ دٻاءُ وڌيڪ وڌي ويو.
63هين منٽ ۾ ڏکڻ آفريڪا پنهنجو موقعو استعمال ڪري ورتو. شيپانگ موريمي جي ڪراس تي ماسيڪو هن ڀيري پوري اعتماد سان ويجهي پوسٽ جي اندر بال موڪلي گول ڪري ڇڏيو.
ميچ جي آخري لمحن ۾ ڏکڻ ڪوريا ڀرپور ڪوشش ڪئي، پر وقت ختم ٿي ويو. نتيجي طور ڏکڻ آفريڪا 28 جون تي ڪئناڊا خلاف لاس اينجلس ۾ ناڪ آئوٽ مرحلي جو ميچ کيڏندو.
ميڪسيڪو پنهنجون سڀئي ٽي ميچون کٽي نو پوائنٽن سان گروپ ۾ پهرين پوزيشن حاصل ڪئي.
ٻئي طرف، قطر جي رانديگر عاصم مديبو تي عالمي ڪپ دوران ڪينيڊا جي مڊفيلڊر اسماعيل ڪون جي ٽنگ ڀڃڻ سبب پنج ميچن جي پابندي لاڳو ڪئي وئي آهي.
مديبو کي گذريل خميس تي وينڪور ۾ قطر خلاف ڪينيڊا جي 6-0 واري فتح دوران ان واقعي تي سڌو ريڊ ڪارڊ ڏيکاريو ويو هو. قطر ايندڙ رائونڊ کان آئوٽ ٿي وئي آهي.
